Jeremiah 5 - Yn Vible Casherick 1775 1819

CAB. V

¹ Roie-jee noon as noal trooid straïdyn Yerusalem, as jeeagh-jee nish, as shir-jee ayns e ynnydyn smoo taaghit, my oddys shiu dooinney y gheddyn, my ta fer erbee ta coyrt briwnys cairagh, ta shirrey magh yn ynrickys; as neem’s leih jee.

² As ga t’ad breearrey, gra, Liorish y Chiarn bio; son shickyrys t’ad goaill loo oaiagh.

³ O Hiarn, nagh vel ny sooillyn ayd’s er yn ynrickys? t’ou uss er lhie dty laue orroo, agh cha vel ad er ghoaill shoh gys nyn gree; t’ou uss dy choyrt mow ad, agh t’ad er n’obbal dy ghoaill kerraghey: t’ad er n’yannoo nyn eddin ny s’creoi na’n chreg; t’ad er n’obbal dy hyndaa.

⁴ Shen-y-fa dooyrt mee, Son shickyrys t’ad shoh nyn moghtyn; t’ad giare-cheeayllagh: son cha vel toiggal oc jeh raad y Chiarn, ny briwnys nyn Yee.

⁵ Hem roym gys ny deiney mooarey, as loayr-ym roosyn; son t’adsyn er hoiggal raad y Chiarn, as briwnys nyn Yee: agh t’ad shoh ooilley-cooidjagh er vrishey’n whing, as er scoltey ny greïnyn.

⁶ Er-y-fa shen nee lion ass y cheyll adsyn y stroie, as nee moddey-oaldey ’syn astyr ad y raipey, nee leopard freayll arrey er ny ard-valjyn oc: bee dy chooilley unnane ta goll magh assdoo er ny raipey ayns peeshyn; er-yn-oyr dy vel y drogh-yannoo oc ymmodee, as y cooyl-skyrraghtyn oc goaill niart.

⁷ Caïd nee’m shoh y leih dhyt? ta dty chloan er my hreigeil, as er loo lioroosyn nagh nee jeeghyn ad: tra va mee er n’yannoo magh ad gys nyn yeeilley, eisht vrish ad poosey, taaghey ayns troopyn ny thieyn streebee.

⁸ V’ad myr cabbil ard-veiyht ’sy voghrey: dagh fer jeu shêgin er ben e naboo.

⁹ Nagh jean-yms kerraghey son ny peccaghyn shoh? ta’n Chiarn dy ghra; as nagh jean m’annym’s cooilleeney ’ghoaill er lheid yn ashoon shoh?

¹⁰ Seose-jee er ny voallaghyn eck, as stroie-jee ad; agh ny jean-jee slane jerrey orroo: gow-jee ersooyl ny tooryn eck; son cha nee lesh y Chiarn ad.

¹¹ Son ta thie Israel as thie Yudah er ghellal dy feer foalsey m’oï’s, ta’n Chiarn dy ghra.

¹² T’ad er chur breg er y Chiarn, as er ghra, Cha nee eh t’ayn, chamoo hig olk orrin, chamoo nee mayd cliwe ny genney y akin:

¹³ As bee ny phadeyryn myr geay, as cha vel y goo ayndoo: myr shoh vees jeant roosyn.

¹⁴ Shen-y-fa shoh myr ta’n Chiarn, Jee ny flaunyssee, dy ghra, Er-yn-oyr dy vel shiu loayrt er yn aght shoh, cur-my-ner, neem’s my ghoan y yannoo ny aile ayns dty veeal, as y pobble shoh myr fuygh, as nee eh ad y stroie.

¹⁵ Cur-my-ner, ver-yms lhiam erriu ashoon veih foddey, O hie Israel, ta’n Chiarn dy ghra: te ny ashoon niartal, te ny henn ashoon, ashoon nagh nhione dhyt y ghlare oc, chamoo t’ou, toiggal cre t’ad dy ghra.

