Jeremiah 24 - Yn Vible Casherick 1775 1819

CAB. XXIV

¹ As yeeagh y Chiarn dou, as cur-my-ner, va daa vaskad dy figgyn nyn lhie roish chiamble y Chiarn, lurg da Nebuchadrezzar ree Vabylon v’er chur lesh ersooyl ayns cappeeys Jeconiah mac Yehoiakim ree Yudah, as princeyn Yudah, marish ny seyir as ny gaauenyn, veih Jerusalem, as er choyrt lesh ad gys Babylon.

² Va ’sy derrey vaskad figgyn feer vie, eer casley rish figgyn appee yn vess toshee; as va ’sy vaskad elley figgyn feer olk, nagh voddagh ve eeit, v’ad cha loau shen.

³ Eisht dooyrt y Chiarn rhym, Cre t’ou fakin, Yeremiah? As dreggyr mee, Figgyn; ny figgyn mie, feer vie; as yn olk, feer olk, nagh vod ve eeit, t’ad cha olk shen.

⁴ Reesht haink goo yn Chiarn hym, gra.

⁵ Myr shoh ta’n Chiarn, Jee Israel, dy ghra, Casley rish ny figgyn mie shoh, myr shen goym’s roosyn dy Yudah ta er n’gholl ayns cappeeys; adsyn ta mee er choyrt magh ass yn ynnyd shoh gys cheer ny Caldeanee son foays daue.

⁶ Son nee’m my hooillyn y hoiaghey orroo son mie, as ver-ym lhiam reesht ad gys y cheer shoh; as nee’m troggal seose ad, as cha jean-ym ad y lhieggal; as nee’m soiaghey ad, as cha jean-ym ad y astyrt ass ny fraueyn.

⁷ As ver-ym daue cree dy chur enney orrym’s, dy nee mish y Chiarn; as bee adsyn y pobble aym’s, as beem’s yn Jee ocsyn: son nee ad chyndaa reesht hym’s lesh nyn slane cree.

⁸ As myr ny drogh figgyn, nagh vel son ee, t’ad cha olk shen; (son shickyrys myr shoh ta’n Chiarn dy ghra,) Myr shen livrey-yms Zedekiah ree Yudah, as e phrinceyn, as fooilliagh Yerusalem ta faagit ’sy cheer shoh, as adsyn ta cummal ayns cheer Egypt;

⁹ As livrey-ym seose ad dy v’er nyn skeayley gys ooilley reeriaghtyn y thallooin, son nyn assee, dy ve son oltooan, as an-ghoo, as flout, as mollaght, dy chooilley raad nee’m geiyrt ad.

¹⁰ As ver-ym yn cliwe, yn ghortey, as y chramp, ny mast’ oc, derrey vees kione orroo ’sy cheer hug mee dauesyn as da nyn ayraghyn.