Hebrewnee 3 - Yn Vible Casherick 1775 1819

CAB. III

¹ Shen-y-fa, vraaraghyn chrauee, paarteeassyn ’syn eam flaunyssagh, cur-jee tastey mie da Yeesey Creest, ostyl as ard-saggyrt nyn gredjue:

² Va firrinagh dasyn ren eh y phointeil, myr va Moses myrgeddin firrinagh ayns ooilley e hie.

³ Son va’n dooinney shoh coontit feeu jeh gloyr syrjey na Moses, son wheesh as dy vel eshyn hrog y thie ny s’onnoroil na’n thie hene.

⁴ Son ta dy chooilley hie troggit liorish dooinney ennagh; agh eshyn hrog dy chooilley nhee she Jee eh.

⁵ As dy jarroo va Moses firrinagh ayns ooilley e hie myr sharvaant, son feanish gys ny reddyn va ny lurg shen dy ve focklit magh:

⁶ Agh Creest myr Mac harrish e hie hene: yn thie echeysyn ta shin, my ta shin cummal shickyr y dunnallys as boggey nyn dreishteil gys y jerrey.

⁷ Er-y-fa shen myr ta’n Spyrryd Noo dy ghra, Jiu my nee shiu clashtyn e choraa,

⁸ Ny creoi-jee nyn greeaghyn, myr ayns y vrasnagh, ayns laa yn violagh ayns yn aasagh:

⁹ Tra ren ny ayraghyn eu mish y vrasnaghey, phrow ad mee, as honnick ad m’obbraghyn da-eed bleïn.

¹⁰ Shen-y-fa va mee corree rish y cheeloghe shoh, as dooyrt mee. T’ad dy kinjagh goll er-shaghryn ayns nyn gree; as cha vel enney er ve oc er my raaidyn.

¹¹ Myr shen loo mee ayns my chorree, Cha jed ad stiagh ayns my ea.

¹² Cur-jee twoaie, vraaraghyn, nagh bee ayns veg eu drogh chree dy vee-chredjue, ayns treigeil y Jee bio.

¹³ Agh coyrlee-jee y cheilley gagh laa, choud as te enmyssit, Yn laa jiu: er-aggle dy bee veg eu er nyn greoghey liorish molteyrys peccah.

¹⁴ Son ta cairys ain ayns Creest, my ta shin cummal undin nyn marrantys ersyn shickyr gys y jerrey;

¹⁵ Myr te er ny ghra, Jiu my nee shiu clashtyn e choraa, ny creoi-jee nyn greeaghyn, myr ayns y vrasnagh.

¹⁶ Son paart, erreish daue clashtyn, ren ad brasnaghey: ny-yeih cha nee ooilley haink ass Egypt marish Moses.

¹⁷ Agh quoi liorish v’eh er ny vrasnaghey da-eed bleïn? nagh nee lioroosyn v’er n’yannoo peccah, ny callinyn oc huitt ’syn aasagh?

¹⁸ As quoi da ren eh loo, nagh ragh ad stiagh ’syn ea echey, agh dauesyn nagh ren credjal?

¹⁹ Myr shen hee mayd nagh voddagh ad goll stiagh kyndagh rish mee-chredjue.