Genesis 49 - Yn Vible Casherick 1775 1819

CAB. XLIX

¹ As hug Jacob fys er e vec, as dooyrt eh, Tar-jee cooidjagh, dy voddym soilshaghey diu, shen ny ta kiarit dy heet erriu, ayns ny earishyn ta ry-heet.

² Tar-jee dy cheilley, as clasht-jee shiuish vec Yacob, as eaisht-jee rish Israel nyn ayr.

³ Reuben, uss my vac shinney, my hroshid, as toshiaght my niart, goaill y raad ayns ooashley as yn yrjid dy phooar.

⁴ Neu-hickyr myr ushtey, cha nee uss vees yn fer syrjey, er-yn-oyr dy jagh oo seose gys lhiabbee dt’ayrey: er shen ren oo aggair; hie eh seose gys my lhiabbee.

⁵ Ta Simeon as Levi braaraghyn [ayns drogh-yannoo] ta ny greinyn-caggee dy ghewlys ayns ny ynnydyn-vaghee oc.

⁶ O m’annym, ny gow uss ayrn ’sy choyrle follit oc; gys y cheshaght oc, O my ooashley, ny bee uss er dty lhiantyn: son ayns y chorree oc, ren ad dooinney ’ghunverys, as ayns dewlys nyn farg, lhieg ad sheese voallaghyn,

⁷ Dy row mollaght er y farg oc, son ve eulyssagh; as y jymmoose oc, son ve dewil: neem’s ad y scarrey ayns Jacob, as ad y skeayley ayns Israel.

⁸ Yudah, uss eh da ver dty vraaraghyn moylley; bee dty laue ayns mwannal dty noidyn: nee cloan dty ayrey croymmey sheese kiongoyrt rhyt.

⁹ Ta Judah myr quallian y lion; veih’n spooilley, my vac, t’ou er n’gholl seose, chroym eh sheese, heeyn eh eh-hene myr lion; as myr shenn lion; quoi s’loys y ghoostey eh?

¹⁰ Cha jean y lorg-reill failleil veih Judah, ny fer-toyrt y leigh veih e luight, derrey nee Shiloh cheet: as huggeysyn, vees ny ashoonee er nyn jaglym stiagh.

¹¹ Kiangley yn sharragh echey gys y billey-feeyney, as lhiy e assyl gys y reih billey-feeyney; niee eh e choamraghyn ayns feeyn, as e eaddagh ayns fuill ny smeïr-feeyney.

¹² Bee e hooillyn jiarg lesh feeyn, as ny feeacklyn echey bane lesh bainney.

¹³ Nee Zebulun cummal ec purt ny marrey; as bee eh son purt lhuingey; as bee’n slyst echey roshtyn gys Zidon.

¹⁴ Ta Issachar ny assyl loor, croymmey eddyr daa errey.

¹⁵ As honnick eh dy row aash mie; as y thalloo dy row eh aalin; as chroym eh e gheaylin gys yn errey, as haink eh dy ve ny harvaant fo keesh.

¹⁶ Nee Dan briwnys e phobble, myr fer jeh tribeyn Israel.

¹⁷ Bee Dan myr ard-nieu er y raad, adder ’sy chassan; ta lhottey boynyn ny gabbyl, myr shen dy jean y markiagh echey tuittym gour e ghrommey.

¹⁸ Ta mee er farkiaght son dty haualtys, O Hiarn.

¹⁹ Gad, nee sheshaght-chaggee y varriaght ’gheddyn er, agh yiow eshyn laue yn eaghtyr fy-yerrey.

²⁰ Mychione Asher, bee e arran veih meeaylys y thallooin, as nee eh gymmyrkey beaghey reeoil.

²¹ Ta Naphtali myr feeaih feayshlit: ta e ghlare lesh focklyn brynnagh.

²² Ta Joseph ny vanglane messoil, eer ny vanglane messoil liorish chibbyr; ta ny banglaneyn echey skeayley harrish y voalley.

²³ Ta ny sideyryn er heaghney eh dy trome, as er lhiggey er, as er choyrt dwoaie da.

²⁴ Agh chum e vhow lesh niart, as va roihaghyn e laueyn er nyn niartaghey, liorish laueyn Yee niartal Yacob: veih shen ta’n vochilley, creg Israel.

²⁵ Eer liorish Jee dt’ayrey, nee cooney lhiat, as liorish yn ooilley-niartal, nee uss y vannaghey, lesh bannaghtyn niau heose, bannaghtyn y diunid heese, bannaghtyn ny keeaghyn, as y vreïn.

²⁶ Ta Bannaghtyn dt’ayrey erskyn bannaghtyn my henn-ayryn, gys yn ard sodjey magh jeh ny sleityn dy bragh farraghtyn: bee ad er kione Yoseph, as er mullagh y chione echeysyn, v’er ny scarrey veih e vraaraghyn.

²⁷ Bee Benjamin myr moddey-oaldey jollyssagh: ayns y voghrey, stroie-ee eh yn chragh t’eh dy hayrtyn; as ec yn oie, rheynnee eh yn spooilley.

²⁸ Ad shoh ooilley daa hribe jeig Israel; as shoh eh, ny loayr nyn ayr roo, as vannee eh ad; cordail rish e vannaght er-lheh, vannee eh dagh unnane oc.

²⁹ As hug eh currym orroo, as dooyrt eh roo, Ta mish dy ve er my haglym gys my gheiney: jean-jee mee y oanluckey marish m’ayraghyn, ayns y lhiaght t’ayns magher Ephron yn Hittite.

³⁰ (Ayns y lhiaght, t’ayns magher Machpelah, ta liorish Mamre, ayns cheer Chanaan, chionnee Abraham, marish magher Ephron yn Hittite, son possession dy ghrunt oanluckee.)

³¹ Ayns shen doanluck ad Abraham, as Sarah e ven; ayns shen doanluck ad Isaac as Rebekah e ven; as ayns shen ren mish Leah y oanluckey.

³² Va cairys y vagher, as yn ooig t’ayn, kionnit veih cloan Heth.

³³ As tra va Jacob erreish currym y choyrt da e vec, hayrn eh seose e chassyn ’sy lhiabbee, as phaart eh, as v’eh oanluckit marish e ghooie.