Jeremiah 36 - Yn Vible Casherick 1775 1819

CAB. XXXVI

¹ As haink eh gy-kione, ayns y chiarroo vleïn jeh reill Yehoiakim mac Yosiah ree Yudah, dy daink yn goo shoh gys Jeremiah veih’n Chiarn, gra,

² Gow lioar, as scrieu ayn ooilley ny goan ta mish er loayrt rhyt’s noi Israel, as noi Judah, as noi dy chooilley ashoon, er-dyn laa loayr mee rhyt, veih laghyn Yosiah, eer gys y laa t’ayn jiu.

³ Hoiggal, foddee eh ’ve dy jean thie Yudah clashtyn ooilley nyn gerraghey ta mish kiarail orroo; dy vod ad chyndaa dy chooilley ghooinney veih e ghrogh raad, as mish dy leih daue yn vee-chairys oc, as nyn beccah.

⁴ Eisht deïe Jeremiah er Baruch mac Neriah: as ren Baruch scrieu ayns y lioar veih beeal Yeremiah ooilley goan y Chiarn, v’eh er loayrt rish.

⁵ As doardee Jeremiah da Baruch, gra, Ta mish jeight seose; cha voddym goll gys thie yn Chiarn:

⁶ Shen-y-fa immee uss, as jean lhaih ’sy lioar, t’ou er scrieu veih my veeal, goan y Chiarn, ayns clashtyn y phobble, ayns thie yn Chiarn er y laa troshtee: as nee oo lhaih ad neesht ayns clashtyn ooilley Judah ta cheet ass nyn ard-valjyn.

⁷ Foddee eh ’ve dy jean ad chebbal nyn aghin kiongoyrt rish y Chiarn, as chyndaa dagh unnane veih e ghrogh raad: son s’mooar ta’n jymmoose as yn eulys ta’n Chiarn er n’ockley magh noi’n pobble shoh.

⁸ As ren Baruch mac Neriah cordail rish ooilley ny doardee yn phadeyr Jeremiah da, lhaih ayns y lioar goan y Chiarn ayns thie yn Chiarn.

⁹ As haink eh gy-kione, ayns y wheiggoo vleïn jeh reill Yehoiakim mac Yosiah ree Yudah, ayns y nuyoo vee, dy dug ad eam son trostey fenish y Chiarn da ooilley cummaltee Yerusalem, as da ooilley’n pobble haink veih ard-valjyn Yudah gys Jerusalem.

¹⁰ Eisht ren Baruch lhaih ass y lioar goan Yeremiah ayns thie yn Chiarn, ayns shamyr Ghemariah mac Shaphan y scrudeyr, ’sy chooyrt syrjey, liorish giat noa thie yn Chiarn, ayns clashtyn ooilley yn pobble.

¹¹ Nish tra va Michaiah mac Ghemariah, mac Shaphan, er chlashtyn ass y lioar ooilley goan y Chiarn.

¹² Dy jagh eh sheese gys thie yn ree, gys shamyr yn ard-scrudeyr: as cur-my-ner, va ooilley ny princeyn nyn soie ayns shen, eer Elishama yn scrudeyr, as Delaiah mac Shemaiah, as Elnathan mac Achbor, as Gemariah mac Shaphan, as Zedekiah mac Hananiah, as ooilley ny ard-gheiney.

¹³ Eisht dinsh Michaiah daue ooilley ny goan v’eh er chlashtyn, tra va Baruch lhaih yn lioar ayns clashtyn yn phobble.

¹⁴ Shen-y-fa hug ooilley ny princeyn Jehudi mac Nethaniah, mac Shelemiah, mac Cushi, gys Baruch, gra, Gow ayns dty laue yn lioar t’ou er lhaih ayns clashtyn y phobble, as tar royd ayns shoh. Myr shen ghow Baruch mac Neriah yn lioar ny laue, as haink eh.

¹⁵ As dooyrt ad rish, Soie sheese nish, as lhaih dooin eh. Er shoh lhaih Baruch eh ayns nyn glashtyn.

