Hosea 2 - Yn Vible Casherick 1775 1819

CAB. II

¹ Abbyr-jee rish nyn mraaraghyn, Ammi, as rish nyn shayraghyn, Ru-hamah.

² Cur-jee oghsan da nyn moir, cur-jee oghsan jee: son cha nee my ven’s ee, chamoo mish yn dooinney ecksh: shen-y-fa lhig j’ee cur ersooyl e streebeeys ass y chilley eck, as e maarderys veih eddyr e keeaghyn.

³ Er-aggle, dy der-ym ee gys nearey, cha rooisht as y laa ruggyr ee, as dy jean-ym ee myr faasagh, as myr thalloo reeastaneagh, as dy marr-ym ee lesh paays.

⁴ As cha bee myghin aym er e cloan: son dy nee cloan dy vaarderys ad.

⁵ Son ta’n moir oc er choyrt rish streebeeys: t’eeish ren ad y yientyn er n’yannoo dy naareydagh: son dooyrt ee, Hem marish my gheiney-sooree, ta coyrt dou m’arran, as m’ushtey, my ollan, as my lieen, my ooil, as feeyn.

⁶ Shen-y-fa, cur-my-ner, atnee-ym seose dty raad lesh drineyn, as nee’m voalley, nagh vow ee magh e oayll.

⁷ As hed ee geiyrt er e gimmanyn, agh cha berr ee orroo; nee ee shirrey nyn yeï, agh cha vow ee magh ad: eisht jir ee, Hem roym dy valley gys my chied heshey, son va mee ny s’maynrey mârishyn, na ta mee nish.

⁸ Son cha dug ee geill, dy nee mish hug jee arroo, as feeyn, as ooil, as vishee mee yn argid as yn airh eck, ren ad y vaarail er Baal.

⁹ Shen-y-fa bee’m noi eck, as goym ersooyl my arroo ’syn imbagh hene, as my feeyn ’syn imbagh echey, as goym ersooyl my ollan, as my lieen, v’er ny choyrt dy choodaghey e nearey.

¹⁰ As nish brah-ym yn drogh-vea eck fenish e maarderee, as cha jean fer erbee ish y livrey ass my laue.

¹¹ Ver-ym jerrey myrgeddin er ooilley e reaïd, er ny laghyn feailley eck, e eaystyn-noa, as e dooneeyn, as er ooilley ny ard-feaillaghyn eck.

¹² As ver-ym naardey myrgeddin e biljyn-feeyney, as e biljyn-figgagh, my-nyn-gione t’ee er ghra, Ad shoh yn faill ta my gheiney-sooree er choyrt dou: as nee’m faasagh jeu, as bee ad son beaghey da maase y vagheragh.

¹³ As nee’m kerraghey urree laghyn Vaalim, ayndoo losht ee incense daue, as ren ee soiaghey magh ee hene lesh e fainaghyn-cleayshey, as e jewellyn, as hie ee geiyrt er e gimmanyn, as yarrood ee mish, ta’n Chiarn dy ghra.

¹⁴ Shen-y-fa, cur-my-ner, nee’m ee y chleayney, as ver-ym lhiam ee gys yn aasagh, as loayr-ym dy dooie r’ee.

¹⁵ As veih shen ver-ym jee e garaghyn-feeyney, as glione Achor son dorrys dy hreishteil, as nee ee arrane y ghoaill ayns shen, myr ayns laghyn e aegid, as myr ayns y laa haink ee seose ass thalloo Egypt.

¹⁶ As er y laa shen, ta’n Chiarn dy ghra, nee oo genmys mish Ishi, as cha nee ny sodjey Baali.

¹⁷ Son goym ersooyl enmyn Vaalim ass e beeal, as cha bee imraa sodjey jeu lurg ny enmyn shen.

¹⁸ As ’sy laa shen nee’m conaant ass nyn lieh rish maase y vagheragh, as rish eeanlee yn aer, as rish reddyn snauee y thallooin: as brish-ym yn bow, as y cliwe, as y caggey ass y cheer; agh ver-ym orroosyn dy lhie sheese dy sauchey.

¹⁹ As nee’m oo y nastey rhym pene son dy bragh, dy jarroo nasht-ym oo rhym pene ayns cairys, as ayns briwnys, as ayns kenjallys-ghraihagh, as ayns myghinyn.

²⁰ Nasht-ym oo dy jarroo rhym pene, ayns ynrickys, as nee oo goaill-rish y Chiarn,

²¹ As hig eh gy-kione ’sy laa shen, dy der-yms clashtyn, ta’n Chiarn dy ghra, ver-yms clashtyn da ny niaughyn, as ver adsyn clashtyn da’n thalloo.

²² As ver y thalloo clashtyn da’n arroo, as da’n feeyn, as da’n ooil, as ver adsyn clashtyn da Jezreel.

²³ As cuirr-ym ee dou hene ’sy thalloo; as bee myghin aym urreeish, nagh row er chosney myghin: as jir-ym roosyn nagh vel my phobble, T’ou uss my phobble: as jir adsyn, T’ou uss my Yee.