Jeremiah 51 - Yn Vible Casherick 1775 1819

CAB. LI

¹ Myr shoh ta’n Chiarn dy ghra, Cur-my-ner trog-yms seose geay dorrinagh noi Babylon, as noi ny cummaltee eck, mâroosyn ta girree-magh m’oï;

² As ver-yms gys Babylon fasneyderyn, nee ish y asney, as folmaghey yn cheer eck: son ayns y laa seaghnagh bee ad noi eck chion mygeayrt.

³ Ny lhig dasyn ta lhoobey yn vhow lhaggagh e laue, ny lhig da cur jeh e choamrey-caggee: ny jeeagh-jee myghin da ny deiney aegey eck; stroie-jee dy bollagh yn slane armee eck.

⁴ Myr shoh tuittee ad sheese marroo ayns thalloo ny Caldeanee, as adsyn vees guint dy baase ayns e straïdyn.

⁵ Son cha vel Israel dy slane treigit, ny Judah, liorish e Yee, Chiarn ny flaunyssee; ga dy row yn cheer oc lhieent lesh peccah noi Fer-casherick Israel.

⁶ Cosne-jee magh veih Babylon, as saue-jee dagh dooinney e vioys; nagh bee shiu giarit jeh ayns e vee-chairys ecksh: son shoh traa yn Chiarn dy ghoaill cooilleeney urree, as dy choyrt jee leagh rere e toilliu.

⁷ Ta Babylon er ve cappan airhey ayns laue y Chiarn, ren ooilley yn seihll er-meshtey: ta ny ashoonyn er n’iu jeh’n feeyn eck; shen-y-fa ta ny ashoonyn ass nyn geeayll.

⁸ Ta Babylon er duittym doaltattym, as t’ee naardey: jean-jee dobberan er e son; gow-jee shelliu son y ghuin eck, my ta lheihys ny cour.

⁹ Bailliu v’er lheihys Babylon, agh cha beagh ee er ny lheihys: faag-jee veue ee, as lhig dooin goll dagh dooinney gys e heer hene: son ta’n briwnys eck roshtyn gys niau, as er droggal eer gys yrjid yn aer.

¹⁰ Ta’n Chiarn er hoilshaghey yn chairys ain: tar-jee as lhig dooin fockley-magh ayns Sion obbyr y Chiarn yn Jee ain.

¹¹ Shleeu-jee ny sideyn; lhieen-jee ny builg-side: ta’n Chiarn er ghoostey spyrryd reeaghyn ny Medeyn: son t’eh kiarit noi Babylon dy stroie eh, as dy nee shoh yn cooilleeney ta’n Chiarn dy ghoaill son e hiamble.

¹² Cur-jee seose yn mergey er voallaghyn Vabylon, niartee-jee yn arrey, soie-jee ny arreyderyn, cur-jee sleih dy lhie cooyl-chlea: son ta’n Chiarn chammah er chiarail, as er n’yannoo mie ny t’eh er loayrt noi cummaltee Vabylon.

¹³ O uss ta cummal er ymmodee ushtaghyn, sonnyssagh ayns berchys, ta dty yerrey er jeet, as towse dty haynt.

¹⁴ Ta Chiarn ny flaunyssee er loo liorish hene, gra, Shickyr lhieen-yms oo lesh deiney, myr lesh braddagyn; as troggee ad yllaghey dt’oï.

¹⁵ T’eh er chroo yn thalloo lesh e phooar, t’eh er chiaddey yn seihll liorish e chreenaght, as er heeyney magh yn aer liorish e hushtey.

¹⁶ Tra t’eh cur magh e choraa, ta’n aer laadit lesh ushtey, as t’eh cur er kay troggal veih ardjyn sodjey magh y thallooin; t’eh cur magh tendreilyn lesh fliaghey, as lhiggey magh yn gheay ass e hashtaghyn.

¹⁷ Ta dy chooilley ghooinney jeu ny vouran ayns tushtey: ta keeayl dy chooilley lheieder lheïe ersooyl marish e yalloo grainnit: son cha vel y jalloo lheït agh fardail, as cha vel ennal ayndoo.

¹⁸ T’ad fardail, as obbyr y volteyrys: ayns earish nyn gerraghey nee ad cherraghtyn.

¹⁹ Cha vel Eiraght Yacob goll-roosyn; son she eshyn t’er chroo dy chooilley nhee; as ta Israel cronney e eiraght; Yn Chiarn ny flaunyssee yn ennym echey.

