Habakkuk 3 - Yn Vible Casherick 1775 1819

CAB. III

¹ Padjer Habakkuk y phadeyr er Shigionoth.

² O Hiarn, ta mee er chlashtyn dty choraa, as va aggle orrym: O Hiarn, jean dty obbyr y aa-vioghey ayns mean ny bleeantyn, jean soilshaghey; ayns dty yymmoose smooinee er myghin.

³ Haink Jee veih Teman, as yn er-casherick veih slieau Pharan. Selah. Ren y ghloyr echey coodaghey ny niaughyn, as va’n seihll lane jeh e voylley.

⁴ As va’n aalid echey myr yn soilshey, veih yn laue echey va’n sollyssid goll magh, as shen y raad va folliaght e niart.

⁵ Roishyn hie yn phaitt, as veih e chassyn hie magh smarageyn aileagh.

⁶ Hass eh, as ren eh towshan y thalloo: hug eh my-ner, as ren eh skeayley ny ashoonyn, as va ny sleityn foddey beayn tilgit bun-ry-skyn, ren ny croink syrjey croymmey: ta e raaidyn son dy bragh.

⁷ Honnick mee cabbaneyn Chushan ayns seaghyn: as va curtanyn cheer Vidian er-creau.

⁸ Nee rish ny awinyn va’n Chiarn jymmoosagh? nee noi ny ushtaghyn va dty eulys? row dty chorree rish y cheayn, dy ren oo markiagh lesh dty chabbil, ayns dty ainee dy haualtys?

⁹ Va dty vhow slane tayrnit, rere breearrey ny tribeyn, eer dty ghoo. Selah. Ren oo brishey trooid y thalloo lesh thooillaghyn.

¹⁰ Honnick ny sleityn oo, as v’ad er-creau; ren ny thooillaghyn ushtey lhieeney harrish: ren y diunid freaney lesh e choraa, as gatt seose dy ard er dagh cheu.

¹¹ Hass y ghrian, as yn eayst ayns nyn ynnyd: ec soilshey dty hideyn ren ad getlagh, as ec sollyssid dty shleiy soilsheanagh.

¹² Ren oo marchal trooid y cheer ayns jymmoose, ren oo dy myn broo ny ashoonee ayns dty eulys.

¹³ Hie oo magh son saualtys dty phobble, eer son saualtys dty er-ooilit; t’ou er lhottey kione thie ny mee-chrauee, liorish rassey yn undin gys y chreg lhome. Selah.

¹⁴ Ren oo lesh dty lorg-reill brishey trooid king e valjyn: haink ad magh myr geay-chassee dy my skeayley: va’n boggey ocsyn dy stroie ny boghtyn dy follit.

¹⁵ Ren oo shooyl trooid y cheayn lesh dty chabbil, trooid thooillaghyn dy ushtaghyn mooarey.

¹⁶ Tra cheayll mee, va my chree traishtit: va my veillyn er-creau ec yn choraa: ren loauid greimmey my chraueyn, as va mee ooilley er-creau: O dy beign ec fea veih’n laa seaghnagh! tra hig eh seose noi yn pobble, hig eh stiagh orroo lesh e heshaghtyn-caggee.

¹⁷ Ga nagh der y billey-figgagh magh e vlaa, as nagh bee mess er ny biljyn-feeyney; dy jean foast yn billey-olive failleil, as nagh jean ny magheryn gymmyrkey beaghey: dy bee yn chioltane giarit jeh veih’n woaillee, as nagh bee dew ayns ny bwaneyn:

¹⁸ Ny-yeih neem’s mee hene y gherjaghey ayns y Chiarn, as goym boggey ayns Jee my haualtys.

¹⁹ Ta’n Chiarn Jee my niart, as nee eh my chassyn myr cassyn feeaïh, as ver eh orrym shooyl er my ynnydyn ard. Gys yn ard-chiaulleyder er my ghreïnyn strengit.