Jeremiah 3 - Yn Vible Casherick 1775 1819

CAB. III

¹ Jir ad, My ta dooinney scarrey rish e ven, as ee dy gholl voish, as cheet dy ve ben da fer elley, jean eh reesht goaill r’ee? nagh bee’n cheer shen fo loght neu-ghlennid? agh t’ou uss er n’yannoo oainjyrys rish maarderagh ny ghaa; ny-yeih chyndaa reesht hym’s, ta’n Chiarn dy ghra.

² Trog seose dty hooillyn gys ny ard-ynnydyn, as fow magh yn boayl raad nagh vel oo er n’yannoo maarderys: er ny raaidyn t’ou er hoie er nyn son, myr yn Arabian lhie cooyl-chlea ’syn aasagh; as t’ou er choyrt y cheer fo broïd lesh dty vaarderys, as dty vee-chraueeaght.

³ Shen-y-fa ta ny frassyn er nyn lhiettal, as cha vel y fliaghey jerrey-bleeaney er jeet; as va eddin streebagh ayd, dob oo nearey y ghoaill.

⁴ Nagh jean oo maghey shoh gaccan hym, gra, M’ayr, she uss leeideilagh my aegid?

⁵ Jean eh e yymmoose y lhiettal son dy bragh? jean eh freayll eh gys y jerrey? Cur-my-ner, t’ou er loayrt as er n’yannoo olk gys rere dty phooar.

⁶ Dooyrt y Chiarn myrgeddin rhym rish lhing Yosiah yn ree, Vel oo er chur tastey da shen ta Israel chooyl-skyrraghtyn er n’yannoo? t’ee er n’gholl seose er dy chooilley lieau ard, as fo dy chooilley villey glass, as ayns shen t’ee er n’yannoo maarderys.

⁷ As dooyrt mee, lurg j’ee v’er n’yannoo ooilley ny reddyn shoh, Chyndaa uss hym’s: agh cha ren ee chyndaa: as honnick yn chuyr foalsey eck Judah shoh.

⁸ As hug mee tastey, lurg dou ve er choyrt ersooyl ee, son ooilley ny oyryn lioroo va Israel chooyl-skyrraghtyn er vrishey poosey, as dy row mee er choyrt jee screeuyn-scarree; ny-yeih cha ren y chuyr foalsey eck Judah aggle y ghoaill, agh hie ish as ren ee maarderys myrgeddin.

⁹ As shen myr ve, trooid an-ghoo e maarderys, dy ren ee yn cheer neu-ghlen, as poosey y vrishey rish jallooyn cloaie as fuygh.

¹⁰ As ny-yeih son ooilley shoh, cha vel y chuyr foalsey eck Judah er hyndaa hym’s lesh e slane cree, agh ayns molteyrys, ta’n Chiarn dy ghra.

¹¹ As dooyrt y Chiarn rhym, Ta Israel vee-viallagh er heyrey ee hene ny smoo na Judah foalsey.

¹² Gow royd, as jean ny goan shoh y ockley magh gys y twoaie, as abbyr, Chyndaa uss reesht, Israel chooyl-skyrraghtyn, ta’n Chiarn dy ghra, as cha lhig-ym da my chorree dy huittym ort; son ta mish myghinagh, ta’n Chiarn dy ghra, as cha jean-ym jymmoose y reayll son dy bragh.

¹³ Ynrycan gow-rish dty vee-chraueeaght, dy vel oo er n’yannoo peccah noi’n Chiarn dty Yee, as er rheynn dty aigney-mie gys joarreeyn fo dy chooilley villey glass, as cha vel shiu er chur biallys da my choraa’s, ta’n Chiarn dy ghra.

¹⁴ Chyndaa-jee, O chloan chooyl-skyrraghtyn, ta’n Chiarn dy ghra, son ta mish poost riuish: as nee’m shiu y ghoaill fer ass ard-valley, as jees ass lught-thie, as ver-ym lhiam shiu gys Zion:

¹⁵ As ver-ym diu bochillyn lurg my chree hene, nee shiu y veaghey lesh tushtey as toiggal.

¹⁶ As hig eh gy-kione, tra vees shiu er nyn mishaghey ayns cloan as cooid ’sy cheer, ayns ny laghyn shen, ta’n Chiarn dy ghra, cha jir ad arragh, Arg conaant y Chiarn; chamoo hig eh gys cooinaghtyn, chamoo smooinee ad er, chamoo nee ad taaghey eh, chamoo hed soiaghey sodjey er jannoo jeh.

¹⁷ Ec y traa shen nee ad genmys Jerusalem stoyl-reeoil y Chiarn; as bee dy chooilley ashoon er ny haglym stiagh ayn, gys ennym y Chiarn, ayns Jerusalem: chamoo nee ad geiyrt ny-sodjey lurg smooinaghtyn yn chree roonagh oc hene.

¹⁸ Ayns ny laghyn shen nee thie Yudah gimmeeaght marish thie Israel, as hig ad cooidjagh ass cheer y twoaie gys y cheer ta mee er choyrt son eiraght da nyn ayraghyn.

¹⁹ Agh dooyrt mee, Kys nee’m uss y ghoaill mastey’n chloan, as cheer aalin y choyrt dhyt, eiraght ooasle ayns ymmodee ashoonyn? As dooyrt mee, Nee oo mish y enmys, My ayr! as cha jean oo chyndaa ersooyl voym.

²⁰ Son shickyrys myr ta ben-phoost dy foalsey treigeil e sheshey, myr shen ta shiuish er ghellal dy foalsey rhym’s, O hie Israel, ta’n Chiarn dy ghra.

²¹ Va coraa er ny chlashtyn er ny ard-ynnydyn, dobberan as keayney cloan Israel: son t’ad er hyndaa voym’s, as er yarrood yn Chiarn nyn Yee.

²² Chyndaa-jee reesht, shiuish chloan chooyl-skyrraghtyn, as neem’s nyn skyrraghtyn y leih diu. Cur-my-ner, ta shin cheet hood’s; son she uss y Chiarn yn Jee ain.

²³ Dy firrinagh ayns fardail ta shin jeeaghyn son saualtys veih ny croink, as son kemmyrk veih niart ny sleityn; dy firrinagh ayns y Chiarn nyn Yee ta saualtys Israel.

²⁴ Son ta’n scammylt er stroie laboraght nyn ayraghyn veih nyn aegid; nyn shioltaneyn kirree as ollagh, nyn mec as nyn inneenyn.

²⁵ Ta shin lhie sheese ayns nyn nearey, as ta nyn sou-aigney dy laadey shin: son ta shin er n’yannoo peccah noi’n Chiarn nyn Yee, shin hene as nyn ayraghyn, veih nyn aegid eer gys y laa jiu, as cha vel shin er choyrt biallys da coraa yn Chiarn y Jee ain.