Jeremiah 13 - Yn Vible Casherick 1775 1819

CAB. XIII

¹ Myr shoh ta’n Chiarn dy ghra rhym, Gow royd as fow dhyt hene cryss aanrit, as cur mish dty vean eh, as ny cur eh ayns ushtey.

² Er shen hooar mee cryss, cordail rish goo yn Chiarn, as hug mee eh mysh my vean.

³ As haink goo yn Chiarn hym yn nah cheayrt, gra,

⁴ Gow yn cryss shen t’ayd, ta mysh dty veeghyn, as trog ort, immee gys Euphrates, as follee eh ayns shen ayns towl fo’n chreg.

⁵ Er shen hie mee, as dollee mee eh rish oirr Euphrates, myr va’n Chiarn er my harey.

⁶ As shen myr ve, lurg ymmodee laghyn, dy dooyrt y Chiarn rhym, Trog ort, immee gys Euphrates, as gow veih shen y cryss, doardee mee dhyt dy ollaghey ayns shen.

⁷ Eisht hie mee gys Euphrates, as chleiy mee, as ghow mee yn cryss veih’n boayl raad dollee mee eh; as cur-my-ner, va’n cryss loau, cha beeagh eh veg.

⁸ Eisht haink goo yn Chiarn hym, gra,

⁹ Myr shoh ta’n Chiarn dy ghra, Er yn aght shoh ver-yms naardey moyrn Yudah, as mooaralys Yerusalem.

¹⁰ Bee yn pobble mee-chrauee shoh, ta gobbal dy eaishtagh rish my ghoan, ta gimmeeaght ayns roonid nyn gree hene, as geiyrt er jeeghyn elley dy hirveish ad, as dy chur ooashley daue, bee ad eer myr y cryss shoh, nagh nieeagh veg.

¹¹ Son myr ta’n cryss er ny hionney mysh corp dooinney, myr shen hug mee er slane thie Israel, as slane thie Yudah, dy ve er ny hionney hym’s, ta’n Chiarn dy ghra; dy ve dooys son pobble, as son ennym, as son moylley, as son gloyr: agh cha n’eaishtagh ad rhym.

¹² Shen-y-fa nee oo loayrt roo ny goan shoh, Myr shoh ta’n Chiarn Jee Israel dy ghra, Bee dy chooilley voteil er ny lhieeney lesh feeyn; as jir adsyn rhyt, Nagh vel fys ain hene son shickyrys dy bee dy chooilley voteil er ny lhieeney lesh feeyn?

¹³ Eisht jir oo roo, Myr shoh ta’n Chiarn dy ghra, Cur-my-ner, lhieen-yms ooilley cummaltee yn cheer shoh, eer ny reeaghyn ta soie er stoyl-reeoil Ghavid, as ny saggyrtyn, as ny phadeyryn, as ooilley cummaltee Yerusalem, lesh meshtallys.

¹⁴ As scoltee-ym ad yn derrey yeh noi’n jeh elley, eer ny ayraghyn as ny mec ry-cheilley, ta’n Chiarn dy ghra; cha jean-ym chymmey, ny foayr, ny myghin y yeeaghyn, agh nee’m ad y stroie.

¹⁵ Clasht-jee, as cur-jee geill, ny bee-jee mooaralagh: son ta’n Chiarn er loayrt.

¹⁶ Cur-jee gloyr da’n Chiarn nyn Yee, roish my der eh dorraghys, as roish my nee ny cassyn eu snapperal er ny sleityn dorraghey, as choud’s ta shiu jeeaghyn son soilshey, dy jyndaa eh shen gys scadoo yn vaaish, as dy bee eh er ny chaghlaa gys dorraghys dullyr.

¹⁷ Agh mannagh n’eaisht shiu rish, nee m’annym’s dobberan ayns ynnydyn follit son y voyrn eu, as nee my hooill’s keayney dy sharroo, as roie sheese lesh jeïr, er-yn-oyr dy vel shioltane y Chiarn goit ersooyl ayns cappeeys.

¹⁸ Abbyr rish y ree as y ven-reïn, Cur-jee veue nyn moyrn, soie-jee sheese dy injil; son bee ny rheamyn eu currit sheese, eer attey nyn ghloyr.

¹⁹ Bee ard-valjyn y jiass dooint seose, as cha jean fer erbee ad y osley; bee ooilley Judah goit ersooyl ayns cappeeys, bee eh dy bollagh er ny ghoaill.

²⁰ Trog-jee seose nyn sooillyn, as cur-jee my-ner adsyn ta cheet veih’n twoaie; cre vel y chioltane va er dty churrym, eer dty hioltane aalin?

²¹ Cre jir oo tra nee eh dty cherraghey? (son t’ou er n’ynsaghey ad dy ve nyn gaptanyn, as dy reill harryd;) nagh jean trimshey oo y ghreimmey, myr ben er-troailt?

²² As my jir oo ayns dty chree, Cre’n-fa ta ny reddyn shoh cheet orrym? Son mooadys dty vee-chairys ta dty nearey ry-akin, as dty voynyn er nyn roostey.

²³ Vod yn Ethiopian daah e chrackan y chaghlaa, ny’n leopard e spuitt? eisht foddee shiuish myrgeddin jannoo dy mie, t’er chliaghtey dy chur-rish olk.

²⁴ Shen-y-fa nee’m ad y skeayley myr coau t’er ny heebey ersooyl lesh geay yn aasagh.

²⁵ Shoh dty chronney, yn ayrn eiraght t’ad voym’s, ta’n Chiarn dy ghra; er-y-fa dy vel oo er my yarrood, as er choyrt dty varrant er fardalys.

²⁶ Shen-y-fa neem’s rumbyllyn dty choamrey y hroggal er dty eddin, dy vod dty nearey v’er ny akin.

²⁷ Ta mee er vakin kys t’ou er vrishey poosey m’oï, yllaghey dty reaïd, rouanys dty vaarderys, as dty obbraghyn naareydagh er ny croink fud y vagheragh. Smerg dhyt’s, O Yerusalem! nagh bee oo er dty ghlenney? cuin vees y traa?