Jeremiah 10 - Yn Vible Casherick 1775 1819

CAB. X

¹ Clasht-jee rish yn goo ta’n Chiarn dy loayrt riu, O hie Israel:

² Myr shoh ta’n Chiarn dy ghra, Ny ynsee-jee aght ny ashoonee, as ny bee-jee atchimagh son cowraghyn yn aer; son ta ny ashoonee feer atchimagh rhymboo.

³ Son ta cliaghtaghyn y phobble fardalys: son ta fer giarey billey ’sy cheyll (obbyr-lauee yn obbree) lesh y teigh:

⁴ T’ad dy choamrey eh lesh argid as lesh airh; t’ad jannoo eh shickyr lesh treinaghyn as lesh oayrdyn, nagh jean eh gleashagh.

⁵ T’ad jeeragh myr y billey-palm, agh cha vel glare ayndoo: shegin daue ve er nyn ymmyrkey, er-y-fa nagh vod ad shooyl. Ny gow-jee aggle roue; son cha jig eh lhieu dy yannoo olk, chamoo te ayndoo dy yannoo mie.

⁶ Son wheesh as nagh vel fer erbee casley rhyt’s, O Hiarn; t’ou uss pooaral, as ta dty ennym ard ayns niart.

⁷ Quoi nagh goghe aggle royd’s, O ree ny ashoonyn? son dhyt’s te cair: son wheesh as mastey ooilley deiney creeney ny ashoonyn, as ayns ooilley nyn reeriaghtyn, cha vel unnane erbee goll rhyt’s.

⁸ Agh t’ad ooilley-cooidjagh bolvaneagh as gyn tushtey; ta’n jalloo ny ynsagh dy ardalys.

⁹ Ta argid bwoailt magh ayns plaityn er ny chur lesh veih Tarshish, as airh veih Uphaz, obbyr y ghaaue-airh, as laueyn y lheieder: lesh gorrym as purple t’ad coamrit: t’ad ooilley obbyr gheiney schleioil.

¹⁰ Agh ta’n Chiarn yn Jee firrinagh, eshyn y Jee bio, as y Ree dy bragh farraghtyn: ec y chorree echeysyn bee’n seihll er-creau, as cha vod ny ashoonyn e yymmoose y ymmyrkey.

¹¹ Myr shoh jir shiu roosyn, Ny jeeghyn nagh ren ny niaughyn ny’n thalloo y chroo, nee ad shen eer cherraghtyn veih’n thalloo, as veih fo ny niaughyn shoh.

¹² T’eshyn er chroo yn thalloo liorish e phooar, t’eh er hoiaghey yn seihll liorish e chreenaght, as er heeyney magh ny niaughyn liorish e hushtey.

¹³ Tra t’eh cur magh e choraa ayns taarnagh, ta weight ushtey ’syn aer, as t’eh cur er y kay dy hroggal veih ardjyn sodjey magh yn ooir; t’eh lhiggey magh ny tendreilyn lesh y fliaghey, as cur magh yn gheay ass e hashtaghyn.

¹⁴ Ta dy chooilley ghooinney jeu bolvaneagh ayns tushtey; ta keeayl dy chooilley lheieder lheïe ersooyl lesh y jalloo grainnit: son ta’n jalloo lheït echey ny oalsaght, as cha vel ennal ayndoo.

¹⁵ T’ad fardail, as obbyr y volteyrys: ayns earish nyn gerraghey nee ad cherraghtyn.

¹⁶ Cha vel eiraght Yacob goll roosyn: son she eshyn t’er chiaddey dy chooilley nhee; as ta Israel cronney e eiraght: Chiarn ny sheshaghtyn flaunyssagh yn ennym echey.

¹⁷ Chymsee seose dty chooid ass y cheer, O chummaltagh yn charrick:

¹⁸ Son myr shoh ta’n Chiarn dy ghra, Cur-my-ner, neem’s cummaltee yn cheer y slingal magh ’sy tullogh, as nee’m ad y heaghney, dy vod ad gennaghtyn dy vel eh myr shoh.

¹⁹ Smerg dooys kyndagh rish yn assee t’aym! ta my lhott angaishagh: agh dooyrt mee, Dy firrinagh ta shoh my cherraghey trome, as shegin dou eh y ymmyrkey.

²⁰ Ta my chabbane er ny spooilley, as ta ooilley my choyrdyn brisht: ta my chloan er n’gholl magh voym, as cha vel ad arragh; cha vel unnane faagit dy heeyney magh reesht my chabbane, as dy hoiaghey seose my churtanyn.

²¹ Son ta ny bochillyn bolvaneagh, as cha vel ad er hirrey lurg y Chiarn: shen-y-fa cha jean ad bishaghey, as bee ooilley ny shioltaneyn oc er nyn skeayley.

²² Cur-my-ner, ta sheean y naight er jeet, as irree-magh dewil ass y cheer my-hwoaie, dy yannoo ard-valjyn Yudah ny hraartys, as ooig son dragonyn.

²³ O Hiarn, ta fys aym nagh vel immeeaght dooinney fo’n reill echey hene: cha vel eh ayns dooinney ta shooyl dy oardaghey e chesmadyn hene.

²⁴ O Hiarn, smaghtee mee, agh lesh foayr; cha nee ayns dty chorree, nagh der oo mee naardey.

²⁵ Deayrt magh dt’eulys er ny ashoonyn nagh vel er choyrt enney ort’s, as er ny lught-thieyn nagh vel geamagh er dty ennym: son t’ad er stroie Jacob, as er choyrt eh mow as naardey, as er n’yannoo e ynnyd-vaghee ny hraartys.