Isaiah 18 - Yn Vible Casherick 1775 1819

CAB. XVIII

¹ Smerg da’n cheer ta fo scadoo skianagh, ta cheu elley jeh awinyn Ethiopia!

² Ta coyrt chaghteryn reeoil er yn aarkey, eer ayns baatyn cuirtlagh er ny ushtaghyn, gra, Immee-jee shiuish chaghteryn bieau, gys ashoon skeaylt magh, as speeinit, gys pobble atchimagh veih’n toshiaght derrey nish; ashoon towshit magh as stampit sheese, yn thalloo echey ta ny awinyn er vhilley.

³ Ooilley shiuish fir-vaghee yn theihll as cummaltee ny hooirey, jeeagh-jee, tra t’eh troggal seose cowrey-caggee er ny sleityn; as tra t’eh sheidey yn trumpet, clasht-jee.

⁴ Son shoh myr dooyrt y Chiarn rhym, Bee’m my haaue, agh smooinee-ym er y chooish er-lheh ayns my ynnyd-vaghee, myr y chiass kiune er lossreeyn, as goll-rish bodjal dy ghruight ayns chiass yn ouyr.

⁵ Son roish yn ouyr, lurg da’n blaa v’er jeet gys slane aase, as y berrish-feeyney gyere er n’appaghey ayns y vlaa, giaree eh jeh ny slattagyn lesh corranyn-pollal, as gowee eh ersooyl, as giaree eh sheese ny banglaneyn.

⁶ Bee ad faagit cooidjagh da eeanlee ny sleityn, as da maase y vagheragh; nee ny eeanlee tannaghtyn orroo car y touree, as maase y vagheragh car y yeuree.

⁷ Ayns y traa shen vees gioot er ny hebbal gys Chiarn ny flaunyssee veih pobble skeaylt as speeinit, as veih pobble atchimagh veih’n toshiaght derrey nish; ashoon towshit magh, as stampit fo-chosh, yn cheer oc ta ny awinyn er vhilley, hig ad gys ynnyd ennym Chiarn ny flaunyssee, eer gys cronk Sion.