¹⁶ Ta’n bolg-side oc oaie foshlit, t’ad ooilley nyn gheiney trean.

¹⁷ As ee-ys ad seose yn troar ayd, as dty arran va kiarit son beaghey dty vec as dty inneenyn: nee ad gee seose dty hioltaneyn kirree as ollagh; nee ad gee seose messyn dty viljyn-feeyney as dty viljyn-figgagh: as dty ard-valjyn voallit, orroo v’ou cur dty varrant, ver ad naardey lesh y chliwe.

¹⁸ Ny-yeih ayns ny laghyn shen, ta’n Chiarn dy ghra, cha jean-yms slane jerrey riu.

¹⁹ As hig eh gy-kione, tra jir shiu, Cre’n-fa ta’n Chiarn yn Jee ain jannoo ooilley ny reddyn shoh rooin? eisht nee uss gansoor, ’Naght myr ta shiuish er hreigeil mish, as er hirveish jeeghyn joarree ayns y cheer eu hene; shen myr nee shiu joarreeyn y hirveish ayns cheer nagh nee lhieuish eh.

²⁰ Soilshee shoh ayns thie Yacob, as fockle magh eh ayns Judah, gra,

²¹ Clasht-jee rish shoh nish, O phobble vee-cheeayllagh, as gyn tushtey; ta sooillyn eu, as cha vel shiu fakin; ta cleayshyn eu, as cha vel shiu clashtyn:

²² Nagh jean-jee aggle y ghoaill roym’s? ta’n Chiarn dy ghra: nagh bee shiu er-creau ec my enish, t’er hoiaghey yn gheinnagh son cagliagh ny marrey, liorish sarey shickyr, nagh jed eh harrish; as ga dy vel ny tonnyn eck troggal ad-hene dy ard, ny-yeih cha vod ad goll harrish; ga s’mooar y feiyr t’ad dy yannoo, ny-yeih cha jarg ad goll ny-sodjey?

²³ Agh ta ec y pobble shoh cree roonagh as mee-viallagh; t’ad er hyndaa cooyl, as er n’gholl roue.

²⁴ Chamoo t’ad gra ayns nyn gree, Lhig dooin nish aggle y ghoaill roish y Chiarn nyn Yee, ta cur dooin fliaghey cooie ny imbaghyn, chammah toshiaght as jerrey ny bleeaney: t’eh freayll dooin shiaghtinyn dooghyssagh yn ouyr.

²⁵ Ta’n mee-chraueeaght eu er hyndaa ersooyl veue ny reddyn mie shoh, as ta nyn beccaghyn er lhiettal veue my vannaghtyn.

²⁶ Son mastey my phobble ta drogh gheiney ry-gheddyn: t’ad lhie farkiaght myr y chelgeyr; t’ad soiaghey ribbey, t’ad tayrtyn deiney.

²⁷ Myr ta caage lane dy eeanlee, myr shen ta ny thieyn ocsyn lane dy volteyrys: shen-y-fa t’ad er jeet gys ard-ooashley as berchys vooar.

²⁸ T’ad er n’aase roauyr, t’ad ayns callin vie, t’ad er n’gholl erskyn eer obbraghyn smessey ny mee-chrauee; cha vel ad briwnys yn chooish, cooish y chloan gyn ayr, ny-yeih t’ad bishaghey; as cooish chair yn ymmyrchagh cha vel ad reaghey.

²⁹ Nagh jean-yms kerraghey y ghoaill son ny peccaghyn shoh? ta’n Chiarn dy ghra: nagh jean m’annym cooilleeney y ghoaill er lheid yn ashoon shoh?

³⁰ Ta red yindyssagh as atchimagh jeant ’sy cheer;

³¹ Ta ny phadeyryn jannoo phadeyrys foalsey, as lesh y chooney ocsyn ta ny princeyn gymmyrkey reill; as ta my phobble booiagh lesh myr shen dy ve: as cre’n erree hig erriu son ooilley shoh?