Hosea 11 - Yn Vible Casherick 1775 1819

CAB. XI

¹ Tra va Israel ny lhiannoo, eisht bynney lhiam eh, as deïe mee er my vac ass Egypt.

² Myr smoo deïe mee orroo, wheesh shen sodjey hie ad voym: ren ad ouralley gys Baalim, as lostey incense gys jallooyn grainnit.

³ Dynsee mee Ephraim myrgeddin dy hooyl, goaill ad er y laue; agh cha row geill oc dy nee mish va dy reir eh.

⁴ Hayrn mee ad lesh coyrdyn dooinney, lesh kianglaghyn dy ghraih, as va mee dauesyn myr adsyn ta goaill yn streean ass nyn meeal, as hug mee bee er nyn meealloo.

⁵ Cha jean eh chyndaa gys cheer Egypt; agh bee yn Assyrian y ree echey, er-yn-oyr dy ren ad gobbal dy hyndaa.

⁶ As nee yn cliwe tannaghtyn er e ard-valjyn, as ver eh mow e vanglaneyn, as stroie ad, kyndagh rish ny coyrleyn oc hene.

⁷ As ta my phobble soit er skyrraghtyn voym; ga dy row eam oc gys yn er smoo syrjey, cha dug fer erbee ard-voylley da.

⁸ Kys oddym scarrey rhyt, O Ephraim? kys oddym sauail oo, O Israel? kys nee’m oo myr Admah, as soiaghey jeed myr Zeboim? ta my chree er ny hyndaa cheu-sthie jee’m, ta my vyghinyn er ny ghreesaghey dy cheilley.

⁹ Cha jean-ym cooilleeney eulys my yymmoose, cha jean-ym chyndaa dy stroie Ephraim, son ta mish Jee, as cha nee dooinney, yn er-casherick ayns y vean ayd, as cha jig-ym stiagh ayns yn ard-valley [myr noid].

¹⁰ Nee ad gimmeeaght lurg y Chiarn: troggee eh seose e choraa myr lion: tra ver eh magh e choraa, eisht bee’n chloan er-creau voish y neear.

¹¹ Nee ad clussaghey myr ushag veih Egypt, as myr calmane ass cheer Assyria: as soie-ym ad ayns nyn dhieyn hene, ta’n Chiarn dy ghra.

¹² Ta Ephraim dy my chruinnaghey mygeayrt lesh breagyn, as thie Israel lesh molteyrys: agh ta Judah foast reill marish Jee, as t’eh ynrick marish ny nooghyn.