Hosea 7 - Yn Vible Casherick 1775 1819

CAB. VII

¹ Tra va mee kiarit dy laanaghey Israel, eisht haink peccah Ephraim er-ash, as olkys Samaria: son t’ad cur-rish foalsaght, as ta’n maarliagh brishey stiagh, as ta sheshaght ny roosteyryn spooilley mooie.

² As cha vel ad goaill gys nyn gree, dy vel mish cooinaghtyn er ooilley nyn olkys: nish ta nyn yannoo hene coyrt dy chion roo er dagh cheu, t’ad kiongoyrt rish my eddin.

³ T’ad jannoo boggey da’n ree lesh nyn olkys, as da ny reejereeyn lesh nyn mreagyn.

⁴ T’ad ooilley loshtagh er maarderys, myr aile ayns oghe yn uinneyder, ta cur traa da’n theayst dy hroggal, erreish da v’er heaystney, derrey vees eh slane soorit.

⁵ Ayns laa yn ree ain, ta ny princeyn er n’yannoo ching jeh lesh nyn moteilyn feeyney, t’eh er heeyney magh e laue marish ny craidoilee.

⁶ Son t’ad er jiow nyn gree myr oghe, choud as t’ad lhie farkiaght; ta’n fuinneyder oc cadley fud-ny-hoie, ’sy voghrey te brishey magh myr aile lossanagh.

⁷ T’ad ooilley cheh myr yn oghe, as t’ad er stroie nyn mriwnyn; ta ooilley nyn reeaghyn er duittym, cha vel veg ny-vud oc ta geamagh orrym’s.

⁸ Ta Ephraim er seiy eh-hene mastey ny ashoonee, ta Ephraim myr berreen nagh vel chyndaït.

⁹ Ta joarreeyn er choyrt mow e niart, agh cha vel baght echey er shoh: dy feer, ta kuse dy renaigyn lheeah noon as noal er, ny-yeih cha vel eh goaill tastey jeu.

¹⁰ As ta moyrn Israel gymmyrkey feanish gys e eddin, ny-yeih cha vel ad chyndaa gys y Chiarn nyn Yee, ny shirrey huggey son ooilley shoh.

¹¹ Ta Ephraim myrgeddin myr calmane ôney gyn cree; t’ad shirrey cooney veih Egypt, t’ad goll gys Assyria.

¹² Tra hed ad, skeayl-yms my lieen orroo, lhieg-ym ad myr eeanlee yn aer, smaght-ym ad myr ta’n slane sheshaght oc er chlashtyn.

¹³ Smerg daue, son t’ad er-chea voym, toyrt-mow dy row orroo, son t’ad er my hreigeil: ga dy vel mee er chur feaysley daue, ny-yeih t’ad er loayrt breagyn m’oï.

¹⁴ As cha vel ad er ghoaill padjer hym veih nyn gree, tra v’ad gaccan er nyn lhiabbaghyn: t’ad chaglym cooidjagh son arroo as feeyn, as girree-magh m’oï.

¹⁵ Ga dy vel mee er smaghtaghey ad, ta mee er niartaghey ny roihaghyn oc, ny-yeih, t’ad smooinaghtyn er olk m’oï.

¹⁶ T’ad chyndaa, agh cha nee gys yn er smoo syrjey: t’ad goll-rish bow molteyragh: nee ny princeyn oc tuittym liorish y chliwe, son roon nyn jengaghyn: shoh vees nyn oltooan ayns thalloo Egypt.