Hosea 12 - Yn Vible Casherick 1775 1819

CAB. XII

¹ Ta Ephraim beaghey er y gheay, as geiyrt da’n gheay-niar: t’eh gagh laa bishaghey breagyn as toyrt-mow, as t’ad jannoo conaant rish ny Assyrianee, as ta ooil er ny chur lesh gys Egypt.

² Ta cooish ec y Chiarn myrgeddin rish Judah, as nee eh goaill cooilleeney jeh Jacob cordail rish e raaidyn; cordail rish e yannoo ver eh leagh da.

³ Ghow eh e vraar er y voyn ayns y vreïn, as liorish e niart, va pooar echey marish Jee:

⁴ Dy jarroo va pooar echey harrish yn aile, as hooar eh yn varriaght: ren eh keayney as jannoo accan huggey: hooar eh ayns Beth-el eh, as ayns shen ren eh loayrt rooin:

⁵ Eer y Chiarn, Jee ny flaunyssee, hug y Chiarn ennym da.

⁶ Shen-y-fa chyndaa uss gys dty Yee: freill myghin as briwnys, as farkee dy kinjagh er dty Yee.

⁷ T’eh ny varchan, ta meihaghyn dy volteyrys ayns e laue: t’eh soit er jannoo tranlaase.

⁸ As dooyrt Ephraim, Ny-yeih ta mee er n’aase berchagh, ta mee er chosney cooid: ayns ooilley my ghellal, cha vow ad veg y vee-chairys liorym, dy my ghoaill ayns loght.

⁹ As mish ta’n Chiarn dty Yee veih thalloo Egypt, ver foast ort freayll ayns cabbaneyn, myr ayns laghyn y feailley casherick shen.

¹⁰ Ta mee myrgeddin er loayrt liorish ny phadeyryn, as er vishaghey ashlishyn, as chliaghtee mee co-soylaghyn, liorish shirveish ny phadeyryn.

¹¹ Vel an-chiartys ayns Gilead? t’ad son shickyrys fardalys, t’ad ouralley dew ayns Gilgal; dy jarroo ta ny altaryn oc myr carnaneyn fud creaghyn y vagheragh.

¹² As ren Jacob chea gys cheer Syria, as ren Israel failley eh-hene son ben, as son ben v’eh ny vochilley keyrragh.

¹³ As liorish phadeyr hug y Chiarn lesh Israel magh ass Egypt, as liorish phadeyr v’eh er ny choadey.

¹⁴ Ren Ephraim eh y vrasnaghey gys jymmoose dewil, shen-y-fa faagee eh yn uill echey ersyn; as e nearey nee e Hiarn y chooilleeney er.