Jeremiah 48 - Yn Vible Casherick 1775 1819

CAB. XLVIII

¹ Noi Moab myr shoh ta Chiarn ny flaunyssee, Jee Israel, dy ghra, Smerg da Nebo! son te spooillit; ta Kiriathaim mow as goit; ta Misgab fo seaghyn as atchim,

² Cha bee boggyssagh ny smoo ayns Moab: ayns Heshbon t’ad er chiarail olk n’oï; tar-jee, as lhig dooin eh y yiarey jeh, nagh bee eh ny ashoon: bee uss er dty stroie neesht, O Vadmenah: eiyree yn cliwe ort’s.

³ Bee coraa yllaghey veih Horonaim, toyrt-mow, as traartys trome.

⁴ Ta Moab er ny stroie; ta eam yn chloan veggey eck er ny chlashtyn.

⁵ Son ec ughtagh Luhith, nee keayney kinjagh goll seose; as ec liargee Horonaim, ta ny noidyn er chlashtyn eam dy hoyrt-mow.

⁶ Roie-jee er-chea, saue-jee nyn mioys, as bee-jee myr y freoagh ayns yn aasagh.

⁷ Er-yn-oyr dy vel oo er hreishteil ayns obbyr dty laueyn hene, as ayns dty verchys, bee uss myrgeddin goit; as hed Chemosh magh ayns cappeeys, marish e haggyrtyn as e phrinceyn dy cheilley.

⁸ As hig y roosteyr er dy chooilley ard-valley, as cha jean balley jeu scapail: bee yn coan neesht currit mow, as hed y cheer-rea naardey, myr ta’n Chiarn er loayrt.

⁹ Cur-jee skianyn da Moab, dy vod eh getlagh as cosney roish: son bee ny ard-valjyn echey follym-faase, gyn cummaltagh faagit ayndoo.

¹⁰ Cursit dy row eshyn ta jannoo obbyr y Chiarn dy molteyragh, as mollaght dy row ersyn ta lhiettal e chliwe veih fuill.

¹¹ Ta Moab er ve ec aash er dy foddey, as ec fea er e ghrundin: cha row eh folmit veih saagh gys saagh, chamoo t’eh er n’gholl gys cappeeys: shen-y-fa ta e vlass er hannaghtyn ayn, as cha vel e vree er n’gholl eig.

¹² Shen-y-fa, cur-my-ner, ta ny laghyn cheet, ta’n Chiarn dy ghra, dy der-yms ersyn joarreeyn, eiyrys eh gys cheer yoarree, as folmee ad ny siyn-feeyney echey, as brishee ad e voteilyn.

¹³ As gowee Moab nearey jeh Chemosh, myr va nearey er thie Israel son jalloo Veth-el nyn marrant.

¹⁴ Kys dy vel shiu gra, Ta shin deiney niartal, as trean son y chaggey?

¹⁵ Ta Moab spooillit, as er hreigeil e ard-valjyn, as ta e reih deiney aegey er n’gholl sheese gys y slaughter, ta’n Ree dy ghra, ta enmyssit, Chiarn ny flaunyssee.

¹⁶ Ta seaghyn Voab er-gerrey, as ta e hreihys cheet dy tappee.

¹⁷ Ooilley shiuish ta mygeayrt-y-mysh, jean-jee dobberan er e hon; as ooilley shiuish shione diu yn ennym echey, abbyr-jee, Kys ta’n lorg-reill lajer brisht, as y clatt aalin!

¹⁸ Tar neose, O inneen Ghibon veih dty ghloyr, as soie ’sy joan; son hig spooilleyder Voab ort’s, as nee eh stroie dty chashtallyn lajer.

¹⁹ O chummaltagh Aroer, shass er y raad, as jeeagh magh dy gyere; fênee jehsyn ta er-chea, as jeeish t’er scapail, as abbyr, Cre t’er jeet erriu?

²⁰ Ta Moab bun-ry-skyn, son te lhieggit: yllee-jee, as jean-jee keayney; insh-jee ayns Arnon, dy vel Moab naardey,

²¹ As ta briwnys er jeet er y cheer-rea; er Holon, as er Jahazah, as er Mephaath,

²² As er Dibon, as er Nebo, as er Beth-diblathaim,

²³ As er Kiriathaim, as er Beth-gamul, as er Beth-meon,

²⁴ As er Kerioth, as er Bozrah, as er ooilley ard-valjyn thalloo Voab, foddey as gerrit.

²⁵ Ta eairk Voab giarit jeh, as e roih brisht, ta’n Chiarn dy ghra.

