Isaiah 6 - Yn Vible Casherick 1775 1819

CAB. VI

¹ Ayns y vleïn hooar ree Uzziah baase, honnick mee yn Chiarn ny hoie er stoyl-reeoil ard as troggit seose, as ren e ghloyr yn chiamble y lhieeney.

² Er-e-skyn hass ny seraphim: er dagh fer jeu va shey skianyn; lesh jees choodee eh e eddin, as lesh jees choodee eh e chassyn, as lesh jees ren eh getlagh.

³ As deïe yn derrey yeh gys y jeh elley, gra, Casherick, casherick, casherick ta Chiarn ny flaunyssee; ta’n slane seihll lane jeh e ghloyr.

⁴ As ren essynyn y dorrys craa ec y choraa echeysyn ren geamagh, as va’n thie lhieent lesh jaagh.

⁵ Eisht dooyrt mee, Smerg dooys! cre’n erree hig orrym; er-yn-oyr dy vel mee my ghooinney jeh meillyn neu-ghlen, as ta mee cummal mastey pobble jeh meillyn neu-ghlen: son ta my hooillyn er vakin y Ree, Chiarn ny flaunyssee.

⁶ Eisht ren fer jeh ny seraphim getlagh hym, as smarage yiarg ny laue, v’eh er ghoaill lesh y chlou jeh’n altar;

⁷ As venn eh rish my veeal eh, as dooyrt eh, Cur-my-ner, ta shoh er ventyn rish dty veillyn, as ta dty vee-chairys goit ersooyl, as dty pheccah er ny ghlenney.

⁸ Myrgeddin cheayll mee coraa yn Chiarn, gra, Quoi nee’m y choyrt, as quoi hed er chaghteraght er nyn son? Eisht dooyrt mee, Ta mish ayns shoh; lhig dooys goll.

⁹ As dooyrt eh, Immee as insh da’n pobble shoh, Nee shiu clashtyn dy jarroo, agh cha jean shiu toiggal; as nee shiu fakin dy jarroo, agh cha der shiu tastey.

¹⁰ Bee cree yn phobble shoh jeant roauyr, as bee far-chlashtyn ayns nyn gleayshyn, as nee ad jeigh nyn sooillyn; er-aggle dy vaik ad lesh nyn sooillyn, as dy glin ad lesh nyn gleayshyn, as dy doig ad lesh nyn gree, as dy bee ad er nyn jyndaa, as er nyn lheihys.

¹¹ Eisht dooyrt mee, Hiarn, caïd? As dreggyr eh, Derrey vees ny ard-valjyn naardey fegooish cummaltagh, as ny thieyn fegooish dooinney, as y cheer dy bollagh treigit.

¹² As dy vel y Chiarn er scughey deiney foddey jeh, as bee traartys vooar ayns mean ny cheerey.

¹³ Agh ga dy bee yn jeihoo ayrn jeu faagit, as dy jean ad chyndaa, bee ad shen son spooilley: myr bun billey-unjin ny darragh, ta’n soo oc ayndoo, tra t’ad tilgey nyn ghuillagyn, shen myr vees yn sluight chrauee ayns y bun echey.