Jeremiah 52 - Yn Vible Casherick 1775 1819

CAB. LII

¹ Va Zedekiah bleïn as feed tra ghow eh toshiaght dy reill; as ren eh reill un vleïn jeig ayns Jerusalem: va ennym e voir Hamutal, inneen Yeremiah jeh Libnah.

² As ren eh shen ny va olk ayns shilley yn Chiarn, rere ooilley ny va Jehoiakim er n’yannoo.

³ Son trooid jymmoose y Chiarn haink eh gy-kione ayns Jerusalem as Judah, derrey v’eh er n’eiyrt ad magh veih e eanish, dy ren Zedekiah girree-magh noi ree Vabylon.

⁴ As haink eh gy-kione, ’sy nuyoo vleïn jeh’n reill echey, ayns y jeihoo vee, er y jeihoo laa jeh’n vee, dy daink Nebuchadrezzar ree Vabylon, eh-hene as ooilley e heshaght-chaggee, noi Jerusalem, as ren ad campal roish, as hrog ad tooryn n’oï ooilley mygeayrt.

⁵ Myr shen va’n ard-valley er ny hionney stiagh lioroo gys yn un vleïn jeig jeh’n ree Zedekiah.

⁶ As ’sy chiarroo vee, er y nuyoo laa jeh’n vee, va’n ghortey trome ayns yn ard-valley, myr shen nagh row arran ayn son pobble y cheer.

⁷ Eisht va’n ard-valley er ny vrishey stiagh, as ren ooilley ny deiney-caggee cosney roue, as hie ad magh ass yn ard-valley ’syn oie, liorish raad ny giattey, eddyr y daa voalley, va liorish garey yn ree; (nish va ny Caldeanee er chruinnaghey yn ard-valley mygeayrt;) as ghow ad raad y cheer-rea.

⁸ Agh deiyr armee ny Caldeanee er y ree, as verr ad er Zedekiah ayns cheer-rea Yericho; as va ooilley e heshaght-chaggee er ny skeayley voish.

⁹ Eisht ghow ad yn ree, as hug ad lhieu seose eh gys ree Vabylon ec Riblah, ayns thalloo Hamath; raad hug eh briwnys er.

¹⁰ As varr ree Vabylon mec Zedekiah roish e hooillyn: hug eh gy-baase myrgeddin ooilley princeyn Yudah ec Riblah.

¹¹ Eisht hug eh ny sooillyn ass Zedekiah; as chiangle ree Vabylon eh lesh geulaghyn, as hug eh lesh eh gys Babylon, as hug eh ayns pryssoon eh derrey laa e vaaish.

¹² Nish ayns y wheiggoo vee, er y chiaghtoo laa jeh’n vee, (va’n nuyoo vleïn jeig jeh Nebuchadrezzar ree Vabylon,) haink Nebuzaradan captan y ghard, va shirveish fo ree Vabylon, gys Jerusalem:

¹³ As losht eh thie yn Chiarn, as thie yn ree; as ooilley thieyn Yerusalem, as ooilley thieyn ny ard-gheiney, losht eh lesh aile.

¹⁴ As ren ooilley armee ny Caldeanee, va marish captan y ghard, lhieggal ooilley voallaghyn Yerusalem ooilley mygeayrt.

¹⁵ Eisht hug Nebuzaradan captan y ghard lesh ersooyl nyn gappeeyn shiartanse jeh boghtyn y phobble, as y fooilliagh jeusyn va faagit ’syn ard-valley, as adsyn chossyn magh, as hie harrish gys ree Vabylon, marish ymmodee elley.

¹⁶ Agh daag Nebuzaradan captan y ghard reygyryn jeh boghtyn ny cheerey, dy ve mysh ny garaghyn-feeyney, as son eirinnee.

¹⁷ Myrgeddin ny pillaryn prashey va ayns thie yn Chiarn, as ny binkyn, as y faarkey prashey va ayns thie yn Chiarn, vrish ny Caldeanee, as hug ad lhieu ooilley’n prash oc gys Babylon.

