Hosea 1 - Yn Vible Casherick 1775 1819

CAB. I

¹ Goo yn Chiarn haink gys Hosea, mac Veeri, rish lhing Uzziah, Yotham, Ahaz as Hezekiah, reeaghyn Yudah, as rish lhing Yeroboam mac Yoash ree Israel.

² Toshiaght goo yn Chiarn liorish Hosea: as dooyrt y Chiarn rish Hosea, Immee, as gow hood ben vaarderagh, as cloan oainjyragh: son ta’n cheer er ve foiljagh jeh maarderys vooar, coyrt cooyl da’n Chiarn.

³ Er shoh hie eh, as ghow eh Gomer, inneen Ghiblaim, ren gientyn as gymmyrkey mac da.

⁴ As dooyrt y Chiarn rish, Enmys eh Jezreel; son foast ayns traa gerrit kerree-yms fuill Yezreel er thie Yehu, as ver-ym jerrey er reeriaght thie Israel.

⁵ As hig eh gy-kione ’sy laa shen, dy brish-ym bow Israel ayns glione Yezreel.

⁶ As ren ee gientyn reesht, as gymmyrkey inneen; as dooyrt Jee rish, Enmys ee Lo-ruhamah: son cha bee ny-sodjey myghin aym er thie Israel; agh nee’m dy bollagh ad y astyrt.

⁷ Agh bee myghin aym er thie Yudah, as saue-ym ad liorish y Chiarn y Jee oc; agh cha nee liorish bow, ny liorish cliwe, ny liorish caggey, liorish cabbil, ny liorish markee, nee’m ad y hauail.

⁸ Nish tra v’ee er harbaa Lo-ruhamah, yien ee, as dymmyrk ee mac.

⁹ Eisht dooyrt Jee, Jean genmys eh shoh Lo-ammi: son cha vel shiuish yn pobble aym’s, as cha beem’s yn Jee euish.

¹⁰ Ny-yeih bee earroo cloan Israel myr genniagh ny marrey, nagh vod ve er ny howse, ny er ny choontey; as hig eh gy-kione, ’syn ynnyd ayn ve er ny ghra roo, Cha nee shiuish yn pobble aym’s, dy nee ayns shen bee eh graït roo, Shiuish mec y Jee bio.

¹¹ Eisht bee cloan Yudah, as cloan Israel er nyn jaglym dy cheilley, as nee ad reih magh leeideilagh daue hene, as hig ad seose ass y cheer: son s’mooar vees laa Yezreel!