Genesis 5 - Yn Vible Casherick 1775 1819

CAB. V

¹ Shoh lioar sheelogheyn Adam. ’Sy laa ren Jee dooinney y chroo, ayns caslys Yee ren eh eshyn y chroo:

² Fyrrynagh as bwoirrynagh chroo eh ad: as vannee eh ad, as denmys eh yn ennym oc Adam, er y laa v’ad er nyn groo.

³ As va Adam shey-feed bleïn as jeih dy eash, as hooar eh mac ayns e chaslys hene, goll-rish hene; as ren eh genmys eh Seth.

⁴ As va eash Adam lurg da Seth ve ruggit, hoght cheead bleïn. As va echey mec as inneenyn.

⁵ As va slane eash Adam nuy cheead as jeih bleeaney as feed, as hooar eh baase.

⁶ As va Seth queig-feed as queig bleeaney dy eash, as va echey Enos.

⁷ As lurg da Enos ve ruggit, va Seth hoght cheead bleïn as shiaght; as va echey mec as inneenyn.

⁸ As va slane eash Seth nuy cheead as daa vleïn jeig, as hooar eh baase.

⁹ As va Enos kiare-feed bleïn as jeih dy eash, as va echey Cainan:

¹⁰ As lurg da Cainan ve ruggit, va Enos hoght cheead bleïn as queig-jeig, as va echey mec as inneenyn:

¹¹ As va slane eash Enos nuy cheead bleïn as queig, as hooar eh baase.

¹² As va Cainan three-feed bleïn as jeih dy eash, as va echey Mahalaleel:

¹³ As lurg da Mahalaleel ve ruggit, va Cainan hoght cheead bleïn as da-eed, as va echey mec as inneenyn.

¹⁴ As va slane eash Cainan nuy cheead bleïn as jeih: as hooar eh baase.

¹⁵ As va Mahalaleel three-feed bleïn as queig dy eash, as va echey Jared:

¹⁶ As lurg da Jared ve ruggit, va Mahalaleel hoght cheead bleïn as jeih as feed, as va echey mec as inneenyn:

¹⁷ As va slane eash Mahalaleel hoght cheead bleïn as kiare-feed as queig-jeig: as hooar eh baase.

¹⁸ As va Jared hoght-feed as daa vleïn dy eash, as va echey Enoch.

¹⁹ As lurg da Enoch ve ruggit va Jared hoght cheead bleïn, as va echey mec as inneenyn:

²⁰ As va slane eash Jared nuy cheead bleïn three-feed as jees: as hooar eh baase.

²¹ As va Enoch three-feed bleïn as queig dy eash, as va echey Methuselah.

²² As ren Enoch gimmeeaght myr ayns fenish Yee, lurg da v’er gheddyn Methuselah, three cheead bleïn, as hooar eh mec as inneenyn:

²³ As va slane eash Enoch three cheead bleïn, three-feed as queig:

²⁴ As ren Enoch gimmeeaght myr ayns fenish Yee, as cha dooar eh baase, son ghow Jee eh, huggey hene.

²⁵ As va Methuselah nuy-feed bleïn as shiaght dy eash, as va echey Lamech:

²⁶ As lurg da Lamech ve ruggit, va Methuselah shiaght cheead bleïn as kiare-feed as jees, as va echey mec as inneenyn.

²⁷ As va slane eash Methuselah nuy cheead bleïn three-feed as nuy: as hooar eh baase.

²⁸ As va Lamech nuy-feed bleïn as jees dy eash, as va mac echey.

²⁹ As ren eh genmys eh Noah, gra, Nee eh shoh shin y gherjaghey ayns nyn obbyr as tooilleil nyn laueyn, kyndagh rish y thalloo ta’n Chiarn er gheyrey:

³⁰ As lurg da Noah ve ruggit, va Lamech queig cheead bleïn as kiare-feed as queig-jeig, as va echey mec as inneenyn:

³¹ As va slane eash Lamech shiaght cheead bleïn three-feed as shiaght-jeig: as hooar eh baase.

³² As va Noah queig cheead bleïn dy eash: as hooar Noah Shem, Ham, as Japheth.