Isaiah 12 - Yn Vible Casherick 1775 1819CAB. XII 1 As ayns y laa shen nee oo gra, O Hiarn, ver-ym moylley dhyt: ga dy r’ou corree rhym, ta dty yymmoose chyndaït ersooyl as t’ou dy my gherjaghey. 2 Cur-my-ner, ta Jee my haualtys; nee’m treishteil, as cha goym aggle; son ta’n Chiarn Jehovah my niart as my arrane, t’eh myrgeddin er jeet dy ve my haualtys. 3 Shen-y-fa nee shiu tayrn ushtey lesh boggey ass ny chibbraghyn dy haualtys. 4 As ayns y laa shen nee shiu gra, Moylley-jee yn Chiarn, eïe-jee er e ennym, fockle-jee magh e yannoo mastey’n pobble, jean-jee gimraa er e ennym lesh ard-voylley, 5 Gow-jee arrane gys y Chiarn; son t’eh er n’yannoo reddyn ooasle: ta shoh er ny hoiggal ayns ooilley’n seihll. 6 Eïe magh, as yllee, uss chummaltagh Zion: son s’mooar ta’n Fer-casherick dy Israel cheu-sthie jeed. |
First published in 1775, revised and published by the British and Foreign Bible Society in 1819.
British & Foreign Bible Society