Jeremiah 21 - Yn Vible Casherick 1775 1819

CAB. XXI

¹ Yn goo haink gys Jeremiah veih’n Chiarn, tra hug ree Zedekiah er chaghteraght huggey Pashur mac Velchiah, as Zephaniah mac Vaaseiah yn saggyrt, gra,

² Jean briaght, ta mee guee ort, jeh’n Chiarn er y hon ain; son ta Nebuchadrezzar ree Vabylon caggey nyn ’oï; my she shen dy jean y Chiarn dellal rooin cordail rish ooilley e obbraghyn yindyssagh, as eh y chastey.

³ Eisht dooyrt Jeremiah roo, Shoh myr nee shiu gra rish Zedekiah,

⁴ Myr shoh ta’n Chiarn Jee Israel dy ghra, Cur-my-ner, chyndaa-ym ny greinyn-caggee t’ayns ny laueyn enish, lhieu ta shiu caggey noi ree Vabylon, as noi ny Caldeanee, ta chionney shiu stiagh lesh caggey cheu-mooie nyn voallaghyn, as nee’m ad y haglym gys mean yn ard-valley shoh.

⁵ As neem’s mee hene caggey nyn ’oï lesh laue sheeynt magh, as lesh roih niartal, eer ayns corree, as ayns elgys, as ayns jymmoose dewil.

⁶ As bwoaill-yms cummaltee yn ard-valley shoh, chammah dooinney as baagh; yiow ad baase liorish cragh paittoil.

⁷ As ny lurg shen, ta’n Chiarn dy ghra, neem’s Zedekiah ree Yudah, as e harvaantyn, as e phobble, as fooilliagh y chramp ’syn ard-valley shoh, as ny ta faagit veih’n chliwe, as veih’n ghortey, y livrey gys laue Nebuchadrezzar ree Vabylon, as gys laue nyn noidyn, as gys y laue ocsyn ta shirrey nyn mioys: as nee eh ad y woalley lesh foyr y chliwe; cha jean eh foayr y yeeaghyn daue, chamoo vees chymmey ny myghin echey orroo.

⁸ As rish y pobble shoh nee oo gra, Shoh myr ta’n Chiarn dy ghra; Cur-my-ner, ta mee soiaghey kiongoyrt riu raad y vea, as raad y vaaish.

⁹ Eshyn ta fuirriaghtyn ’syn ard-valley shoh, yiow eh baase lesh y chliwe, as lesh y ghortey, as lesh y chramp: agh eshyn hed magh, as livrey-ys seose eh-hene gys ny Caldeanee ta chionney stiagh shiu, bee eh bio, as bee e vioys son cosney da.

¹⁰ Son ta mee er hoiaghey m’eddin noi’n ard-valley shoh, son olk, as cha nee son mie, ta’n Chiarn dy ghra; bee eh er ny livrey gys laue ree Vabylon, as loshtee eshyn eh lesh aile.

¹¹ As mychione thie ree Yudah, abbyr, Clasht-jee goo yn Chiarn;

¹² O hie Ghavid, myr shoh ta’n Chiarn dy ghra, Cur-jee briwnys cairagh ’sy voghrey, as livrey-jee eshyn ta tranlaasit ass laue yn tranlaasagh, er-aggle dy jed m’eulys magh myr aile, as lostey nagh vod unnane erbee y vooghey eh, kyndagh rish olkys nyn ghrogh-yannoo.

¹³ Cur-my-ner, ta mish dt’oï’s, O chummaltagh ny glionney, as carrick yn thalloo injil, ta’n Chiarn dy ghra; ayd ta’n raa shoh, Quoi hig sheese nyn ’oï? ny quoi s’loys cheet stiagh er ny ynnydyn-vaghee ain?

¹⁴ Agh neem’s shiu y smaghtaghey cordail rish mess nyn obbraghyn, ta’n Chiarn dy ghra: as nee’m aile y oaddey ’sy cheyll echey, as nee eh stroie dy chooilley nhee mygeayrt-y-mysh.