Genesis 8 - Yn Vible Casherick 1775 1819

CAB. VIII

¹ As chooinee Jee er Noah, as er dagh cretoor bio, as er ooilley yn maase va mârish ’syn arg: as hug Jee er geay dy heidey harrish y thalloo, as ren ny ushtaghyn sloateil.

² Va myrgeddin thooillaghyn y diunid, as uinniagyn yn aer dooint seose, as va’n fliaghey veih’n aer er ny lhiettal.

³ As ren ny ushtaghyn traie jeh’n thalloo dy kinjagh: as lurg kione shiaght-feed laa as jeih va ny ushtaghyn er sloateil.

⁴ As ayns y chiaghtoo vee, er y chiaghtoo laa yeig jeh’n vee, ghow yn arg grunt er sleityn Ararat.

⁵ As ren ny ushtaghyn lhaggaghey dy kinjagh derrey’n jeihoo vee. Ayns y jeihoo vee, er y chied laa jeh’n vee, haink mullagh ny sleityn rish.

⁶ As haink eh gy-kione lurg da-eed laa, dy ren Noah fosley uinniag yn arg v’eh er hroggal.

⁷ As hug eh magh feeagh, dettyl noon as noal derrey va ny ushtaghyn chyrmit seose jeh’n thalloo.

⁸ Myrgeddin hug eh magh calmane, dy akin row ny ushtaghyn er sloateil jeh eaghtyr y thallooin.

⁹ Agh cha dooar y calmane ynnyd dy choyrt e chass er, as hyndaa ee huggey reesht gys yn arg: son va ny ushtaghyn er slane eaghtyr y thallooin: eisht heeyn eh magh e laue, as ghow eh ee, as hayrn eh ee stiagh huggey ’syn arg.

¹⁰ As ren eh farkiaght foast shiaght laa elley, as hug eh reesht yn calmane magh veih yn arg.

¹¹ As haink y calmane stiagh huggey ’syn astyr, as cur-my-ner, ayns e veeal va duillag olive pluckit jeh; myr shoh va fys ec Noah, dy row ny ushtaghyn er draie jeh’n thalloo.

¹² As duirree eh foast shiaght laa elley, as hug eh magh y calmane, nagh daink back huggey arragh.

¹³ As haink eh gy-kione ’sy cheyoo cheead as un vleïn, ayns y chied vee, er y chied laa jeh’n vee, dy row ny ushtaghyn er draie jeh’n thalloo: as scugh Noah yn coodagh jeh’n arg, as yeeagh eh magh, as Cur-my-ner, va eaghtyr y thalloo er jeet rish.

¹⁴ As ayns y nah vee, er y chiaghtoo laa as feed jeh’n vee va’n thalloo er jyrmaghey.

¹⁵ As loayr Jee rish Noah, gra.

¹⁶ Gow magh ass yn arg, uss, as dty ven, as dty vec, as mraane dty vec mayrt.

¹⁷ Cur lhiat magh dy chooilley nhee bio ta mayrt, jeh dy chooilley ghooghys, chammah jeh ny eeanlee, as jeh’n maase, as jeh dagh cretoor ta snaue er y thalloo; dy vod ad cheet er-ash dy palchey er y thalloo, as ve messoil, as bishaghey er yn ooir.

¹⁸ As hie Noah magh, as e vec, as e ven, as mraane e vec mârish:

¹⁹ Dy chooilley vaagh, dy chooilley nhee snauee, as dy chooilley eean, as cre-erbee ta snaue er y thalloo, lurg nyn geint, hie ad magh ass yn arg.

²⁰ As hrog Noah altar da’n Chiarn, as ghow eh jeh dagh baagh glen, as jeh dagh eean glen, as heb eh ourallyn-losht er yn altar.

²¹ As ren y Chiarn soiagh dy mie jeh’n oural, as dooyrt y Chiarn ayns e chree, Cha jean-ym arragh yn seihll y stroie er yn aght shoh, er coontey sheelnaue; ga dy vel smooinaghtyn chree dooinney peccoil veih e aegid: chamoo nee’m arragh dagh nhee bio y stroie, myr ta mee er n’yannoo.

²² Choud as ta’n seihll er-mayrn, cha jean traa-correy, as fouyr, feayraght as chiass, sourey as geurey, laa as oie, dy bragh failleil.