Hosea 8 - Yn Vible Casherick 1775 1819

CAB. VIII

¹ CUR y trumpet gys dty veeal; hig eh myr urley noi thie yn Chiarn, er-yn-oyr dy vel ad er vrishey my chonaant, as er hoiaghey beg jeh my leigh.

² Nee Israel geam hym’s, My Yee, shione dooin oo.

³ Ta Israel er hreigeil shen ta mie; nee yn noid eh y helg.

⁴ T’ad er hoiaghey seose reeaghyn, agh cha nee liorym’s: t’ad er n’yannoo princeyn, agh noi my aigney’s: jeh nyn argid as nyn airh t’ad er n’yannoo jallooyn daue hene, dy choyrt ad-hene mow.

⁵ Ta dty yalloo-baagh O Samaria; er n’yiooldey rhyt: ta my chorree er ny ghreesaghey nyn ’oï: caïd vees eh, nagh n’eiyr ad er aghtyn mie?

⁶ Son veih Israel myrgeddin haink eh magh, yn obbree ren eh, shen-y-fa cha vel eh ny Yee: agh bee jalloo-baagh Samaria brisht ayns peeshyn.

⁷ Son t’ad er chuirr y gheay, as nee ad buinn y gheay-chassee: cha vel bun echey: cha jean y jeeas gymmyrkey meinn, as ga dy jean eh, bee eh stroit ec joarreeyn.

⁸ Ta Israel sluggit seose: nish bee ad mastey ny ashoonee myr saagh gyn-ymmyd.

⁹ Son dy vel ad er n’gholl seose gys Assyria, assyl oaldey er hene: ta Ephraim er vailley caarjyn.

¹⁰ Dy jarroo, ga dy vel ad er vailley mastey ny ashoonee, nish nee’m ad y haglym, as cha bee nyn drimshey agh giare fo errey ree ny reejereeyn.

¹¹ Er-yn-oyr dy vel Ephraim er n’yannoo ymmodee altaryn son peccah, bee ny altaryn son loght dasyn.

¹² Ta mee er scrieu dasyn nheeghyn mooarey my leigh, agh ren ad soiaghey jeu, myr jeh reddyn joarree.

¹³ T’ad ouralley feill son ourallyn my hebballyn, as t’ad gee eh; agh cha vel y Chiarn jannoo soiaghey jeu: nish nee eh cooinaghtyn er nyn mee-chairys, as kerraghey nyn beccaghyn: nee ad chyndaa reesht gys Egypt.

¹⁴ Son ta Israel er yarrood e er-croo, as troggal chiambleyn; as ta Judah er vishaghey ard-valjyn voallit: agh ver-yms aile er e ard-valjyn, as nee eh stroie nyn dhieyn reeoil.