Jeremiah 47 - Yn Vible Casherick 1775 1819

CAB. XLVII

¹ Goo yn Chiarn haink gys y phadeyr Jeremiah noi ny Philistinee, roish my va Pharaoh er n’ghoaill Gaza;

² Shoh myr ta’n Chiarn dy ghra, Cur-my-ner, ta ushtaghyn troggal veih’n twoaie, as bee ad thooilley roie harrish ny brooinyn, as ver ad yn cheer fo ushtey, as ooilley ny t’ayn; yn ard-valley, as ny cummaltee t’ayn: eisht bee ny deiney ayns jeïr, as nee ooilley fir-vaghee yn cheer gluggernee.

³ Ec feiyr stampey yngnyn e chabbil trean, ec sheean ny fainee, as tharmane ny queeylyn, bee ny ayraghyn cha lhag-lauee shen nagh bee ad abyl jeeaghyn lurg nyn gloan hene;

⁴ Kyndagh rish y laa ta ry-heet dy spooilley ooilley ny Philistinee, as dy yiarey jeh veih Tyrus as Zidon dy chooilley er-coonee ta er-mayrn; son ver y Chiarn naardey ny Philistinee, fooilliagh cheer Caphtor.

⁵ Ta Gaza er n’aase meayl; ta Ashkelon er ny yiarey jeh marish jeelym ny glionney: caïd nee oo lhottey oo hene?

⁶ O chliwe y Chiarn, caïd nagh gow fea? Cur oo hene ’sy fine, scuirr, as lhie feagh.

⁷ Kys oddys eh ve ec fea, fakin dy vel y Chiarn er choyrt currym da noi Ashkelon, as noi slystyn ny marrey? shen y raad t’eh er phointeil eh.