Jeremiah 39 - Yn Vible Casherick 1775 1819

CAB. XXXIX

¹ Ayns y nuyoo vleïn jeh reill Zedekiah ree Yudah, ayns y jeihoo vee, haink Nebuchadrezzar ree Vabylon as ooilley yn armee echey noi Jerusalem, as chruinnee ad stiagh eh ooilley mygeayrt.

² As ’syn un vleïn jeig jeh reill Zedekiah, ’sy chiarroo vee, er y nuyoo laa jeh’n vee, vrish ad stiagh er yn ard-valley.

³ As haink ooilley princeyn ree Vabylon stiagh, as hoie ad ayns y yiat meanagh, eer Nergal-sharezer, Samgar-nebo, Sarsechim, Rab-saris, Rab-mag, marish y chooid elley jeh ard-gheiney ree Vabylon.

⁴ As haink eh gy-kione, tra honnick Zedekiah ree Yudah ad, as ooilley ny fir-chaggee, chossyn ad roue, as daag ad yn ard-valley ’sy dorraghys, goaill raad garey yn ree, er y yiat eddyr y daa voalley, jannoo son y cheer-rea.

⁵ Agh deiyr armee ny Caldeanee orroo, as verr ad er Zedekiah ayns cheer-rea Yericho: as tra v’ad er ghoaill eh, hug ad lhieu seose eh gys Nebuchadrezzar ree Vabylon gys Riblah, ayns cheer Hamath, raad hug eh briwnys n’oï.

⁶ Eisht doardee ree Vabylon mec Zedekiah dy ve stroit ayns Riblah kiongoyrt rish e hooillyn; as ooilley deiney ooasle Yudah hug ree Vabylon dy baase myrgeddin.

⁷ Ny-sodjey, hug eh sooillyn Zedekiah ass, as hug eh ayns geulaghyn eh, dy chur lesh eh gys Babylon.

⁸ As losht ny Caldeanee plaase y ree, as thieyn y phobble lesh aile, as lhieg ad voallaghyn Yerusalem.

⁹ Eisht hug Nebuzaradan, captan y ghard, lesh ersooyl nyn gappeeyn gys Babylon fooilliagh yn phobble va er-mayrn ayns yn ard-valley, as adsyn ren tuittym lesh, as haink harrish huggey, marish yn chooid elley jeh’n sleih va faagit.

¹⁰ Agh boghtyn y cheerey nagh row monney oc, daag Nebuzaradan captan y ghard ayns cheer Yudah, as hug eh daue garaghyn-feeyney as magheryn ec y traa cheddin.

¹¹ Eisht hug Nebuchadrezzar ree Vabylon currym mychione Jeremiah da Nebuzaradan captan y ghard, gra,

¹² Gow eh, as jeeagh dy mie da, as ny cur drogh ghellal da; agh jean er e hon cre-erbee t’eh dy yeearree.

¹³ Myr shen hug Nebuzaradan captan y ghard, as Nebushasban, Rab-saris, as Nergal-sharezer, Rab-mag, as ooilley ard-leeideilee ree Vabylon,

¹⁴ Eer adsyn hug fys, as ghow ad Jeremiah ass cooyrt y phryssoon, as livrey ad eh gys currym Ghedaliah mac Ahikam, mac Shaphan, eh dy chur lesh thie eh: myr shen ren eh baghey mastey’n pobble.

¹⁵ Nish haink goo yn Chiarn gys Jeremiah, choud as v’eh jeight seose ayns cooyrt y phryssoon, gra,

¹⁶ Immee, as loayr rish Ebed-melech yn Ethiopian, gra, Myr shoh ta Chiarn ny flaunyssee, Jee Israel, dy ghra, Cur-my-ner, cooilleen-yms my ghoan er yn ard-valley shoh son olk, as cha nee son mie; as bee ad jeant mie ayns y laa shen kiongoyrt rhyt.

¹⁷ Agh livrey-yms oo ayns y laa shen, ta’n Chiarn dy ghra, as cha jig oo fo yn phooar ocsyn t’ou ayns aggle roue.

¹⁸ Son neem’s dy shickyr uss y livrey, as cha duitt oo liorish y chliwe; agh cosnee oo ersooyl lesh dty vioys, er-yn-oyr dy vel oo er hreishteil aynym’s, ta’n Chiarn dy ghra.