Genesis 47 - Yn Vible Casherick 1775 1819

CAB. XLVII

¹ Eisht haink Joseph, as dinsh eh da Pharaoh, as dooyrt eh, Ta m’ayr as my vraaraghyn, as nyn shioltaneyn, as nyn immanyn, as ooilley ny t’oc, er jeet veih cheer Chanaan; as cur-my-ner, t’ad ayns thalloo Ghoshen.

² As ghow eh queig jeh e vraaraghyn, as hug eh lesh ad fenish Pharaoh.

³ As dooyrt Pharaoh rish e vraaraghyn, Cre ta nyn aght beaghee? As dooyrt ad rish Pharaoh, Ta dty harvaantyn nyn mochillyn, chammah shinyn as myrgeddin nyn ayraghyn.

⁴ Dooyrt ad ny sodjey rish Pharaoh, Dy chummal [son traa] ayns y cheer ta shin er jeet: son cha vel pastyr erbee ec dty harvaantyn son ny shioltaneyn oc, son ta’n ghortey trome ayns cheer Chanaan: nish er-y-fa shen, ta shin guee ort, lhig da dty harvaantyn cummal ayns thalloo Ghoshen.

⁵ As loayr Pharaoh rish Joseph gra, Ta dt’ayr as dty vraaraghyn er jeet hood:

⁶ Ta cheer Egypt kiongoyrt rhyt, ayns yn ayrn share ’sy cheer, lhig da dt’ayr, as dty vraaraghyn cummal, ayns thalloo Ghoshen lhig daue cummal: as my shione dhyt deiney erbee aghtal ny mast’ oc, eisht soie ad son ard-vochillyn harrish y maase aym’s.

⁷ As hug Joseph lesh Jacob e ayr stiagh, as heb eh eh fenish Pharaoh: as ren Jacob Pharaoh y vannaghey.

⁸ As dooyrt Pharaoh rish Jacob, Cre’n eash oo?

⁹ As dooyrt Jacob rish Pharaoh, Ta laghyn bleeantyn my hroailtys shey-feed bleïn as jeih: giare as seaghnagh ta er ve laghyn bleeantyn my vea, as cha vel mee er roshtyn gys eash my henn-ayryn ayns laghyn nyn droailtys.

¹⁰ As vannee Jacob Pharaoh, as hie eh magh veih fenish Pharaoh.

¹¹ As hug Joseph ynnyd da e ayr as e vraaraghyn, as hug eh cummal daue ayns cheer Egypt, ayns yn ayrn share jeh’n cheer, ayns thalloo Rameses, myr va Pharaoh er n’oardaghey.

¹² As ren Joseph magh e ayr, as e vraaraghyn, as ooilley lught-thie e ayrey, lesh arran, cordail rish nyn lught-thie.

¹³ As haink yn arran dy ve feer ghoan ayns ooilley’n cheer: son va’n ghortey feer trome, myr shen dy row cheer Egypt, as ooilley cheer Chanaan goll naardey kyndagh rish y ghortey.

¹⁴ As hrog Joseph ooilley yn argid v’er ny gheddyn ayns cheer Egypt, as ayns cheer Chanaan, son yn arroo v’ad er gionnaghey: as hug Joseph lesh yn argid gys thie Pharaoh.

¹⁵ As tra daill yn argid ayns cheer Egypt, as ayns cheer Chanaan, haink ooilley ny Egyptianee gys Joseph, as dooyrt ad, Cur dooin arran: son cre’n-fa yioghe shin baase ayns dty enish? son ta’n argid baarit.

¹⁶ As dooyrt Joseph, Cur-jee nyn maase, as ver-yms diu beaghey ayns coonrey, my ta’n argid baarit.

¹⁷ As hug ad lhieu yn maase oc gys Joseph: as hug Joseph arran daue ayns coonrey, son cabbil, as son ny shioltaneyn, as son maase nyn shellooyn, as son ny assylyn, as ren eh magh ad lesh arran, ayns coonrey son ooilley’n maase oc, son y vleïn shen.

