Isaiah 9 - Yn Vible Casherick 1775 1819

CAB. IX

¹ Ny-yeih, cha bee yn dorraghys lheid as ve tra v’ee seaghnit, tra ren eh dy eddrym ec y toshiaght seaghney cheer Zebulun as cheer Naphtali, as ny lurg shen ren eh ny s’trimmey seaghney ee er slyst ny marrey, cheu elley dy Yordan, ayns Galilee jeh ny ashoonyn.

² Ta’n pobble va shooyl ayns dorraghys er vakin soilshey mooar: orroosyn va cummal ayns cheer scadoo yn vaaish ta’n soilshey er n’irree.

³ T’ou er vishaghey yn ashoon, as cha vel oo er vooadaghey nyn moggey: t’ad goaill boggey kiongoyrt rhyt, rere boggey yn ouyr, as myr ta deiney goaill boggey tra t’ad rheynn y chragh.

⁴ Son t’ou er vrishey yn whing trome echey, as lorg e gheaylin, slatt e hranlaasagh, myr ayns laa Vidian.

⁵ Son ta dy chooilley vagher-caggee yn treanagh lesh tharmane boiragh, as garmadyn seiyt ayns fuill; agh bee shoh lesh lostey, as stoo son yn aile.

⁶ Son dooinyn ta lhiannoo er ny ruggey, dooinyn ta mac er ny choyrt, as bee yn reiltys er e gheaylin; as bee eh enmyssit, Yn Er-yindyssagh, Fer-coyrlee, Yn Jee niartal, Yn Ayr dy bragh beayn, Yn Prince dy hee.

⁷ Er mooadys e reill as e hee cha bee jerrey, er stoyl-reeoil Ghavid, as er e reeriaght, dy oardrail eh, as dy niartaghey eh lesh briwnys as cairys, veih’n traa shoh magh eer son dy bragh. Graih jeean Chiarn ny flaunyssee nee shoh y chooilleeney.

⁸ Hug y Chiarn goo gys Jacob, as te er duittym er Israel.

⁹ As yiow ooilley’n pobble fys er, dy jarroo Ephraim, as cummaltee Samaria, ta gra ayns moyrn as dunnallys nyn gree,

¹⁰ Ta ny breekyn er duittym, agh nee mayd thieyn y hroggal jeh claghyn cummit; ta ny biljyn-sycamore giarit sheese, as soie-ee mayd ayns nyn ynnyd biljyn-cedar.

¹¹ Shen-y-fa nee yn Chiarn soiaghey seose noidyn Rezin n’oï-syn, as tayrn ad dy cheilley;

¹² Ny Syrianee er e veealloo, as ny Philistinee er e chooylloo; as nee ad Israel y stroie lesh beeal foshlit. Son ooilley shoh cha vel e yymmoose er ny hyndaa ersooyl, agh ta e laue foast sheeynt magh.

¹³ Son cha vel y pobble chyndaa huggeysyn ta dy smaghtaghey ad, chamoo t’ad shirrey gys Chiarn ny flaunyssee.

¹⁴ Shen-y-fa nee yn Chiarn giarey jeh Israel veih bun dy baare, eer bangan as fraue ’syn un laa.

¹⁵ Yn chenn as onnoroil, eshyn y bun; as y phadeyr ta gynsaghey breagyn, eshyn y baare.

¹⁶ Son ta leeideilee yn phobble shoh coyrt ad er-shaghryn, as t’adsyn er nyn stroie ta er ny leeideil lioroo.

¹⁷ Shen-y-fa cha bee veg y taitnys ec y Chiarn ayns ny deiney aegey oc, chamoo vees myghin echey er y chloan gyn ayr, as ny mraane-treoghe: son t’ad ooilley crauee-oalsey as nyn ghrogh-yantee as ta dy chooilley veeal loayrt ommijys. Son ooilley shoh cha vel e chorree chyndaït ersooyl, agh ta e laue foast er ny heeyney magh.

¹⁸ Son ta mee-chraueeaght lostey myr yn aile: nee eh stroie ny dressyn as ny drineyn, as nee eh foaddey ayns thammagyn ny keylley; as troggee ad seose myr y jaagh-chassee neealloo yn aer.

¹⁹ Liorish jymmoose Chiarn ny flaunyssee ta’n cheer fo dorraghys, as bee’n pobble myr stoo cour yn aile: cha jean dooinney erbee lhiggey lesh e vraar.

²⁰ As nee eh greimmey er y laue yesh, as bee eh accryssagh; as nee eh gee er y laue chiare, as cha bee ad jeant magh: nee dagh dooinney jeu gee feill yn roih echey hene:

²¹ Manasseh noi Ephraim, as Ephraim noi Manasseh; as bee ad nyn-neesht noi Judah. Son shoh as ooilley cha vel e yymmoose er ny chastey, agh ta e laue foast er ny heeyney magh.