Jeremiah 25 - Yn Vible Casherick 1775 1819

CAB. XXV

¹ Yn goo haink gys Jeremiah mychione ooilley phobble Yudah, ayns y chiarroo vleïn jeh Jehoiakim mac Yosiah ree Yudah, shen va yn chied vleïn jeh Nebuchadrezzar ree Vabylon;

² Shen loayr Jeremiah yn phadeyr rish ooilley pobble Yudah, as ooilley cummaltee Yerusalem, gra,

³ Veih’n trass vleïn jeig dy Yosiah mac Amon ree Yudah, eer gys y laa jiu, (ta shen y trass vleïn as feed,) ta goo yn Chiarn er ny ve cheet hym, as ta mee er ve loayrt riu, girree dy moghey as loayrt; agh cha vel shiu er n’eaishtagh.

⁴ As ta’n Chiarn er choyrt hiu ooilley e harvaantyn ny phadeyryn, girree dy moghey as coyrt magh ad; agh cha vel shiuish er n’eaishtagh, ny er chroymmey nyn gleaysh dy chlashtyn.

⁵ Dooyrt adsyn, Chyndaa-jee reesht nish dy chooilley ghooinney veih e raad mee-chrauee, as veih nyn ghrogh-yannoo, as jean-jee cummal ’sy cheer hug y Chiarn diuish, as da nyn ayraghyn, veih sheeloghe gys sheeloghe:

⁶ As ny eiyr-jee er jeeghyn joarree, dy hirveish ad, as dy chur ooashley daue, as ny jean-jee mish y vrasnaghey gys corree, lesh obbraghyn nyn laueyn; as voym’s cha jig skielley diu.

⁷ Ny-yeih cha vel shiu er n’eaishtagh rhym, ta’n Chiarn dy ghra; myr shoh dy ghreinnaghey my yymmoose lesh obbraghyn nyn laueyn gys y choayl eu hene.

⁸ Shen-y-fa myr shoh ta Chiarn ny flaunyssee dy ghra, Er-yn-oyr nagh vel shiu er n’eaishtagh rish my ghoan’s,

⁹ Cur-my-ner, ver-ym fys as goym ooilley ashoonyn y twoaie, ta’n Chiarn dy ghra, as Nebuchadrezzar ree Vabylon my harvaant, as ver-ym lhiam ad noi yn cheer shoh, as noi ny cummaltee eck, as noi ooilley ny cheeraghyn shoh ta mygeayrt-y-mood, as stroie-ym ad ooilley, as nee’m ad dy ve son atchim, as son oltooan, as son traartys foddey-beayn.

¹⁰ Ny sodjey, ver-ym ny host yn kiaull dy voggey, as yn kiaull dy vingys, coraa yn dooinney-poosee, as coraa ben y phoosee, feiyr ny claghyn-mwyllin, as soilshey yn chainle.

¹¹ As bee yn slane cheer ny aasagh, as ny atchim; as nee ny ashoonyn shoh shirveish ree Vabylon three-feed bleïn as jeih.

¹² As shen myr vees eh, ec kione three-feed bleïn as jeih, dy jean-yms ree Vabylon, as y cheer shen, y cherraghey, eer cheer ny Caldeanee, ta’n Chiarn dy ghra, son nyn mee-chairys, as bee eh ny hraartys foddey-beayn.

¹³ As cooilleen-yms er y cheer shen ooilley my ghoan ta mee er n’ockley magh n’oï, eer ooilley ny ta scruit ’sy lioar shoh, myr ta Jeremiah er phadeyrys noi ooilley ny ashoonyn cheddin.

¹⁴ Son nee ymmodee ashoonyn mooarey, as reeaghyn pooaral shirveish adsyn er yn aght cheddin: as neem’s ad y chooilleeney cordail rish nyn yannoo, as cordail rish obbyr ny laueyn oc hene.

¹⁵ Son myr shoh ta’n Chiarn, Jee Israel, dy ghra rhym, Gow veih my laue cappan-feeyney yn eulys shoh, as lhig da ooilley ny ashoonyn hucsyn ta mee dy choyrt oo giu jeh.

¹⁶ As nee ad giu, as bee ad er-meshtey as baanrit, kyndagh rish yn chliwe ver-yms magh ny mast’ oc.

¹⁷ Eisht ghow mee yn cappan veih laue yn Chiarn, as hug mee er ooilley ny ashoonyn dy iu, hucsyn va’n Chiarn er choyrt mee:

¹⁸ Ta shen dy ghra, Jerusalem, as ard-valjyn Yudah, as nyn reeaghyn, as nyn brinceyn, dy yannoo ad ny hraartys, as ny atchim, son flout, as faghid, as mollaght; (myr te ec y laa t’ayn jiu;)

¹⁹ Pharaoh ree Egypt, as e hirveishee, as e phrinceyn, as ooilley e phobble.

