Isaiah 57 - Yn Vible Casherick 1775 1819

CAB. LVII

¹ Ta’n dooinney cairal cherraghtyn, as cha vel dooinney erbee goaill eh gys e chree; as ta deiney giastyllagh goit ersooyl, gyn fer erbee smooinaghtyn dy vel yn dooinney ynrick goit ersooyl veih’n olk ta ry-heet.

² Hed eshyn roish ayns shee: bee ad ec fea ayns nyn lhiaghtyn, dagh unnane ta er n’immeeaght ayns e chairys.

³ Tar-jee er-gerrey gys shoh, shiuish vec yn ven-obbee, shiuish ta sluight y vaarderagh as y streebagh.

⁴ Quoi er ta shiu jannoo gannidys? quoi er ta shiu dy lhean fosley nyn meeal, as sheeyney magh yn chengey? nagh vel shiuish cloan dy vee-chairys, sluight dy volteyrys;

⁵ Greinnaghey shiu hene seose gys jallooyn fo dy chooilley villey glass, marroo nyn gloan ayns ny coanyn fo scoltaghyn ny creggyn?

⁶ Mastey claghyn shliawn y trooan ta dty chronney; t’adsyn, eer adsyn yn cronney ayd’s; dy jarroo dauesyn t’ou er gheayrtey magh oural-feeyney, t’ou er hebbal oural-arran. Cre’n taitnys oddym’s goaill ayndoo shoh?

⁷ Er slieau ard as cronnal t’ou er hoiaghey dty lhiabbee: eer er shen hie oo seose dy hebbal oural.

⁸ Cooyl ny dorryssyn myrgeddin as er essynyn y dorrys t’ou er hoiaghey seose dty imraa; son t’ou er yeeaghyn oo hene da feallagh elley chammah’s dooys, as t’ou er n’gholl seose: t’ou er n’yannoo lhean dty lhiabbee, as er n’yannoo conaant roosyn; bynney lhiat yn lhiabbee oc raad honnick oo eh.

⁹ Hie oo gys y ree lesh dty ooilyn millish as lesh ymmodee dty spiceyn costal, as hug oo dty haghteryn foddey ’sy yioyn, as ren oo ginjillaghey oo hene dy jarroo gys joan ny hooirey.

¹⁰ T’ou tooillit ayns ymmodee shaghrynys dty raaidyn; ny-yeih cha dooyrt oo, Te ayns fardail; t’ou er n’gheddyn magh niart dty laue; shen-y-fa cha r’ou seaghnit.

¹¹ As quoi roish t’ou er ny ve ayns aggle ny imnea, dy vel oo er n’yannoo breg, as nagh vel oo er chooinaghtyn orrym’s, ny er n’ghoaill shoh gys dty chree? nagh vel mish er ve my host eer er-dyn chenn earish, as cha vel oo goaill aggle roym?

¹² Ver-yms briaght er dty ynrickys, as dty obbraghyn; son bee ad er beggan foaynoo dhyt.

¹³ Tra t’ou geamagh, lhig da dty heshaghyn oo y livrey: agh nee’n gheay sheebey ad ooilley ersooyl; nee fardail ad y ghoaill jeh: agh eshyn ta coyrt e hreishteil aynym’s nee eh cummal ayns y cheer, as yiow eh eiraght ayns my lieau’s casherick;

¹⁴ As nee eh gra, Tilg-jee seose, tilg-jee seose, kiartee-jee yn raad, scugh-jee yn kiap-snapperal ass raad my phobble.

¹⁵ Son shoh myr ta’n Jee smoo ard as ooasle dy ghra, eer eshyn ta cummal ayns beaynid dy bragh farraghtyn, e ennym ta Casherick; Ta mee cummal ’syn ynnyd ard as casherick, mârishyn myrgeddin ta jeh spyrryd imlee arryssagh, dy gherjaghey spyrryd ny imlee, as dy gherjaghey cree ny accryssee.

¹⁶ Son cha beem’s dy kinjagh streeu, chamoo vee’m dy kinjagh corree: son yinnagh yn spyrryd failleil kiongoyrt rhym, as ny anmeenyn ta mee er chroo.

¹⁷ Son mee-chairys y taynt echeysyn va my yymmoose, as woaill mee eh: dollee mee mee-hene, as va mee corree, as hie eh dy roonagh er e hoshiaght ayns raad e chree hene.

¹⁸ Ta mee er vakin e raaidyn, as nee’m eh y lheihys; goym er y laue eh myrgeddin, as chyndaa-ym reesht gerjagh huggey hene, as hucsyn t’ayns trimshey mârish.

¹⁹ Ta mee croo mess ny meillyn; Shee, shee ersyn ta foddey jeh, as ersyn ta er-gerrey, ta’n Chiarn gra; as neem’s eh y lheihys.

²⁰ Agh ta ny mee-chrauee myr yn aarkey seiyt, tra nagh vod ee fea y ghoaill, ta ny ushtaghyn eck tilgey seose laagh as broïd.

²¹ Cha vel shee erbee cour ny mee-chrauee, ta my Yee dy ghra.