Hebrewnee 8 - Yn Vible Casherick 1775 1819

CAB. VIII

¹ Nish mychione ny reddyn ta shin er loayrt, shoh’n bun: Ta lheid yn ard-saggyrt ain, ta soit er laue yesh stoyl-reeoil yn ard-ooashley ayns ny niaughyn;

² Shirveishagh yn ynnyd casherick, as y cabbane-agglish firrinagh, ta’n Chiarn er hroggal, as cha nee dooinney.

³ Son ta dy chooilley ard-saggyrt er ny oardaghey dy hebbal giootyn as ourallyn: shen-y-fa ve ymmyrchagh dy beagh red ennagh ec y dooinney shoh myrgeddin dy hebbal.

⁴ Son dy beagh eh er hannaghtyn er y thalloo, cha voddagh eh ve ny haggyrt, fakin dy vel saggyrtyn ayn ta chebbal giootyn cordail rish y leigh:

⁵ Ta shirveish fo caslys as scadoo reddyn flaunyssagh, myr hug Jee raaue da Moses tra v’eh mysh troggal yn cabbane-agglish. Son jeeagh (as eshyn) dy jean oo dy chooilley nhee cordail rish y sampleyr v’er ny ashlaghey dhyt er y chronk.

⁶ Agh nish t’eh er gheddyn shirveish foddey s’ooasle, ayns wheesh as dy vel eh myrgeddin eddyr Jee as shinyn son conaant share, va gruntit er gialdynyn syrjey.

⁷ Son dy beagh yn chied chonaant shen er ve gyn foill, cha beagh feme eisht jeeaghyn son conaant elley.

⁸ Son geddyn foill daue, t’eh gra, Cur-my-ner, hig ny laghyn (ta’n Chiarn gra) tra nee’m conaant noa rish thie Israel, as rish thie Yudah:

⁹ Cha nee cordail rish y chonaant ren mee rish ny ayraghyn oc ayns y laa ghow mee ad er y laue dy leeideil ad magh ass cheer Egypt; son nagh dreill ad my chonaant, as hreig mee ad, ta’n Chiarn dy ghra.

¹⁰ Son shoh’n conaant neem’s rish thie Israel lurg ny laghyn shen, ta’n Chiarn dy ghra; Ver-ym my leighyn ayns ny aignaghyn oc, as scrieu-ym ad er ny creeaghyn oc: as beem’s Jee dauesyn, as bee adsyn pobble dooys.

¹¹ As cha bee feme oc gynsaghey dagh dooinney e naboo, as dagh dooinney e vraar, gra, Cur-jee enney er y Chiarn; son ver ooilley enney orrym, veih’n er sloo gys yn er smoo.

¹² Son beem’s myghinagh da’n neu-ynrickys oc, as er nyn beccaghyn as nyn mee-chraueeaght cha gooin-ym arragh.

¹³ Ayns dy vel eh gra, Conaant noa, t’eh er n’yannoo yn chied [chonaant] shenn. Nish ta shen ta goll naardey as gaase shenn, aarloo dy lheïe ersooyl.