¹⁶ Nish haink eh gy-kione, tra v’ad er chlashtyn ooilley ny goan, dy row aggle orroo ooilley dy cheilley, as dooyrt ad rish Baruch, Inshee mayd dy firrinagh da’n ree ooilley ny goan shoh.

¹⁷ As dênee ad jeh Baruch, gra, Insh dooin nish, Kys ren oo scrieu ooilley ny goan shoh veih e veeal?

¹⁸ Eisht dreggyr Baruch ad, Hug eshyn roym ooilley ny goan shoh ass e veeal, as scrieu mish ad lesh ink ’sy lioar.

¹⁹ Eisht dooyrt ny princeyn rish Baruch, Immee royd as follee oo hene, uss as Jeremiah, as ny lhig da fys ’ve ec dooinney erbee cre raad vees shiu.

²⁰ As hie ad roue gys y ree stiagh gys y chooyrt, agh hasht ad yn lioar ayns shamyr yn scrudeyr Elishama, as dinsh ad ooilley ny goan ayns clashtyn y ree.

²¹ Myr shen hug y ree Jehudi dy chur lesh y lioar; as ghow eh lesh eh ass shamyr Elishama yn scrudeyr: as ren Jehudi lhaih eh ayns clashtyn y ree, as ayns clashtyn ooilley ny princeyn va shassoo mygeayrt y ree.

²² Nish va’n ree ny hoie ayns e hie geuree, ’syn nuyoo vee: as va aile er y chiollagh lostey kiongoyrt rish.

²³ As haink eh gy-kione, tra va Jehudi er lhaih three ny kiare dy ghuillagyn, dy yiare yn ree eh lesh skynn-phenney, as cheau eh ’syn aile eh va er y chiollagh, derrey va ooilley yn lioar losht ’syn aile va er y chiollagh.

²⁴ Ny-yeih cha row aggle arryssagh orroo, cha raip ad nyn goamraghyn, chamoo yn ree hene, ny veg jeh e harvaantyn cheayll ooilley ny goan shoh.

²⁵ Ga dy ren Elnathan, as Delaiah, as Gemariah, guee er y ree, gyn dy lostey yn lioar; agh cha n’eaishtagh eh roo.

²⁶ Agh doardee yn ree da Jerahmeel mac Hammelech, as Seraiah mac Azriel, as Shelemiah mac Abdeel, dy ghoaill yn scrudeyr Baruch, as Jeremiah yn phadeyr: agh ren y Chiarn ad y cheiltyn.

²⁷ Eisht haink goo yn Chiarn gys Jeremiah; (erreish da’n ree v’er lostey yn lioar, as ny goan scrieu Baruch veih beeal Yeremiah,) gra,

²⁸ Gow reesht lioar elley, as scrieu ayn ooilley ny goan va roïe ayns y chied lioar, ta Jehoiakim ree Yudah er lostey.

²⁹ As nee oo gra rish Jehoiakim ree Yudah, Shoh goan y Chiarn, T’ou uss er lostey yn lioar shoh, gra, Cre shoh t’ou er scrieu ayn, gra, Hig ree Vabylon son shickyrys as yn cheer shoh y stroie, as cha vaag eh ayn dooinney ny baagh?

³⁰ Shen-y-fa myr shoh ta’n Chiarn dy ghra mychione Jehoiakim ree Yudah, Cha bee dooinney echey dy hoie er stoyl-reeoil Ghavid; as bee yn corp marroo echey tilgit magh ’sy laa gys y chiass, as ’syn oie gys y rio.

³¹ As goym’s kerraghey ersyn, as er e luight, as er e vooinjer, son y vee-chairys oc; as ver-ym lhiam orroosyn, as er cummaltee Yerusalem, as er deiney Yudah, ooilley ny huilk ta mish er n’ockley magh nyn ’oï: agh cha dug ad geill.

³² Eisht ghow Jeremiah lioar elley, as hug eh da Baruch yn scrudeyr eh, mac Neriah; ren scrieu ayn veih beeal Yeremiah, ooilley ny goan va ’sy lioar va Jehoiakim ree Yudah er lostey ’syn aile: as va currit huc mâroo shen ymmodee goan elley jeh’n vree cheddin.