Haggai 2 - Yn Vible Casherick 1775 1819

CAB. II

¹ Ayns y chiaghtoo vee, er yn un laa as feed jeh’n vee, haink goo yn Chiarn liorish y phadeyr Haggai, gra,

² Loayr nish rish Zerubbabel, mac Shealtiel, kiannoort Yudah, as rish Joshua, mac Yosedech, yn ard-saggyrt, as rish yn chooid elley jeh’n pobble, gra,

³ Quoi ta faagit ny mast’ eu honnick yn thie shoh ayns e chied ghloyr? as kys ta shiu fakin nish? nagh vel eh ayns ny sooillyn euish ayns co-soylaghey rish, myr red gyn veg?

⁴ As nish, bee uss dunnal, O Zerubbabel, ta’n Chiarn dy ghra, as bee uss dunnal, O Yoshua, mac Yosedech, yn ard-saggyrt, as bee-jee dunnal, ooilley shiuish phobble y cheer, ta’n Chiarn dy ghra, as lhie-jee rish yn obbyr: son ta mish mêriu, ta Chiarn ny flaunyssee dy ghra.

⁵ Rere bree yn chonaant ren mish riu, tra haink shiu magh ass Egypt, myr shen ta my spyrryd tannaghtyn ny mast’ eu: ny gow-jee aggle.

⁶ Son shoh myr ta Chiarn ny flaunyssee dy ghra, Foast yn un cheayrt shoh, as cha vel shen agh son tammylt, dy jean-yms craa ny niaughyn, as y thalloo, as y faarkey, as y thalloo chirrym:

⁷ As neem’s craa dy chooilley ashoon, as nee yeearree dy chooilley ashoon cheet, as lhieen-yms y thie shoh lesh gloyr, ta Chiarn ny flaunyssee dy ghra.

⁸ Lhiam’s yn argid, as lhiam’s yn airh, ta Chiarn ny flaunyssee dy ghra.

⁹ Bee gloyr y thie s’jerree shoh ny smoo na gloyr yn chied thie, ta Chiarn ny flaunyssee dy ghra: as ayns yn ynnyd shoh ver-yms shee, ta Chiarn ny flaunyssee dy ghra.

¹⁰ Ayns y chiarroo laa as feed jeh’n nuyoo vee, ayns y nah vleïn jeh reill Darius, haink goo yn Chiarn liorish Haggai yn phadeyr, gra,

¹¹ Shoh myr ta Chiarn ny flaunyssee dy ghra, Jean briaght nish jeh ny saggyrtyn mychione y leigh, gra,

¹² My nee peccagh erbee cur lesh feill chasherick ayns rumbyl e gharmad, as e eaddagh dy ventyn rish arran, ny poddash, ny feeyn, ny ooil, ny bee erbee, bee ad casherick? As dansoor ny saggyrtyn, as dooyrt ad, Cha bee ad.

¹³ Eisht dooyrt Haggai, My nee fer ta neu-ghlen liorish corp marroo bentyn rish veg jeh ny reddyn shoh, bee shen neu-ghlen? As dansoor ny saggyrtyn, as dooyrt ad, Bee eh neu-ghlen.

¹⁴ Eisht dreggyr Haggai, as dooyrt eh, Shen myr ta’n pobble shoh, as shen myr ta’n ashoon shoh roym’s, ta’n Chiarn dy ghra; as shen myr ta ooilley obbyr nyn laueyn, as cre-erbee t’ad dy hebbal ayns shen, te neu-ghlen.

¹⁵ As nish, ta mee guee erriu, smooinee-jee veih’n laa jiu, as roish shoh, my va clagh currit er clagh elley ayns chiamble y Chiarn.

¹⁶ Neayr ny laghyn shen, tra haink fer gys dash-arroo, jerkal rish feed tubbag, cha row echey agh jeih: tra haink fer gys y doagh-feeyney, dy lhiggey jeih siyn as da-eed, cha row echey agh feed.

¹⁷ Ren mee shiu y woalley lesh fowan, as lesh millchea, as lesh claghyn-sniaghtee ayns ooilley obbyr nyn laueyn, ny-yeih cha ren shiu chyndaa hym’s, ta’n Chiarn dy ghra.

¹⁸ Agh smooinee-jee nish veih’n laa shen as maghey shen, veih’n chiarroo laa as feed jeh’n nah vee, eer voish y laa va undin chiamble y Chiarn soit, smooinee-jee er.

¹⁹ Vel yn arroo foast ayns y toalt? dy jarroo cha vel y billey-feeyney, ny yn billey-figgagh, ny yn pomegranate, ny yn billey-olive foast er n’ymmyrkey nyn mess: veih’n laa shen neem’s shiu y vannaghey.

²⁰ As reesht haink goo yn Chiarn gys Haggai er y chiarroo laa as feed jeh’n vee, gra,

²¹ Loayr rish Zerubbabel kiannoort Yudah, gra, Neem’s craa ny niaughyn as y thalloo;

²² As tilg-ym bun-ry-skyn stoyl-reeoil reeriaghtyn, as stroie-yms niart reeriaghtyn ny ashoonee, as tilg-ym bun-ry-skyn ny fainee, as adsyn ta markiaght ayndoo, as hig ny cabbil as ny markee gys y thalloo, dy chooilley unnane liorish cliwe e vraar.

²³ Ayns y laa shen, ta Chiarn ny flaunyssee dy ghra, goym uss, O Zerubbabel, my harvaant, mac Shealtiel, ta’n Chiarn dy ghra, as nee’m oo myr cowrey: son ta mee er dty reih, ta Chiarn ny flaunyssee dy ghra.