Jeremiah 27 - Yn Vible Casherick 1775 1819

CAB. XXVII

¹ Ayns toshiaght reill Zedekiah mac Yosiah, ree Yudah, haink yn goo shoh gys Jeremiah veih’n Chiarn, gra,

² Myr shoh ta’n Chiarn dy ghra rhym, Jean dhyt hene geulaghyn as quingyn, as cur ad mysh dty wannal.

³ As jean ad y choyrt gys ree Edom, as gys ree Voab, as ree ny Ammoniteyn, as ree Tyrus, as gys ree Zidon, liorish laue ny chaghteryn ta cheet gys Jerusalem gys Zedekiah ree Yudah;

⁴ As cur sarey daue dy ghra rish nyn mainshtyryn, Myr shoh ta Chiarn ny sheshaghtyn flaunyssagh, Jee Israel, dy ghra, Shoh myr nee shiu gra rish ny mainshtyryn eu;

⁵ Mish ta er chroo yn thalloo, yn dooinney as y baagh ta er yn ooir, liorish my phooar ooilley-niartal, as my roih sheeynt magh, as ta mee er choyrt eh da quoi-erbee saillym.

⁶ As nish ta mee er choyrt ooilley ny cheeraghyn shoh gys laue Nebuchadnezzar ree Vabylon, my harvaant; as beïyn y vagher ta mee er choyrt da myrgeddin dy hirveish eh.

⁷ As nee dy chooilley ashoon eshyn y hirveish, as e vac, as y mac echeysyn, derrey hig eer traa yn cheer echeysyn mygeayrt; as eisht bee ymmodee ashoonyn as reeaghyn mooarey shirveishit liorishyn.

⁸ As hig eh gy-kione, yn ashoon as yn reeriaght nagh jean shirveish Nebuchadnezzar cheddin ree Vabylon, as nagh der nyn mwannal fo quing ree Vabylon, yn ashoon shen neem’s smaghtaghey, ta’n Chiarn dy ghra, lesh y chliwe, as lesh y ghortey, as lesh y chramp, derrey veem’s er stroie ad liorish y laue echeysyn.

⁹ Shen-y-fa ny cur-jee geill da ny phadeyryn eu, ny da ny fallogyssee, ny da ny ashleyderyn, ny da ny druaiaghtee, ny da ny fir-obbee eu, ta loayrt riu, gra, Cha jean shiu shirveish ree Vabylon.

¹⁰ Son t’ad phadeyrys breg diuish, dy scughey shiu foddey veih’n cheer eu hene; as mish dy eiyrt shiu magh, as shiuish dy herraghtyn.

¹¹ Agh ny ashoonyn ta coyrt nyn mwannal fo quing ree Vabylon, as dy hirveish eh, adsyn faag-yms er-mayrn ayns y cheer oc hene, ta’n Chiarn dy ghra; as nee ad laboraght as cummal ayn.

¹² Loayr mee neesht rish Zedekiah ree Yudah cordail rish ooilley ny goan shoh, gra, Cur-jee nyn mwannal fo quing ree Vabylon, as shirveish-jee eh as e phobble, as bee-jee bio beayn.

¹³ Cre’n-fa yinnagh shiu cherraghtyn, uss as dty phobble, liorish y chliwe, lesh y ghortey, as y chramp, myr ta’n Chiarn er loayrt noi’n ashoon ta gobbal shirveish ree Vabylon?

¹⁴ Er-y-fa shen ny eaisht-jee rish goan ny phadeyryn ta loayrt riu, Cha jean-jee shirveish ree Vabylon: son t’ad jannoo phadeyrys foalsey riu.

¹⁵ Son cha vel mish er choyrt ad, ta’n Chiarn dy ghra, ny-yeih t’ad phadeyrys breg ayns my ennym, mish dy eiyrt magh shin, as shiuish dy gholl naardey, marish ny phadeyryn ta dy adeyrys diuish.

¹⁶ Loayr mee myrgeddin rish ny saggyrtyn, as rish ooilley’n pobble shoh, gra, Myr shoh ta’n Chiarn dy ghra, Ny cur-jee geill da goan ny phadeyryn eu, ta phadeyrys diu, gra, Cur-my-ner, bee siyn thie yn Chiarn dy gerrit currit back reesht veih Babylon: son t’ad phadeyrys breg diu.

¹⁷ Ny cur-jee geill daue: shirveish-jee ree Vabylon, as bee-jee bio: cre’n-fa veagh yn ard-valley shoh currit naardey?

¹⁸ Agh my she phadeyryn ad, as my ta goo yn Chiarn mâroo, lhig daue nish guee gys Chiarn ny sheshaghtyn flaunyssagh, nagh jed ny siyn gys Babylon ta faagit ayns thie yn Chiarn, as ayns thie ree Yudah, as ec Jerusalem.

¹⁹ Son myr shoh ta Chiarn dy heshaght flaunys gra mychione ny pillaryn, as yn aarkey prashey, as mychione ny binkyn, as mychione y chooid elley jeh ny siyn ta er-mayrn ’syn ard-valley shoh,

²⁰ Nagh ren Nebuchadnezzar ree Vabylon y ghoaill, tra hug eh lesh ersooyl nyn gappee Jeconiah mac Yehoiakim ree Yudah, veih Jerusalem gys Babylon, as ooilley deiney ooasle Yudah as Yerusalem:

²¹ Dy feer, myr shoh ta Chiarn ny flaunyssee, Jee Israel, dy ghra, mychione ny siyn ta er-mayrn ayns thie yn Chiarn, as ayns thie ree Yudah as Yerusalem;

²² Bee ad currit lhieu ersooyl gys Babylon, as bee ad ayns shen derrey’n laa jeeagh-yms orroo, ta’n Chiarn dy ghra: eisht ver-yms lhiam seose ad, as nee’m ad y hoiaghey reesht ’syn ynnyd shoh.