²⁰ T’ou uss yn teigh-caggee aym’s, as my ghreinyn-caggee: son lhiat’s brish-yms dy peeshyn ny ashoonyn; as lhiat’s ver-yms reeriaghtyn naardey;

²¹ As lhiat’s giare-yms sheese ayns peeshyn yn cabbyl as y markiaght; as lhiat’s brish-yms ayns peeshyn yn ainagh as eshyn ta caggey ayn;

²² Lhiat’s myrgeddin nee’m brishey ayns peeshyn dooinney as ben; as lhiat’s nee’m jannoo myn shenn as aeg; as lhiat’s nee’m jannoo myn yn dooinney aeg as y ven aeg;

²³ Brish-yms neesht dy peeshyn lhiat’s yn bochilley as e hioltane; as lhiat’s brish-yms ayns peeshyn yn erroo as e hesheraght-ghew; as lhiat’s lhieg-yms dy peeshyn ny captanyn as ny fir-reill.

²⁴ Agh cooilleen-yms er Babylon roish nyn sooillyn, as er ooilley fir-vaghee Chaldea, ooilley ny huilk t’ad er n’yannoo er Zion, ta’n Chiarn dy ghra.

²⁵ Cur-my-ner, ta mish dt’oï, O lieau chustey, ta’n Chiarn dy ghra, ta coyrt shaghrynys er ooilley yn seihll; agh sheeyn-yms my laue ort, as rowl-yms neose oo veih dty chreggyn, as neem’s oo y yannoo slieau loshtee.

²⁶ As cha gowee ad jeed’s clagh chorneilagh, ny clagh undin; agh bee oo dty hraartys kinjagh, ta’n Chiarn dy ghra.

²⁷ Soie-jee seose mergey ayns y cheer, sheid-jee yn trumpet mastey ny ashoonyn, soie-jee ny ashoonyn urree, muster-jee cooidjagh noi eck reeriaghtyn Ararat, Minni, as Ashchenaz; reih-jee captan noi eck; lhig da ny cabbil cheet seose myr ny braddagyn mollagh.

²⁸ Greinnee-jee seose ny ashoonyn noi eck, marish reeaghyn ny Medeyn, ny captanyn oc, as ooilley nyn leeideilee, as dy chooilley heer fo e reill.

²⁹ As bee yn cheer er-creau as seaghnit: son bee slane aigney yn Chiarn cooilleenit er Babylon, dy yannoo thalloo Vabylon ny hraartys gyn cummaltagh.

³⁰ Ta treanee Vabylon er scuirr veih’n chaggey, t’ad lhie cooyl nyn voallaghyn: ta’n troshid oc er n’aase moal; t’ad faase myr mraane: ta ny ynnydyn-vaghee eck losht, as ny boltyn eck brisht.

³¹ Roie-ys post quail post, as chaghter quail chaghter, lesh naight gys ree Vabylon, dy vel yn ard-valley echey goit ec y derrey chione,

³² Dy vel ny coorseyn-ushtey giarit jeh, yn chuirtlagh er aile, as ny deiney-caggee er choayl nyn dappey.

³³ Son myr shoh ta Chiarn ny flaunyssee, Jee Israel, dy ghra, Ta inneen Vabylon goll-rish laare-vooie, t’ee traa y woalley: foast tammylt beg, as hig earish yn ouyr eck.

³⁴ Ta Nebuchadrezzar ree Vabylon er my chur mow, t’eh er my vroo, t’eh er my yannoo saagh follym, t’eh er my lhuggey sheese myr dragon, t’eh er lhieeney e volg lesh my vee s’blaystal, as er my hilgey magh.

³⁵ Yn dewilys jeant orrym’s as er my eill, dy row eh er Babylon, nee cummaltagh Zion gra; as, Dy row my uill er fir-vaghee Chaldea, jir Jerusalem.

³⁶ Shen-y-fa myr shoh ta’n Chiarn dy ghra, Cur-my-ner, goym’s seose dty chooish, as trog-yms cooilleen er dty hon; as chyrmee-ym seose yn awin eck, as dooin-ym e farraneyn;

³⁷ As hig Babylon dy ve ny holtanyn, ynnyd-vaghee son dragonyn, atchim, as faghid, fegooish cummaltagh.

³⁸ Nee ad garveigagh ry-cheilley myr lionyn: nee ad gullal myr quallianyn lion.

³⁹ Ayns chiass nyn rouanys aarlee-yms gien elley daue, as nee’m ad er-meshtey dy yannoo ching jeu, as dy hilgey ad ayns cadley trome kinjagh, nagh bee ad dy bragh er nyn ghoostey, ta’n Chiarn dy ghra.

⁴⁰ Ver-ym lhiam ad sheese myr eayin gys y skynn, myr reaghyn ny goair fyrryn.

⁴¹ Kys dy vel Sheshach goit! as kys ta gloyr vooar y theihll greimmit doaltattym! kys ta Babylon er jeet dy ve red atchimagh mastey ny ashoonyn!

⁴² Ta’n keayn er jeet seose er Babylon; t’ee baiht fo earroo ny tonnyn.

⁴³ Ta ny ard-valjyn eck ny hraartys, thalloo sponkit as fadaneagh, cheer gyn cummaltagh, chamoo ta mac dooinney cheet ny choair.

