Isaiah 11 - Yn Vible Casherick 1775 1819

CAB. XI

¹ As hig magh slatt ass bun Yesse, as aasee banglane ass ny fraueyn echey:

² As nee Spyrryd y Chiarn tannaghtyn ersyn, spyrryd dy chreenaght as dy hoiggal, spyrryd dy choyrle as dy niart, spyrryd dy hushtey as dy aggle y Chiarn;

³ As bee eh jeh tushtey dowin ayns aggle y Chiarn: as cha jean eh briwnys lurg shilley e hooillyn, chamoo ver eh oghsan lurg clashtyn e chleayshyn:

⁴ Agh lesh cairys nee eh briwnys yn hoght, as ver eh oghsan lesh corrymid son imlee yn theihll: as bwoaillee eh yn thalloo lesh slatt e veeal, as lesh ennal e veillyn stroie-ee eh ny mee-chrauee.

⁵ As cairys vees cryss mysh e vean, as ynrickys cryss mysh e veeghyn.

⁶ Nee yn moddey-oaldey baghey marish yn eayn, as nee yn leopard lhie sheese marish y vannan; yn lheiy, as y lion aeg, as y baagh beiyht dy cheilley; as nee paitchey ad y vochilley.

⁷ As nee’n vooa, as y vuc-awin gyndyr; nee’n ingan oc lhie sheese cooidjagh: as nee yn lion gee coonlagh myr y dow.

⁸ As nee yn oikan t’er y cheeagh cloie er towl yn asp, as ver y lhiannoo ta charbaït e laue er edd y chockatrice.

⁹ Cha jean ad gortaghey ny stroie ayns ooilley my lieau’s casherick: son bee yn seihll lane jeh tushtey yn Chiarn, myr ta ny ushtaghyn coodaghey diunid ny marrey.

¹⁰ As ayns y laa shen vees fraue jeh Jesse, nee shassoo son cullee da’n pobble: huggey nee ny ashoonee chionney stiagh: as bee yn fea echey gloyroil.

¹¹ As hig eh gy-kione ayns y laa shen, dy jean y Chiarn soiaghey e laue yn nah cheayrt dy chosney sluight e phobble vees faagit, veih Assyria, as veih Egypt, as veih Pathros, as veih Cush, as veih Elam, as veih Shinar, as veih Hamath, as veih ellanyn yn aarkey.

¹² As troggee eh seose mergey, as tayrnee eh dy cheilley eebyrtee Israel, as chaglee eh cooidjagh skeayltee Yudah veih kiare ardjyn yn aer.

¹³ Bee troo Ephraim myrgeddin er ny chastey, as noidyn Yudah giarit jeh; cha jean Ephraim troo mysh Judah, as cha jean Judah seaghney Ephraim.

¹⁴ Agh nee ad getlagh er geayltyn ny Philistinee lesh y sheear; nee ad spooilley adsyn jeh’n shiar cooidjagh: nee ad nyn laue y lhie er Edom as Moab; as ver cloan Ammon biallys daue.

¹⁵ As nee’n Chiarn dy bollagh stroie chengey faarkey Egypt; as lesh e gheay niartal nee eh craa e laue harrish yn awin, as bwoaillee eh eh ayns ny shiaght strooanyn, as hed deiney harrish ry nyn gosh.

¹⁶ As bee raad-mooar son sluight e phobble vees faagit veih Assyria; myr ve da Israel ’sy laa haink eh seose veih cheer Egypt.