Jeremiah 35 - Yn Vible Casherick 1775 1819

CAB. XXXV

¹ Yn goo haink gys Jeremiah veih’n Chiarn, rish lhing Yehoiakim mac Yosiah ree Yudah, gra,

² Immee gys thie ny Rechabiteyn, as loayr roo, as cur lhiat stiagh ad gys thie yn Chiarn, gys unnane jeh ny shamyryn, as cur daue feeyn dy iu.

³ Eisht ghow mee Jaaziniah, mac Yeremiah, mac Habaziniah, as e vraaraghyn, as ooilley e vec, as slane kynney ny Rechabiteyn;

⁴ As hug mee lhiam stiagh ad gys thie yn Chiarn, gys shamyr mec Hanan, mac Igdaliah yn phadeyr, va liorish shamyr ny princeyn, va erskyn shamyr Vaaseiah, mac Shallum, arreyder yn dorrys:

⁵ As hoie mee roish mec kynney ny Rechabiteyn siyn lane feeyn, as cappanyn; as dooyrt mee roo, Iu-jee feeyn.

⁶ Agh dooyrt ad, Cha n’iu mayd veg y feeyn: son doardee Jonadab mac Rechab, nyn ayr, dooin, Cha jean shiu feeyn y iu, shiuish ny nyn mec son dy bragh:

⁷ Chamoo nee shiu thie y hroggal, ny arroo y chuirr, ny soiaghey garey-feeyney, ny freayll veg: agh ooilley nyn laghyn nee shiu cummal ayns cabbaneyn, dy vod ny laghyn eu ve beayn ’sy cheer raad ta shiu nyn yoarreeyn.

⁸ Myr shoh ta shin er ve biallagh da coraa Yonadab mac Rechab nyn ayr, ayns ooilley ny hug eh currym orrin, gyn dy iu feeyn ooilley nyn laghyn, shinyn, ny mraane ain, nyn mec, ny nyn inneenyn;

⁹ Ny dy hroggal thieyn dooin hene dy vaghey ayndoo; chamoo ta ain garey-feeyney, ny magher, ny arroo:

¹⁰ Agh ta shin er chummal ayns cabbaneyn, as er ny ve biallagh, as er n’yannoo cordail rish ooilley ny doardee Jonadab nyn ayr dooin.

¹¹ Agh shen myr ve, tra haink Nebuchadrezzar ree Vabylon seose noi yn cheer, dy dooyrt shin, Tar-jee, as lhig dooin goll gys Jerusalem, er-aggle armee ny Caldeanee, as er-aggle roish armeeyn ny Syrianee. As shoh’n oyr ta shin nish cummal ec Jerusalem.

¹² Eisht haink goo yn Chiarn gys Jeremiah, gra,

¹³ Myr shoh ta Chiarn ny flaunyssee, Jee Israel, dy ghra, Immee as insh da deiney Yudah, as cummaltee Yerusalem, Nagh jean shiu ynsagh y ghoaill dy eaishtagh rish my ghoan? ta’n Chiarn dy ghra.

¹⁴ Ta sarey Yonadab mac Rechab jeant mie, myr doardee eh da e vec, gyn feeyn y iu; son gys y laa jiu cha vel ad giu veg, agh t’ad freayll sarey nyn ayr: ny-yeih ta mish er loayrt riuish, girree dy moghey as loayrt; agh cha dug shiu geill dou.

¹⁵ Ta mee er choyrt hiu myrgeddin ooilley my harvaantyn ny phadeyryn, girree dy moghey as dy choyrt ad, gra, Chyndaa-jee nish dy chooilley ghooinney veih e ghrogh raad, as lhiassee-jee nyn raaidyn, as ny eiyr-jee er jeeghyn joarree dy hirveish ad, as nee shiu cummal ayns y cheer ta mish er choyrt diu hene, as da nyn ayraghyn; agh cha vel shiu er chroymmey nyn gleaysh, ny er n’eaishtagh rhym’s.

¹⁶ Son dy vel cloan Yonadab mac Rechab er chooilleeney sarey nyn ayr, ayns shen doardee eh daue; agh cha vel y pobble shoh er n’eaishtagh rhym’s:

¹⁷ Shen-y-fa shoh myr ta’n Chiarn, Jee ny flaunyssee, Jee Israel, dy ghra, Cur-my-ner, ver-yms lhiam er Judah, as er ooilley cummaltee Yerusalem, ooilley ny huilk ta mee er n’ockley magh nyn ’oï: er-yn-oyr dy vel mee er loayrt roo, agh cha dug ad clashtyn dou; as ta mee er n’eamagh orroo, agh cha vel ad er my reggyrt.

¹⁸ As dooyrt Jeremiah rish kynney ny Rechabiteyn, Shoh myr ta Chiarn ny flaunyssee, Jee Israel, dy ghra, Son dy vel shiuish er ny ve biallagh da sarey Yonadab nyn ayr, as er vreayll ooilley e oardaghyn, as er n’yannoo cordail rish ooilley ny hug eh ayns currym diu;

¹⁹ Shen-y-fa myr shoh ta Chiarn ny armeeyn flaunyssagh, Jee Israel, dy ghra, Cha bee Jonadab mac Rechab laccal dooinney dy hirveish kiongoyrt rhym gys earishyn foddey beayn.