²⁰ As slane shiartanse ny ashoonyn-quaagh as joarree, as ooilley reeaghyn thalloo Uz, as ooilley reeaghyn thalloo ny Philistinee, as Ashkelon, as Azzah, as Ekron, as fooilliagh Ashdod,

²¹ Edom, as Moab, as cloan Ammon,

²² As ooilley reeaghyn Tyre, as ooilley reeaghyn Zidon, as reeaghyn ny ellanyn cheu elley jeh’n aarkey,

²³ Dedan, as Tema, as Buz, as ooilley ny ta ayns ny corneilyn sodjey magh,

²⁴ As ooilley reeaghyn Arabia, as ooilley reeaghyn yn ymmodee pobble ta cummal ’syn aasagh,

²⁵ As ooilley reeaghyn Zimri, as ooilley reeaghyn Elam, as ooilley reeaghyn ny Medeyn,

²⁶ As ooilley reeaghyn y twoaie, foddey as gerrit, ooilley dy cheilley, as ooilley reeriaghtyn y theihll, ta er eaghtyr y thallooin; as nee ree Sheshach giu geiyrt orroo.

²⁷ Shen-y-fa jir oo roo, Myr shoh ta Chiarn ny sheshaghtyn flaunyssagh, Jee Israel, dy ghra, Iu-jee, as bee-jee er-meshtey, as jean-jee tilgey as tuittym, as ny irree-jee arragh, kyndagh rish y chliwe ver-yms ny mast’ eu.

²⁸ As my obbys ad goaill y cappan veih dty laue dy iu, eisht jir uss roo, Myr shoh ta Chiarn ny sheshaghtyn flaunyssagh dy ghra, Shegin diu son shickyrys giu.

²⁹ Son cur-my-ner, ta mee kiarail kerraghey son yn ard-valley ta enmyssit orrym’s, as jed shiuish gyn kerraghey erbee? Cha jed shiu gyn kerraghey; son ver-yms eam da’n chliwe dy gholl magh noi ooilley cummaltee yn ooir, ta Chiarn ny sheshaghtyn flaunyssagh dy ghra.

³⁰ Shen-y-fa nee oo phadeyrys ooilley ny goan shoh nyn ’oï, as gra roo, Nee’n Chiarn gyllaghey veih’n yrjid, as fockley-magh e choraa veih e chummal casherick; ver eh magh yllaghey atchimagh er e chummal; troggee eh seose e choraa noi ooilley cummaltee yn thallooin, myr adsyn ta broo ny messyn-feeyney.

³¹ Hig feiyr gys eer ardjyn sodjey magh yn ooir; son ta cooish ec y Chiarn rish ny ashoonyn; nee eh e chooish hene y ghoaill seose noi dy chooilley vac dooinney; faagee eh magh ny mee-chrauee gys y chliwe, ta’n Chiarn dy ghra.

³² Shoh myr ta Chiarn ny sheshaghtyn flaunyssagh dy ghra, Cur-my-ner, hed yn olk magh veih ashoon gys ashoon, as bee geay vooar chassee er ny hroggal veih ardjyn ny hooirey.

³³ As bee merriu yn Chiarn ec y laa shen veih kione dy kione ny hooirey: cha bee dobberan jeant harrystoo, chamoo hed ad er jaglym, ny er n’oanluckey; agh bee ad myr eoylley er y thalloo.

³⁴ Gull-jee, shiuish vochillyn, as keayn-jee; as seiy-jee shiu hene ’sy joan, shiuish leeideilee y chioltane: son ta laghyn nyn stroie as nyn scaalhean er jeet mygeayrt; as tuittee shiu ayns peeshyn myr saagh craie costal.

³⁵ As cha bee saase ec ny bochillyn dy chosney roue, ny ard-vooinjer y chioltane dy scapail.

³⁶ Bee eam keayney ny bochillyn, as yllaghey leeideilee yn chioltane, er ny chlashtyn: son ta’n Chiarn er chur naardey nyn aber.

³⁷ As ta ny ynnydyn-vaghee sheeoil lhieggit trooid jymmoose eulyssagh y Chiarn.

³⁸ T’eh er jeet magh ass e ooig, myr lion: son ta’n cheer oc follym-faase, kyndagh rish dewilys yn tranlaasagh, as eulys e yymmoose.