Isaiah 2 - Yn Vible Casherick 1775 1819

CAB. II

¹ Yn goo hug Isaiah mac Amoz my-ner mychione Judah as Jerusalem.

² As hig eh gy-kione ayns ny laghyn jerrinagh, dy bee slieau thie yn Chiarn er ny hoiaghey er mullagh ny sleityn; as nee dy chooilley ashoon chionney stiagh huggey.

³ As hed ymmodee pobble, as jir ad, Tar-jee, as lhig dooin goll seose gys slieau yn Chiarn, gys thie Yee Yacob; as ynsee eh dooin eh raaidyn, as nee mayd shooyl ayns e chassanyn: son magh ass Zion hig y leigh, as goo yn Chiarn veih Jerusalem.

⁴ As nee eh briwnys mastey ny ashoonyn, as ver eh oghsan da ymmodee pobble; as obbree ad seose nyn gliwenyn gys yiarnyn-shesheree, as nyn shleiyghyn gys yiarnyn-foldyragh: cha jean ashoon cliwe y hroggal seose noi ashoon, chamoo nee ad gynsaghey yn keird-caggee ny smoo.

⁵ O hie Yacob, tar-jee as lhig dooin gimmeeaght ayns soilshey yn Chiarn.

⁶ Shen-y-fa t’ou er hreigeil dty phobble thie Yacob, son dy vel ad er vishaghey [ayns obbeeys] veih’n niar, as dy vel ad fir-faishnee myr ny Philistinee, as t’ad goaill taitnys ayns cloan yoarree.

⁷ Ta’n cheer oc myrgeddin lane dy argid as dy airh, chamoo ta kione er ny tashtaghyn oc: ta’n cheer oc myrgeddin lane dy chabbil, chamoo ta jerrey er ny fainee oc.

⁸ Ta’n cheer oc myrgeddin lane dy yallooyn: t’ad ooashlaghey obbyr ny laueyn oc hene, shen ta ny meïr oc hene er chummey.

⁹ As ta’n boght croymmey sheese eh-hene, as ta’n dooinney ooasle gliooney dy injil: shen-y-fa ny leih daue.

¹⁰ Stiagh lhiat ’sy chreg, as follee oo hene ’sy joan, roish aggle y Chiarn, as son gloyr e ard-ooashley.

¹¹ Bee shilley mooaralagh dooinney er ny injillaghey, as bee moyrn deiney er ny chroymmey, as bee yn Chiarn ny-lomarcan er ny yrjaghey ’sy laa shen.

¹² Son bee laa Chiarn ny flaunyssee er dagh unnane ta moyrnagh as mooaralagh, as er dagh unnane ta ard-chreeagh, as bee eh er ny injillaghey;

¹³ As er ooilley cedaryn Lebanon, ta ard as troggit seose, as er ooilley biljyn-darragh Vashan,

¹⁴ As er ooilley ny sleityn ard, as er ooilley croink yn yrjid,

¹⁵ As er dy chooilley hoor ard, as er dy chooilley voalley fencit,

¹⁶ As er ooilley lhongyn Tarshish, as er ooilley ny pictureyn aalin.

¹⁷ As bee moyrn dooinney er ny chroymmey, as bee mooaralys deiney currit sheese dy injil; as she yn Chiarn ynrycan syrjey vees ’sy laa cheddin.

¹⁸ As ny jallooyn nee eh dy bollagh y stroie.

¹⁹ As follee sleih ad-hene ayns guaggyn ny creggyn, as ayns ooigyn ny hooirey, ayns aggle roish y Chiarn, as son gloyr e ard-ooashley, tra t’eh girree dy chraa yn thalloo dy atchimagh.

²⁰ Nee dooinney ayns y laa shen ceau gys ny lughee as ny craitnagyn, e yallooyn argid as e yallooyn airhey, ren ad, dagh dooinney da hene, dy ooashlaghey:

²¹ Dy gholl stiagh ayns scoltaghyn ny creggyn, as fo mullagh ny creggyn brishtagh, kyndagh rish aggle y Chiarn, as gloyr e ard-ooashley, tra t’eh troggal er dy chraa yn thalloo dy atchimagh.

²² Ny treisht-jee ayns dooinney, ta e ennal ayns e stroanyn; son cre ayns ta soiaghey dy ve jeant jeh?