Hosea 10 - Yn Vible Casherick 1775 1819

CAB. X

¹ Ta Israel ny villey-feeyney gyn-ymmyd, t’eh gymmyrkey mess da hene: rere earroo e vess, t’eh er vishaghey e altaryn; rere foays e halloo, t’ad er n’yannoo jallooyn stoamey.

² Ta’n cree oc er ny rheynn; nish bee ad er ny gheddyn foiljagh: brishee eh sheese ny altaryn oc: as spooilley eh ny jallooyn oc.

³ Son nish jir adsyn, Cha vel ree ain, er-yn-oyr nagh ghow shin aggle roish y Chiarn; cre eisht t’ec ree dy yannoo rooin?

⁴ T’ad er loayrt goan oaiagh ayns jannoo conaant: myr shen ta briwnys gaase seose, myr yn aghaue ayns imraghyn y vagheragh.

⁵ Gowee cummaltee Samaria aggle, kyndagh rish jallooyn baagh Veth-aven: son nee yn pobble echey dobberan harrish, as ny saggyrtyn ghow boggey jeh’n ghloyr echey, son dy vel eh er n’immeeaght veih.

⁶ Bee eh myrgeddin er ny chur lesh gys Assyria son toyrtys gys ree Jareb: gowee Ephraim nearey, as bee Israel sniemmit ayns ribbey e choyrle hene.

⁷ Er son Samaria, ta’n ree ecksh giarit jeh myr kesh er yn ushtey.

⁸ Myrgeddin bee ard-ynnydyn Aven, peccah Israel currit naardey: hig yn dress as yn onnane seose er nyn altaryn; as jir ad rish ny sleityn, Coodee-jee shin, as rish ny croink, Tuitt-jee orrin.

⁹ O Israel, t’ou er chur-rish peccah veih laghyn Ghibeah: shen y raad hass ad: cha ren y caggey ayns Gibeah noi cloan ny drogh-yantee berraghtyn orroo.

¹⁰ Te ayns my aigney dy smaghtaghey ad: as bee yn pobble er ny chruinnaghey nyn ’oï, tra nee’m ad y cherraghey son y daa vee-chairys oc.

¹¹ As ta Ephraim myr colbagh ta ynsit, as shynney lh’ee stampey magh yn arroo, agh hug mish yn whing er e mwannal aalin: ver-yms er Ephraim tayrn: nee Judah traaue, as nee Jacob brishey e cheabyn.

¹² Cuirr-jee diu hene ayns cairys, buinn-jee ayns myghin: brish-jee seose yn thalloo banejagh eu: son te traa dy hirrey yn Chiarn, derrey hig eh dy gheayrtey neose cairys orrin.

¹³ Ta shiu er hraaue mee-chraueeaght, ta shiu er vuinn mee-chairys, ta shiu er n’ghoaill nyn soogh ayns y vess dy vreagyn; son dy dug oo dty varrant er dty raad hene, as er earroo dty gheiney niartal.

¹⁴ Shen-y-fa nee tharmane caggee troggal mastey dty phobble, as bee ooilley dty chashtallyn er ny spooilley, myr ren Shalman spooilley Beth-arbel ayns laa yn chaggey: va’n moir bransit gys peeshyn er e cloan.

¹⁵ Myr shen nee Beth-el riuish son mooadys nyn ghrogh-yannoo: ’sy vadran vees ree Israel dy bollagh giarit jeh.