¹⁸ Ny pannaghyn neesht, as ny sleaystyn, as ny smalyderyn, as ny meillaghyn, as ny spainyn, as ooilley ny siyn prashey, son shirveish y chiamble, ghow ad ersooyl.

¹⁹ As ny basonyn, as ny censeryn, as ny scaillaghyn, as ny coirraghyn, as ny kainlereyn, as ny spainyn, as ny cappanyn; shen ny va jeh airh ayns airh, as shen ny va jeh argid ayns argid, ren captan y ghard goaill ersooyl.

²⁰ Yn daa phillar, un aarkey, as daa ghow jeig dy phrash va fo ny binkyn, va’n ree Solomon er n’yannoo ayns thie yn Chiarn: va prash ooilley ny siyn shoh erskyn towse.

²¹ As mychione ny pillaryn, va yrjid un phillar hoght cubityn jeig, as ve combaasit lesh rimmey dy ghaa chubit jeig; as va’n cheeid echey kiare oarleeyn; ve follym cheu-sthie.

²² As va er attey dy phrash; as va yrjid yn derrey attey queig cubityn, lesh obbyr chast as pomegranateyn er ny atteeyn runt mygeayrt, ooilley jeh prash. Va’n nah phillar myrgeddin as ny pomegranateyn casley roo shoh.

²³ As va kiare-feed as shey pomegranateyn jeig er y derrey heu; as ooilley ny pomegranateyn er yn obbyr-lieen, v’ad queig-feed runt mygeayrt.

²⁴ As ghow captan y ghard Seraiah yn ard-saggyrt, as Zephaniah yn nah haggyrt, as ny three arreyderyn giattey:

²⁵ Ghow eh neesht ass yn ard-valley yn ard-offishear va harrish ny deiney-caggee; as shiaght deiney jeusyn va fir-choyrlee yn ree, va er ny gheddyn ’syn ard-valley; as ard-scrudeyr yn cheshaght-chaggee, va ry-hoi musteral pobble ny cheerey; as three-feed dooinney jeh ny cummaltee, v’er ny gheddyn ’syn ard-valley.

²⁶ Myr shoh ghow Nebuzaradan captan y ghard ad, as hug eh lesh ad gys ree Vabylon ec Riblah.

²⁷ As woaill ree Vabylon ad, as hug eh ad gy-baase ec Riblah, ayns cheer Hamath. As shoh myr hie Judah ersooyl nyn gappeeyn ass y cheer oc hene.

²⁸ Shoh yn pobble hug Nebuchadrezzar lesh ersooyl ayns cappeeys: ’sy chiaghtoo vleïn, three thousaneyn as three as feed dy Hewnyn:

²⁹ Ayns yn hoghtoo vleïn jeig jeh reill Nebuchadrezzar hug eh lesh ersooyl cappeeyn veih Jerusalem hoght cheead feed persoon as ghaa-yeig:

³⁰ Ayns y trass vleïn as feed jeh reill Nebuchadrezzar, ren Nebuzaradan captan y ghard cur lesh ersooyl nyn gappeeyn jeh ny Hewnyn shiaght cheead as queig persoonyn as da-eed: va ooilley ny persoonyn kiare thousane as shey cheead.

³¹ As haink eh gy-kione ayns y chiaghtoo vleïn jeig as feed jeh cappeeys Yehoiachin ree Yudah, ayns y nah vee yeig, er y wheiggoo laa as feed jeh’n vee, dy ren Evil-merodach ree Vabylon, ayns y chied vleïn jeh e reill, troggal seose kione Yehoiachin ree Yudah, as hug eh lesh eh ass pryssoon,

³² As loayr eh dy dooie rish, as hoie eh yn stoyl-reeoil echey erskyn stuill-reeoil ny reeaghyn va mârish ayns Babylon,

³³ As ren eh caghlaa e gharmadyn-pryssoon; as d’ee eh arran dy kinjagh marish hene ooilley laghyn e vea.

³⁴ As son e veaghey gagh-laa, va lowanse kinjagh echey veih ree Vabylon ooilley laghyn e vea.