¹⁸ Tra va’n vleïn shen ec kione, haink ad huggey yn vleïn er-giyn, as dooyrt ad rish, Cha jean mayd keiltyn eh veih my hiarn, dy vel yn argid ain baarit; ta ny shioltaneyn ain myrgeddin ec my hiarn; cha vel monney faagit ayns shilley my hiarn, agh ny kirp ain, as y thalloo.

¹⁹ Cre’n-fa ragh shin naardey kiongoyrt rish dty hooillyn, chammah shinyn as y thalloo ain? kionnee shin as y thalloo ain son arran, as bee mayd hene marish y thalloo ain fo shirveish gys Pharaoh: as cur dooin arroo-correy dy vod mayd ve bio, nagh jem mayd naardey, as nagh bee’n thalloo ny aasagh.

²⁰ As chionnee Joseph ooilley thalloo Egypt da Pharaoh; son chreck ny Egyptianee dy chooilley ghooinney e vagher, er-yn-oyr dy row’n ghortey er ghoaill niart orroo, myr shoh haink y thalloo dy ve lesh Pharaoh.

²¹ As er son y pobble, scugh eh ad gys ard-valjyn, veih’n derrey chione jeh ardjyn Egypt, eer gys y chione elley.

²² Agh thalloo ny saggyrtyn cha chionnee eh: son va beaghey ec ny saggyrtyn pointit daue liorish Pharaoh, as ren ad beaghey er yn ayrn hug Pharaoh daue; shen-y-fa cha chreck ad y thalloo ocsyn.

²³ Eisht dooyrt Joseph rish y pobble, Cur-jee my-ner, ta mish jiu er chionnaghey shiu hene, as y thalloo eu da Pharaoh: Jeeagh-jee, shoh rass diu, as nee shiu cuirr y thalloo.

²⁴ As shoh myr vees eh, mychione y troar, dy der shiu yn wheiggoo ayrn da Pharaoh, as bee kiare ayrnyn lhieu hene, son rass dy chuirr, as son nyn meaghey hene, as son nyn mooinjer, as son beaghey da nyn gloan.

²⁵ As dooyrt ad, T’ou er hauail nyn mioys: lhig dooin foayr y gheddyn ayns shilley my hiarn, as bee mayd sharvaantyn Pharaoh.

²⁶ As ren Joseph eh ny leigh harrish cheer Egypt, gys y laa t’ayn jiu, dy beagh yn wheiggoo ayrn ec Pharaoh; er-lhimmey jeh thalloo ny saggyrtyn ny-lomarcan, nagh row dy ve lesh Pharaoh.

²⁷ As ren Israel cummal ayns cheer Egypt, ayns thalloo Ghoshen; as va cummallyn oc ayn, as ghow ad toshiaght, as ren ad bishaghey erskyn towse.

²⁸ As ren Jacob beaghey ayns cheer Egypt shiaght bleeaney jeig: myr shoh va slane eash Yacob shiaght-feed bleïn as shiaght.

²⁹ As hayrn y traa er-gerrey dy row Israel dy gheddyn baase, as hug eh fys er e vac Joseph, as dooyrt eh rish, My ta mee nish er gheddyn foayr ayns dty hilley, cur, ta mee guee ort, dty laue fo my lheayst, as jean dellal dy dooie as dy firrinagh rhym: ny jean mish y oanluckey, ta mee guee ort, ayns Egypt.

³⁰ Agh m’aigney eh dy lhie marish m’ayraghyn, as ver oo lhiat mee ass Egypt, as nee oo m’oanluckey ’sy ghrunt oanluckee ocsyn. As dooyrt eh, Nee’m myr t’ou er ghra.

³¹ As dooyrt eh, Jean breearrey dou: as ren eh breearrey da, as ren Israel ooashlaghey, croymmey er e lorg, ny hoie ec kione ny lhiabbagh.