Genesis 50 - Yn Vible Casherick 1775 1819

CAB. L

¹ As chroym Joseph er eddin e ayrey as cheayn eh harrish, as phaag eh eh.

² As doardee Joseph da e harvaantyn ny fir-lhee, dy choyrt spiceyn er corp e ayrey [dy reayll eh veih loauys] as ren ny fir-lhee corp Israel y spiceal.

³ As va da-eed laa er ny chooilleeney er e hon (son choud shen ta er nyn gooilleeney ny laghyn ocsyn ta jeant seose lesh spiceyn ry-hoi freayll) as ren ny Egyptianee dobberan er e hon three-feed laa as jeih.

⁴ As tra va laghyn y dobberan er e hon ec kione, loayr Joseph rish lught-thie Pharaoh, gra, My ta mee nish er gheddyn foayr ayns y chilley eu, loayr-jee, ta mee guee erriu, ayns clashtyn Pharaoh, gra,

⁵ Hug m’ayr orrym breearrey, gra, cur-my-ner, ta mish goll dy baase: ayns yn oaie, ta mee er chiarail dou hene ayns cheer Chanaan, ayns shen nee uss mish y oanluckey: nish, er-yn-oyr shoh, lhig dou goll seose, ta mee guee ort, dy oanluckey m’ayr, as hig-ym reesht.

⁶ As dooyrt Pharaoh, Immee seose, as jean dt’ayr y oanluckey, cordail rish y breearrey t’ou er ghoaill.

⁷ As hie Joseph seose dy oanluckey e ayr; as mârishyn hie seose ooilley sharvaantyn Pharaoh, shanstyr e hie, as ooilley shanstyr cheer Egypt.

⁸ As ooilley thie Yoseph, as e vraaraghyn, as thie e ayrey: cha daag ad agh y vooinjer veggey oc, as ny shioltaneyn, as ny immanyn oc ayns thalloo Ghoshen.

⁹ As hie seose mârish, chammah fainee as markee: as v’ad sheshaght feer vooar.

¹⁰ As haink as gys laare-arroo Atad, ta er cheu elley dy Yordan, as ayns shen ren ad dobberan ard as feer trimshagh er-e-skyn: as ren eh dobberan son e ayr shiaght laa.

¹¹ As tra honnick cummaltee’n cheer, ny Canaaniteyn, y dobberan ayns laare Atad, dooyrt ad, Ta shoh dobberan trome da ny Egyptianee: shen-y-fa, ta’n boayl shen enmyssit Abel-mizraim, t’er cheu elley Yordan.

¹² As ren e vec rish, cordail myr hug eh currym orroo.

¹³ Son hug e vec lhieu eh gys cheer Chanaan; as doanluck ad eh ayns lhiaght magher Machpelah; chionnee Abraham marish y vagher, son grunt oanluckee, veih Ephron yn Hittite, er-gerrey da Mamre.

¹⁴ As hyndaa Joseph reesht gys Egypt, eh hene as e vraaraghyn, as ooilley ny hie seose mârish dy oanluckey e ayr, erreish da ve er n’oanluckey e ayr.

¹⁵ As tra honnick braaraghyn Yoseph dy row nyn ayr marroo, dooyrt ad, Foddee dy der Joseph dwoaie dooin, as gowee eh son shickyrys cooilleeney orrin son ooilley’n olk ren shin rish.

¹⁶ As hug ad chaghteryn gys Joseph, gra Hug dt’ayr sarey my dooar eh baase, gra,

¹⁷ Myr shoh nee shiu loayrt rish Joseph, Leih, ta mee guee ort nish, aggair dty harvaantyn, as y loght oc: son ren ad dy olk rhyt: as nish, ta shin guee ort, leih peccah sharvaantyn Yee dt’ayrey. As cheayn Joseph, tra loayr ad rish.

¹⁸ As hie e vraaraghyn myrgeddin, as huitt ad sheese ’syn enish echey, as dooyrt ad, Cur-my-ner, ta shinyn dty harvaantyn.

¹⁹ As dooyrt Joseph roo, Ny gow-jee aggle: son vel mish ayns ynnyd Yee?

²⁰ Agh er ny son euish, ren shiu smooinaghtyn dy olk m’oï; agh chiare Jee eh son bannaght, dy chur lesh eh mygeayrt, myr te er y laa t’ayn jiu, dy hauail mooarane pobble bio.

²¹ Nish er-y-fa shen, ny gow-jee aggle: neem’s shiuish as nyn gloan y veaghey: as ren eh ad y gherjaghey, as loayr eh dy dooie roo.

²² As ren Joseph beaghey ayns Egypt, eh hene as thie e ayrey: as eash Yoseph va queig-feed as jeh bleeaney.

²³ As honnick Joseph cloan Ephraim, jeh’n trass heeloghe: myrgeddin va cloan Vachir, mac Vanasseh, troggit seose er glioonyn Yoseph.

²⁴ As dooyrt Joseph rish e vraaraghyn, Ta my vaase er-gerrey: as nee Jee son shickyrys jeeaghyn erriu, as ver eh lesh shiu ass y cheer shoh, gys y cheer yiall eh liorish breearrey da Abraham, da Isaac, as Jacob.

²⁵ As ghow Joseph loo jeh cloan Israel, gra, Nee Jee son shickyrys jeeaghyn erriu, as ver shiu lhieu seose my chraueyn veih shoh.

²⁶ Myr shoh hooar Joseph baase, as va e eash queig-feed as jeih bleeaney: as ren ad yn corp echey ’spiceal, ad v’eh er ny choyrt ayns coffin ayns Egypt.