Isaiah 10 - Yn Vible Casherick 1775 1819

CAB. X

¹ Smerg dauesyn ta coyrt briwnys mee-chairagh, as dauesyn ta scrieu ny oardaghyn seaghnagh myr te coyrt roue;

² Dy chassey briwnys yn ymmyrchagh, as dy ghoaill ersooyl nyn gair veih boghtyn my phobble, dy vod mraane-treoghe ’ve oc son spooilley, as dy yannoo cragh jeh’n chloan gyn ayr!

³ Agh cree nee shiuish ayns laa yn cherraghey, as ayns y traartys hig veih foddey? quoi gys nee shiu chea son kemmyrk? as quoi nee nyn merchys y choadey?

⁴ Treigit liorym’s nee ad croymmey sheese nyn bryssoonee, as tuittee ad mastey ny merriu. Son ooilley as shoh cha vel e yymmoose er ny hyndaa ersooyl, agh ta e laue foast er ny heeyney magh.

⁵ O Assyrian, slatt my chorree, as ta’n lorg ayns nyn laue my yymmoose.

⁶ Neem’s eh y choyrt noi ashoon kialgeyragh, as noi pobble my yymmoose ver-ym sarey da dy ghoaill yn spooilley, as dy ghoaill y chragh, as dy stampey ad sheese goll-rish laagh ny straïdyn.

⁷ Ny-yeih cha nee shen myr t’eh kiarail, chamoo ta’n cree echey smooinaghtyn myr shen; agh te ayns e chree dy stroie as dy yiarey jeh ashoonyn cha nee beggan.

⁸ Son t’eh gra, Nagh vel my phrinceyn corrym rish reeaghyn?

⁹ Nagh vel Calno [stroit] myr Carchemish? nagh vel Hamath myr Arpad? nagh vel Samaria myr Damascus?

¹⁰ Myr ta my laue er ghoaill reeriaghtyn ny jallooyn, as ny co-chaslyssyn grainnit oc va foddey roish [jeeghyn] Yerusalem as Samaria;

¹¹ Nagh voddym, myr ta mee er n’yannoo rish Samaria as ny jallooyn eck, jannoo myrgeddin rish Jerusalem, as ny jallooyn ecksh?

¹² Shen-y-fa hig eh gy-kione, tra ta’n Chiarn er chooilleeney yn slane obbyr echey er cronk Zion, as er Jerusalem, dy jean-ym kerraghey moyrn cree dunnal ree Assyria, as mooaralys e hilley ard.

¹³ Son t’eh gra, Liorish niart my laue hene, ta mee er n’yannoo eh, as liorish my chreenaght; son ta mee tushtagh: as ta mee er scughey cagleeyn y phobble, as er spooilley ny tashtaghyn oc, as ta mee er chur fo-chosh ny cummaltee, myr dooinney dunnal:

¹⁴ As ta my laue er gheddyn, myr ayns edd, berchys y phobble: as myr ta fer ta chymsagh oohyn ta treigit, ta mish er haglym ooilley yn seihll; as cha row unnane jeu by-loys gleashagh skian, ny fosley yn veeal, ny gaccan.

¹⁵ Jean y teigh boggyssagh n’oï-syn ta giarey lesh? ny bee yn saaue mooaralagh rishyn ta dy hayrn eh? myr dy jinnagh y clatt ee-hene y chraa noi adsyn ta troggal seose ee, ny myr dy jinnagh yn lorg eh-hene y hroggal seose, myr nagh beagh eh ny vaidjey.

¹⁶ Shen-y-fa, ver y Chiarn, Chiarn ny flaunyssee, shangid mastey e vooinjer roauyrey; as fo yn ghloyr echey nee eh foaddey aile, eer aile stroie ooilley roish.

¹⁷ As bee soilshey Israel son aile, as e Er-casherick son lossey: as nee eh lostey as stroie e ghrineyn as e ghressyn ’syn un laa.

¹⁸ As nee eh stroie gloyr e cheyll, as e vagher messoil, chammah annym as callin: as bee ad myr tra ta fer-cullee goll neeal.

¹⁹ As cha bee yn chooid elley jeh biljyn e cheyll agh beggan, dy vod lhiannoo ad y choontey.

²⁰ As hig eh gy-kione ’sy laa shen, nagh der fooilliagh Israel, ny scapailtee thie Yacob, arragh nyn marrant ersyn ren ad y woalley; agh ver ad nyn marrant er y Chiarn, yn Er-casherick dy Israel, ayns firrinys.

²¹ Nee yn fooilliagh chyndaa, eer fooilliagh Yacob, gys y Jee niartal.

²² Son ga dy vel dty phobble Israel myr genniagh ny marrey, foast nee fooilliagh jeu chyndaa: bee yn kerraghey ta kiarit er ny chooilleeney ayns myghin.

²³ Son ver y Chiarn, Jee ny flaunyssee, magh kerraghey, eer kiarit ayns myghin, ayns mean y slane cheer.

²⁴ Shen-y-fa, shoh myr ta’n Chiarn, Jee ny flaunyssee, dy ghra, O my phobble ta cummal ayns Zion, ny bee aggle erriu roish yn Assyrian: ga dy jean eh uss y woalley lesh slatt, as troggal seose e lorg dy baggyrtagh dt’oï, myr ren Egypt.

²⁵ Son foast tammylt feer yiare, as nee my chorree as my yymmoose scuirr ayns y toyrt-mow oc.

²⁶ As nee Chiarn ny flaunyssee doostey seose kerraghey er e hon, myr ayns cragh Vidian ec creg Oreb; as myr va’n lorg echey er yn aarkey, myr shen nee eh troggal seose eh, myr ren eh ec Egypt.

²⁷ As hig eh gy-kione ’sy laa shen, dy bee yn errey echey er ny ghoaill ersooyl jeh dty gheaylin, as e whing jeh dty wannal, as bee yn whing er ny vrishey er graih e er-ooilit.

²⁸ T’eh er jeet gys Aiath, t’eh er n’gholl harrish gys Migron; ec Michmash t’eh er vaagail e charriads:

²⁹ T’ad er chosney er y raad sleitagh: t’ad er ghoaill seose nyn aaght ec Geba; ta Ramah ayns aggle; ta Gibeah-saul er-chea.

³⁰ Trog seose dty choraa, O inneen Ghallim; lhig da v’er ny chlashtyn ec Laish, O Anathoth boght,

³¹ Ta Madmenah er scughey; ta cummaltee Ghebim er haglym ad-hene dy cheilley dy roie er y hon.

³² As foast nee eh tannaghtyn ec Nob y laa shen: nee eh e laue y chraa noi crongan inneen Zion, eer cronk Yerusalem.

³³ Cur-my-ner, nee’n Chiarn, eer Chiarn ny flaunyssee, brishey jeh yn banglane lesh atchim; as bee ny biljyn jeh aase vooar er nyn yiarey sheese, as bee ny mooaralee er nyn injillaghey.

³⁴ As giaree eh sheese biljyn y cheyll lesh yiarn, as nee Lebanon tuittym liorish fer niartal.