²⁶ Jean-jee eh er-meshtey; son dirree eh magh noi yn Chiarn: bee Moab seiyt ’sy skeay echey hene, as bee eshyn neesht son faghid.

²⁷ Son nagh row Israel hene son faghid dhyt? row eh ry-gheddyn mastey maarlee? son neayr’s loayr oo jeh, t’ou lheim son boggey.

²⁸ O shiuish chummaltee Voab, faag-jee ny ard-valjyn, as cum-jee ayns ny creggyn, as bee-jee myr y chalmane ta jannoo yn edd eck ayns tuill ny guaggyn.

²⁹ Ta shin er chlashtyn jeh moyrn Voab, (t’eh erskyn-towse moyrnagh,) e vooaralys, as e chione-ardys, as e voyrn, as roonid e chree.

³⁰ Shione dou yn farg echey, ta’n Chiarn dy ghra, agh cha jig eh lesh; cha jean ny breagyn echey goaill raad.

³¹ Shen-y-fa trog-yms yllaghey son Moab, as dobberan son ooilley Moab; hig osnaghyn veih my chree son deiney Chir-heres.

³² O villey-feeyney Sibmah, keayn-yms er dty hon lesh keayney Yazer: ta dty phlantyn er n’gholl harrish y cheayn, t’ad roshtyn gys eer faarkey Yazer; ta’n roosteyr er duittym er dty vessyn-souree, as er dty vessyn-feeyney.

³³ As ta boggey as gennallys er hreigeil yn magher messoil, as thalloo Voab; ta mee er choyrt daue genney feeyn ayns ny doaghyn-feeyney; cha bee yn fouyr-feeyney lesh gennallys yllaghey; cha bee yn eam oc er ny chlashtyn.

³⁴ Veih yllaghey Heshbon gys Elealeh, as eer gys Jahaz, t’ad er choyrt magh nyn goraa; veih Zoar eer gys Horonaim, myr colbagh three-bleeaney; son nee ushtaghyn Nimrim neesht failleil.

³⁵ Ny-sodjey giare-yms jeh veih Moab, ta’n Chiarn dy ghra, eshyn ta chebbal er ny ard-ynnydyn, as eshyn ta lostey incense gys ny jeeghyn echey.

³⁶ Shen-y-fa nee my chree feiyral myr feddanyn son Moab, as bee my chree myr greïe-chiaull oanluckee son deiney Chir-heres: son ta’n verchys t’eh er chosney er jerraghtyn.

³⁷ Son bee dy chooilley chione meayl, as dy chooilley aasaag baarit: er dy chooilley laue vees geulaghyn, as aanrit-sack er nyn meeghyn.

³⁸ Bee trimshey cadjin ayns ard-shamyr dy chooilley hie ayns Moab, as ayns ny straïdyn: son ta mee er vrishey Moab myr saagh gyn-ymmyd, ta’n Chiarn dy ghra.

³⁹ Nee ad gullyrnee, gra, Kys dy vel eh lhieggit! kys ta Moab dy naareydagh er chur cooyl! myr shen bee Moab son craid, as atchim da ooilley e naboonyn.

⁴⁰ Son shoh ta’n Chiarn dy ghra, Cur-my-ner, nee eh getlagh myr urley, as sheeyney e skianyn harrish Moab.

⁴¹ Ta Kerioth goit, as ny cashtallyn lajer greimmit, as bee creeaghyn deiney-caggee Voab ec y laa shen myr cree ben ayns pianyn troailt.

⁴² As bee Moab er ny stroie nagh bee eh ny phobble, er-yn-oyr dy vel eh er n’irree-magh noi yn Chiarn.

⁴³ Bee aggle, as yn oaie, as y ribbey ort, O chummaltagh Voab, ta’n Chiarn dy ghra.

⁴⁴ Eshyn chea-ys veih yn aggle, tuittee eh ’syn oaie; as eshyn scaapys yn oaie, bee eh goit ’sy ribbey: son ver-yms lhiam er, eer er Moab, bleïn yn cherraghey oc, ta’n Chiarn dy ghra.

⁴⁵ Agh shass-jee shiuish fo scadoo Heshbon, as cur-jee nyn marrant er; son brishys aile magh ass Heshbon, as lossey ass mean Sihon, ver naardey folt Voab, as brishys mwannal ny mooaralee.

⁴⁶ Smerg dhyt’s, O Voab! ta pobble Chemosh cherraghtyn: son ta dty vec goit nyn bryssoonee, as dty inneenyn nyn gappeeyn.

⁴⁷ Ny-yeih chyndaa-yms reesht cappeeys Voab ayns ny laghyn jerrinagh, ta’n Chiarn dy ghra. Choud shoh ta briwnys Voab.