Haggai 1 - Yn Vible Casherick 1775 1819

CAB. I

¹ Ayns y nah vleïn jeh ree Darius, ayns y cheyoo vee, er y chied laa jeh’n vee, haink goo yn Chiarn liorish Haggai yn phadeyr gys Zerubbabel, mac Shealtiel, kiannoort Yudah, as gys Joshua, mac Yosedech, yn ard-saggyrt, gra,

² Shoh myr ta Chiarn ny flaunyssee loayrt, gra, Ta’n pobble shoh gra, Cha vel y traa er jeet, yn traa son troggal thie yn Chiarn.

³ Eisht haink goo yn Chiarn liorish Haggai yn phadeyr, gra,

⁴ Nee shoh traa diuish, O gheiney, dy chummal ayns ny thieyn ceilit eu, as y thie shoh lhie ny hraartys?

⁵ Nish er-y-fa shen, shoh ta Chiarn ny flaunyssee dy ghra, Smooinee-jee er nyn raaidyn.

⁶ Ta shiu er chuirr mooarane, as er chur lhieu stiagh beggan: ta shiu gee, agh cha vel shiu jeant magh: ta shiu giu, agh cha vel shiu er chuir nyn baays: ta shiu coamrey shiu hene, agh cha vel shiu geddyn chiass: as eshyn ta toilliu faill, t’eh toilliu eh dy choyrt eh ayns sporran raipit.

⁷ Shoh ta Chiarn ny flaunyssee dy ghra, Smooinee-jee er nyn raaidyn.

⁸ Seose-jee gys y clieau, as cur-jee lhieu fuygh, as trog-jee yn thie, as goym’s taitnys ayn, as bee’m er my ghloyraghey, ta’n Chiarn dy ghra.

⁹ Va shiu jerkal rish mooarane, as cur-jee my-ner, haink beggan jeh; as tra hug shiu lhieu thie eh, heeb mee ersooyl eh. Cre’n-fa? ta Chiarn ny flaunyssee dy ghra. Kyndagh rish my hie’s ta treigit, as dy vel dy chooilley ghooinney jeidjagh mysh e hie hene.

¹⁰ Shen-y-fa ta’n druight er ny lhiettal ’syn aer harrishdiu, as cha vel y thalloo cur magh e mess.

¹¹ As deïe mee son fowan er y thalloo, as er ny sleityn, as er yn arroo, as er y feeyn noa, as er yn ooil, as er dty chooilley nhee ta’n thalloo dy ymmyrkey, as er deiney, as er maase, as er slane troar y thallooin.

¹² Eisht hug Zerubbabel mac Shealtiel, as Joshua mac Yosedech yn ard-saggyrt, marish ooilley’n chooid elley jeh’n pobble, biallys da goo yn Chiarn nyn Yee, as da goan Haggai yn phadeyr (son dy nee yn Chiarn nyn Yee ren eh y choyrt) as ghow yn pobble aggle roish y Chiarn.

¹³ Eisht loayr Haggai chaghter y Chiarn, ayns chaghteraght y Chiarn, rish y pobble, gra, Ta mish mêriu, ta’n Chiarn dy ghra.

¹⁴ As ghrein y Chiarn seose spyrryd Zerubbabel, mac Shealtiel, kiannoort Yudah, as spyrryd Yoshua, mac Yosedech, yn ard-saggyrt, as spyrryd ooilley’n chooid elley jeh’n pobble, as haink ad, as hie ad laue rish yn obbyr ayns thie Chiarn ny flaunyssee, nyn Yee.

¹⁵ Er y chiarroo laa as feed jeh’n cheyoo vee, ayns y nah vleïn jeh reill ree Darius.