⁴⁴ As neem’s Bel y vriwnys ayns Babylon, as goym’s ass e veeal shen t’eh er lhuggey; as cha jean ny ashoonyn ny smoo lhieeney stiagh huggey; dy feer, nee voalley Vabylon tuittym.

⁴⁵ My phobble, immee-jee magh ass-jee, as livrey-jee dy chooilley ghooinney e annym veih jymmoose trome y Chiarn.

⁴⁶ As ny lhig da’n cree eu gannooinaghey, as ny bee shiu agglit son y naight vees er ny chlashtyn ’sy cheer; hig naight un vleïn, as naight elley ’sy vleïn cheddin: bee cragheyder ’sy cheer, fer-reill noi fer-reill.

⁴⁷ Shen-y-fa, cur-my-ner, ta ny laghyn cheet dy jean-yms briwnys er jallooyn grainnit Vabylon: as bee yn slane cheer eck bun-ry-skyn, as tuittee ooilley ny cummaltee eck marroo cheu-sthie jee.

⁴⁸ Eisht nee niau as thalloo, as ooilley ny t’ayndoo, jannoo ronneeaght er Babylon: son hig ny cragheyderyn urree veih’n twoaie, ta’n Chiarn dy ghra.

⁴⁹ Myr ta Babylon er choyrt er sidooryn Israel dy huittym ayns caggey, myr shen ec Babylon tuittee fir-chaggee veih dy chooilley ard.

⁵⁰ Shiuish ta er scapail yn chliwe, cosne-jee rieau, ny shass-jee: cooinee-jee er y Chiarn foddey jeh, as smooinee-jee er Jerusalem.

⁵¹ Ta shin mow, er-y-fa dy vel shin er chlashtyn oltooan: ta nearey er choodaghey nyn eddin; son ta joarreeyn er jeet stiagh gys ynnydyn smoo casherick thie yn Chiarn.

⁵² Shen-y-fa, cur-my-ner, ta ny laghyn cheet, ta’n Chiarn dy ghra, dy goym’s cooilleeney er ny jallooyn grainnit eck; as fud ny cheerey nee ny guintee gaccan.

⁵³ Ga dy jinnagh Babylon troggal seose ee hene gys niau, as ga dy jinnagh ee niartaghey yrjid yn troshid eck, ny-yeih voym’s hig cragheyderyn urree, ta’n Chiarn dy ghra.

⁵⁴ Ta sheean yn eam cheet veih Babylon, as dy chragh trome veih cheer ny Caldeanee:

⁵⁵ Son dy vel y Chiarn er speeiney Babylon, as er chur ny host aynjee yn coraa vooar; tra ta ny tonnyn eck feiyral myr sheean ymmodee ushtaghyn, ta feiyr yn choraa oc troggal dy ard:

⁵⁶ Er-yn-oyr dy vel y spooilleyder er jeet urree, eer er Babylon, as ta ny deiney niartal eck goit; ta ooilley ny bow’ghyn oc brisht, son nee yn Chiarn Jee, yn Lhiaseyder, dy shickyr cooilleeney.

⁵⁷ As nee’m ny princeyn eck er-meshtey, ny deiney creeney, ny captanyn, ny fir-reill, as ny treanee caggee: as hig cadley trome orroo, as gyn doostey, ta’n Ree dy ghra, ta e ennym Yn Chiarn ny flaunyssee.

⁵⁸ Myr shoh ta Chiarn ny armeeyn dy ghra, Bee voallaghyn lheaney Vabylon dy bollagh lhieggit rish y thalloo, as ny giattyn ard eck losht lesh aile; as nee’n pobble tooilleil ayns fardail, as baaree yn sleih nyn niart dy deinagh trooid yn aile.

⁵⁹ Yn goo hug Jeremiah yn phadeyr ayns currym da Seraiah mac Neriah, mac Vaaseiah, tra hie eh marish Zedekiah ree Yudah gys Babylon, ’sy chiarroo vleïn jeh e reill. As va Seraiah shoh ny ard-shamyrder reeoil.

⁶⁰ Myr shoh scrieu Jeremiah ayns lioar ooilley ny huilk va kiarit er Babylon, eer ooilley ny goan shoh ta scruit noi Babylon.

⁶¹ As dooyrt Jeremiah rish Seraiah, Tra hig oo gys Babylon, as ver oo my-ner, as lhaihys oo ooilley ny goan shoh,

⁶² Eisht nee oo gra, O Hiarn, t’ou er loayrt noi’n voayl shoh, dy stroie eh, nagh bee cummaltagh faagit ayn, peccagh ny baagh, agh dy ve lhome treigit er son dy bragh.

⁶³ As tra vees oo erreish lhaih yn lioar shoh, dy jean oo kiangley clagh huggey, as ceau eh ayns mean Euphrates;

⁶⁴ As nee oo gra, Shoh myr hed Babylon fo, as cha n’irree eh veih’n cherraghey ver-yms urree; as bee ish rey. Choud shoh ta goan Yeremiah.