Jeremiah 22 - Yn Vible Casherick 1775 1819

CAB. XXII

¹ Myr shoh ta’n Chiarn dy ghra, Immee sheese gys thie ree Yudah, as loayr ayns shen ny goan shoh,

² As abbyr, Clasht rish goo yn Chiarn, O ree Yudah, ta dty hoie er stoyl-reeoil Ghavid, uss, as dty harvaantyn, as dty phobble ta goll stiagh er ny giattyn shoh;

³ Myr shoh ta’n Chiarn dy ghra, Shirveish-jee briwnys cairagh as jeeragh, as livrey-jee eshyn ta tranlaasit veih laue yn tranlaasagh: as ny jean-jee aggair, ny tranlaase erbee er y joarree, yn lhiannoo gyn ayr, ny’n ven-treoghe, chamoo jean-jee fuill gyn-loght y gheayrtey ’syn ynnyd shoh.

⁴ Son dy firrinagh my nee shiu er yn aght shoh, eisht hed stiagh er giattyn y thie shoh reeaghyn, soie er stoyl-reeoil Ghavid, markiagh ayns fainee as er cabbil, eh-hene, as e harvaantyn, as e phobble.

⁵ Agh mannagh n’eaisht shiu rish ny goan shoh, Ta mee breearrey liorym pene, ta’n Chiarn dy ghra, dy bee’n thie shoh ny hraartys.

⁶ Son myr shoh ta’n Chiarn dy ghra rish thie ree Yudah, T’ou uss Gilead dooys, as mullagh Lebanon: ny-yeih son shickyrys neem’s faasagh y yannoo jeed, as ard-valjyn gyn cummaltee.

⁷ As ver-ym stroideryn dt’oï, dy chooilley unnane lesh e ghreinyn; as giaree ad sheese dty reih biljyn-cedar, as tilgee ad ’syn aile ad.

⁸ As hed ymmodee ashoonyn shaghey yn ard-valley shoh, as jir ad dagh dooinney rish e naboo, Cre’n-fa ta’n Chiarn er n’yannoo myr shoh rish yn ard-valley mooar shoh?

⁹ Eisht nee ad freggyrt, Er-yn-oyr dy vel ad er hreigeil conaant y Chiarn nyn Yee, as dy dug ad ooashley da jeeghyn joarree, as shirveish ad.

¹⁰ Ny keayn-jee son y varroo, chamoo bee-jee ayns trimshey er e hon; agh jean-jee dobberan sharroo er e hon-syn ta goll ersooyl: son cha jig eh arragh thie, chamoo ver eh my-ner cheer e ghooghys.

¹¹ Son shoh myr ta’n Chiarn dy ghra mychione Shallum mac Yosiah, ree Yudah, ren reill lurg Josiah e ayr, as hie magh ass yn ynnyd shoh, Cha jig eh dy bragh gys y voayl shoh arragh:

¹² Agh yiow eh baase ayns cheer e chappeeys, as y cheer shoh cha jean eh fakin arragh.

¹³ Smerg dasyn ta troggal e hie liorish molteyrys, as e hiamyryn liorish aggair; ta goaill obbyr e naboo fegooish faill, as nagh vel cur da leagh e laboraght;

¹⁴ Ta gra, Trog-ym dou hene thie mooar, as shamyryn lhean; ta cummey magh da hene uinniagyn; as te ceilit lesh cedar, as paintit lesh vermilion!

¹⁵ Vel oo smooinaghtyn dy bee dty reill’s foddey beayn er-yn-oyr dy vel oo coodaghey oo hene ayns cedar? Nagh ren dty ayr gee as giu, as nagh ren eh cormal briwnys as cairys, as eisht ve dy mie mârish?

¹⁶ Ren eh briwnys cooish yn voght, as yn ymmyrchagh; eisht haink eh dy mie lesh: nagh row shoh son dy bione da mish? ta’n Chiarn dy ghra.

¹⁷ Agh cha vel dty hooillyn’s as dty chree’s agh ooilley son saynt, as son deayrtey fuill gyn-loght, as son dewilys, as son tranlaase, dy yannoo eh.

¹⁸ Shen-y-fa myr shoh ta’n Chiarn dy ghra mychione Jehoiakim mac Yosiah ree Yudah, Cha jean ad dobberan er e hon, gra, Ah treih my vraar! ny, Ah treih my huyr! cha jean ad dobberan er e hon, gra, Ah treih hiarn! ny, Ah treih e ghloyr!

¹⁹ Agh hed eh er oanluckey lesh oanluckey assyl, sleaydit as tilgit magh cheu-mooie jeh giattyn Yerusalem.

²⁰ Immee seose er Lebanon, as cur eam; trog seose dty choraa ayns Bashan, as yllee veih ny raaidyn taaghit: son ta ooilley dty chaarjyn graihagh er n’gholl naardey.

²¹ Loayr mee rhyt ayns dty vaynrys: agh dooyrt oo, Cha jean-ym geaishtagh: shoh va dty chliaghtey veih dty aegid, nagh dug oo biallys da my choraa.

²² Nee’n gheay sheebey ersooyl ooilley dty vochillyn, as hed dty chaarjyn graihagh roue ayns cappeeys: shickyr eisht bee oo coodit lesh nearey as atchim son ooilley dty vee-chraueeaght.

²³ O chummaltagh Lebanon, ta jannoo dty edd ayns ny biljyn-cedar, kys nee oo gaccan tra hig pianyn ort, angaish myr t’ec ben er-troailt!

²⁴ Myr s’bio mee, ta’n Chiarn dy ghra, ga dy beagh Coniah mac Yehoiakim ree Yudah yn cowrey er my laue yesh, foast yinnin oo y raipey veih shen;

²⁵ As livrey-ym oo seose gys y laue ocsyn ta shirrey dty vioys, as gys y laue ocsyn ta aggle ort roish yn eddin oc, eer gys laue Nebuchadrezzar ree Vabylon, as gys laue ny Caldeanee.

²⁶ As neem’s oo y hilgey magh, as dty voir ren dty ymmyrkey, gys cheer yoarree, raad nagh ruggyr shiu; as ayns shen yiow shiu baase.

²⁷ Agh gys y cheer raad va nyn yeearree dy hyndaa, cha jig ad arragh.

²⁸ Vel y dooinney shoh Coniah ny yalloo brisht tilgit ry-lhiattee? nee saagh brisht eh nagh vel gys veg yn ymmyd; dy vel ad tilgit magh, eshyn as e luight, as ceaut stiagh ayns cheer quaagh daue?

²⁹ O ooir, ooir, ooir, clasht rish goo yn Chiarn:

³⁰ Myr shoh ta’n Chiarn dy ghra, scrieu-jee sheese yn dooinney shoh gyn sluight, dooinney nagh jean bishaghey ayns e laghyn: son cha jean fer hene jeh e luight bishaghey, dy hoie er stoyl-reeoil Ghavid, ny dy reill arragh ayns Judah.