Isaiah 1 - Yn Vible Casherick 1775 1819

CAB. I

¹ Ashlish Isaiah mac Amoz, honnick eh mychione Judah as Jerusalem, rish lhing Uzziah, Jotham, Ahaz, as Hezekiah, reeaghyn Yudah.

² Clasht-jee, O shiuish niaughyn, as eaisht, O halloo: son ta’n Chiarn er loayrt, Ta mee er voandyrys as er hroggal cloan, agh t’ad er n’irree-magh m’oï.

³ Shione da’n dow yn er s’liesh eh, as yn assyl cratch e vainshtyr: agh cha nhione da Israel mish, cha vel my phobble smooinaghtyn orrym.

⁴ Ah, ashoon peccoil, pobble laadit lesh olk, sluight dy ghrogh-yantee, cloan stroialtagh! t’ad er hreigeil y Chiarn, t’ad er vrasnaghey jymmoose fer-casherick Israel, t’ad er hyndaa cooyl rhym.

⁵ Cre’n-fa veagh shiu ny-sodjey er nyn gerraghey? nee shiu girree-magh ny smoo as ny smoo. Ta’n kione ooilley ching, as yn cree ooilley faiynt.

⁶ Veih boyn ny coshey eer gys y chione cha vel slaynt erbee ayn; agh lhottyn, as brooghyn, as chingyn yngyragh: cha vel ad er ve glennit ny soïlit, chamoo er ny veiyghey lesh shelliu.

⁷ Ta’n cheer eu ny aasagh, ta ny ard-valjyn eu losht lesh aile: yn cheer eu ta joarreeyn dy chur mow roish nyn sooillyn, as te treigit, myr stroit liorish noidyn.

⁸ As ta inneen Zion treigit myr bwane ayns garey-feeyney, as bwaag ayns garey-cucumber, as myr balley cruinnit stiagh lesh noidyn.

⁹ Er-be dy daag Chiarn ny flaunyssee dooin sluight fardalagh, veagh shin er ve myr Sodom, as casley rish Gomorrah.

¹⁰ Clasht-jee rish goo yn Chiarn, shiuish reiltee Sodom; eaisht-jee rish leigh yn Jee ain, shiuish phobble Ghomorrah:

¹¹ Gys cre’n ymmyd ta earroo nyn ourallyn dooys? ta’n Chiarn dy ghra: ta mee skee jeh chebballyn-losht reaghyn, as meeaylys maase beiyht, chamoo ta taitnys aym ayns fuill dew, ny eayin, ny goair fyrryn.

¹² Tra ta shiu cheet ayns my enish, quoi t’er hirrey shoh ec nyn laue, dy haaghey my chooyrtyn?

¹³ Ny cur-jee lhieu arragh hym’s nyn jebballyn donney: ta’n oural-incense dwoaiagh dou; ny eaystyn-noa, as ny dooneeyn, as nyn veaillaghyn sumnit elley, cha voddym surranse daue; she mee-chraueeaght eh, eer yn chirveish smoo casherick.

¹⁴ Ny eaystyn-noa eu, as ny feaillaghyn pointit eu, t’ad dwoaie my annym; t’ad trimshey dou, ta mee skee dy ymmyrkey ad.

¹⁵ As tra ta shiu skeayley magh nyn laueyn, neem’s my hooillyn y hyndaa veue: dy jarroo tra ta shiu goaill ymmodee padjeryn, cha jean-ym clashtyn: ta nyn laueyn lane folley.

¹⁶ Niee-jee, jean-jee glen; cur-jee ersooyl olk nyn yannoo veih my hooillyn; scuirr-jee veih’n drogh-yannoo;

¹⁷ Ynsee-jee dy yannoo mie; shir-jee briwnys, cooin-jee lhieusyn ta tranlaasit; jean-jee briwnys son y chloan gyn ayr; Gow-jee seose cooish y ven-treoghe.

¹⁸ Tar-jee nish, as lhig dooin pleadeil ry-cheilley, ta’n Chiarn dy ghra. Ga dy beagh nyn beccaghyn myr scarleod, bee ad gial myr sniaghtey; ga dy vel ad jiarg myr crimson, bee ad myr yn ollan vane.

¹⁹ My vees shiu arrymagh as ammyssagh, nee shiu gee jeh foays ny cheerey:

²⁰ Agh my ta shiu gobbal as girree-magh, bee shiuish er nyn stroie lesh y chliwe: son ta beeal y Chiarn er loayrt eh.

²¹ Kys ta’n ard-valley ynrick er jyndaa ny maarderagh! v’ee lane dy vriwnys; boallagh cairys cummal aynjee; agh nish dunveryn.

²² Ta dty argid er ny hyndaa gys trustyr; ta’n feeyn ayd seiyt lesh ushtey:

²³ Ta dty phrinceyn mee-reiltagh, as sheshaghyn maarlee: ta dagh fer jeu sondagh er giootyn, as shêgin er leagh briwnys: cha vel ad briwnys son y chloan gyn ayr, chamoo ta cooish yn ven-treoghe cheet kiongoyrt roo.

²⁴ Shen-y-fa myr shoh ta’n Chiarn dy ghra, Chiarn ny flaunyssee, Jee niartal Israel, Ah, neem’s reaghey rish my noidyn, as goym cooilleeney orroosyn ta girree-magh m’oï.

²⁵ As chyndaa-ym my laue ort, as glen-ym ersooyl dy bollagh dty vergid, as goym ersooyl ooilley dty stainney:

²⁶ As soie-ym seose reesht dty vriwnyn myr ec y toshiaght, as dty ir-choyrlee myr ’sy chenn earish: lurg shen bee oo er dty enmys, Yn ard-valley dy chairys, Yn ard-valley ynrick.

²⁷ Bee Zion er ny livrey lesh briwnys, as hig e cloan chappee thie reesht lesh cairys.

²⁸ As bee toyrt-mow drogh-yantee as peccee lesh y cheilley, as bee adsyn ta treigeil y Chiarn er nyn stroie.

²⁹ Son gowee ad nearey jeh ny biljyn-darragh, t’ad er yeearree, as bee shiuish seaghnit son ny garaghyn ta shiu er reih.

³⁰ As bee shiuish myr yn billey-darragh, e ghuillag ta fioghey, as myr garey fegooish ushtey.

³¹ As bee ny treanee myr barragh, as yn obbree myr drilleen, as nee ad ny-neesht lostey dy cheilley, as cha jean fer erbee ad y vooghey.