Jeremiah 41 - Yn Vible Casherick 1775 1819

CAB. XLI

¹ Nish haink eh gy-kione ayns y chiaghtoo vee, dy daink Ishmael mac Nethaniah, mac Elishama, jeh’n chynney reeoil, as princeyn y ree, eer jeih deiney mârish, gys Gedaliah mac Ahikam, gys Mizpah: as shen y raad d’ee ad arran cooidjagh ec Mizpah.

² Eisht dirree Ishmael mac Nethaniah, as ny jeih deiney va mârish, as woaill ad Gedaliah mac Ahikam, mac Shaphan, lesh y chliwe, as varr ad eshyn va ree Vabylon er n’yannoo ny chiannoort harrish y cheer.

³ Varr Ishmael myrgeddin ooilley ny Hewnyn va mârish, eer marish Gedaliah ec Mizpah, as ny Caldeanee, va er ny gheddyn ayns shen, as ny fir-chaggee.

⁴ As haink eh gy-kione, yn nah laa erreish da v’er varroo Gedaliah, as nagh row briaght er jeet er,

⁵ Dy daink shiartanse veih Shechem, veih Shiloh, as veih Samaria, eer kiare-feed dooinney, lesh nyn aasaagyn baarit, as nyn eaddagh raipit, as fuill roie orroo, lesh chebballyn as ourallyn incense nyn laue, dy choyrt lhieu ad gys altar y Chiarn.

⁶ As hie Ishmael mac Nethaniah magh veih Mizpah nyn guail, keayney ooilley yn raad myr hie eh: as haink eh gy-kione, tra haink eh seose roo, dy dooyrt eh roo, Tar-jee gys Gedaliah mac Ahikam.

⁷ As shen myr ve, tra haink ad gys mean yn ard-valley, dy ren Ishmael mac Nethaniah ad y varroo, as eisht ren eh-hene as e gheiney ad y hilgey ’syn ooig.

⁸ Agh va jeih deiney ry-gheddyn nyn mast’ oc, dooyrt rish Ishmael, Ny marr shin; son ta tashtaghyn follit ain ’sy vagher, dy churnaght, as dy oarn, as dy ooil, as dy vill. Myr shen lhig eh lhieu, as cha varr eh ad mastey nyn mraaraghyn.

⁹ Nish yn ooig, ayn hilg Ishmael ooilley kirp marroo ny deiney, v’eh er varroo marish Gedaliah, va’n ooig cheddin ren Asa yn ree ayns aggle roish Baasha ree Israel: as ren Ishmael mac Nethaniah shen y lhieeney lesh ny merriu.

¹⁰ Eisht hug Ishmael lesh ersooyl nyn gappeeyn ooilley fooilliagh yn phobble va ec Mizpah, eer inneenyn y ree, as ooilley yn pobble va er-mayrn ayns Mizpah, va Nebuzaradan captan y ghard er livrey gys Gedaliah mac Ahikam; as hug Ishmael mac Nethaniah lesh ersooyl ad nyn gappeeyn, as hrog eh er dy gholl harrish gys ny Ammoniteyn.

¹¹ Agh tra cheayll Johanan mac Chareah, as ooilley captanyn y troshid va mârish, jeh ooilley ny huilk va Ishmael mac Nethaniah er n’yannoo,

¹² Eisht hayrn eh magh ooilley e gheiney, as hie ad dy chaggey rish Ishmael mac Nethaniah, as haink ad seose rish liorish ny loghanyn mooarey ushtey ta ayns Gibeon.

¹³ Nish haink eh gy-kione, tra honnick ooilley yn pobble-cappee va marish Ishmael, Johanan mac Chareah, as ooilley captanyn y troshid va mârish, eisht ghow ad boggey.

¹⁴ Myr shen ooilley yn pobble hug Ishmael lesh nyn gappeeyn veih Mizpah hug ad mygeayrt, as hyndaa ad, as hie ad harrish gys Johanan mac Chareah.

¹⁵ Agh chossyn Ishmael mac Nethaniah veih Johanan marish hoght deiney, as hie eh gys ny Ammoniteyn.

¹⁶ Eisht ghow Johanan mac Chareah, as ooilley captanyn y troshid va mârish, ooilley fooilliagh yn phobble v’eh er chosney veih Ishmael mac Nethaniah veih Mizpah, (erreish da v’er varroo Gedaliah mac Ahikam,) eer ny deiney-caggee niartal, as ny mraane, as cloan, as ny fir-oik v’eh er choyrt lesh reesht veih Gibeon:

¹⁷ As hie ad roue, as ghow ad nyn gummal ayns cronney Chimham, ta liorish Beth-lehem, er-chee dy gholl gys Egypt,

¹⁸ Kyndagh rish ny Caldeanee: son v’ad ayns aggle roue, er-yn-oyr dy row Ishmael mac Nethaniah er varroo Gedaliah mac Ahikam, eh va ree Vabylon er n’yannoo kiannoort ny cheerey.