Genesis 46 - Yn Vible Casherick 1775 1819

CAB. XLVI

¹ As ghow Israel e yurnah lesh ooilley ny v’echey, as haink eh gys Beer-sheba, as heb eh ourallyn da Jee e ayr Isaac.

² As loayr Jee rish Israel ayns ashlishyn ny hoie, as dooyrt eh, Yacob, Yacob. As dooyrt eh, Ta mee ayns shoh.

³ As dooyrt eh, Mish Jee, Jee dty ayrey: ny bee aggle ort dy gholl sheese gys Egypt; son neem’s jeed’s ayns shen ashoon mooar.

⁴ Hem’s sheese mayrt gys Egypt; as son shickyrys, ver-yms lhiam oo myrgeddin seose reesht: as nee laueyn Yoseph dy hooillyn y yeigh [ec dty vaase:]

⁵ As hrog Jacob er veih Beer-sheba: as hug mec Israel lhieu Jacob nyn ayr, as y vooinjer veggey, as ny mraane oc, ayns ny waggonyn va Pharaoh er choyrt dy chur lhieu eh.

⁶ As ghow ad nyn maase, as nyn gooid v’ad er gheddyn ayns cheer Chanaan, as haink ad gys Egypt, Jacob, as ooilley e luight mârish:

⁷ E vec, as cloan e chlienney mârish, e inneenyn, as inneenyn e vec, as ooilley e luight hug eh lesh marish gys Egypt.

⁸ As shoh enmyn cloan Israel haink gys Egypt, Jacob as e vec: Reuben mac shinney Yacob.

⁹ As mec Reuben; Hanoch, as Phallu, as Hezron as Carmi.

¹⁰ As Simeon; Jemuel, as Jamin, as Ohad, as Jachin, as Zohar, as Shaul mac da ben va ny Canaanite.

¹¹ As mec Levi: Gershon, Kohath as Merari.

¹² As mec Yudah; Er, as Onan, as Shelah, as Pharez, as Zerah; agh hooar Er as Onan baase ayns cheer Chanaan. As mec Pharez, va Hezron as Hamul.

¹³ As mec Issachar; Tolah, as Phuvah, as Job as Shimron.

¹⁴ As mec Zebulun; Sered, as Elon, as Jahleel.

¹⁵ Ad shoh mec Leah, dymmyrk ee da Jacob ayns Padan-aram, as e inneen Dinah; va ooilley anmeenyn e vec as e inneenyn, three-jeig as feed.

¹⁶ As mec Gad; Ziphion, as Haggai, Shuni as Ezbon, Eri, as Arodi, as Areli.

¹⁷ As mec Asher; Jimnah, as Ishuah, as Isui as Beriah, as Serah nyn shuyr: as mec Beriah; Heber as Malchiel.

¹⁸ Ad shoh mec Zilpah, hug Laban da Leah e inneen: as ad shoh dymmyrk ee da Jacob, shey anmeenyn jeig.

¹⁹ Mec Rachel, ben Yacob; Joseph as Benjamin.

²⁰ As da Joseph, ayns cheer Egypt, va ruggit Manasseh as Ephraim, ren Asenath inneen Potipherah, prince jeh On gymmyrkey da.

²¹ As mec Venjamin va Belah, as Becher, as Ashbel, Gera, as Naaman, Ehi, as Rosh, Muppim, as Huppim, as Ard.

²² Ad shoh mec Rachel, va er ny ymmyrkey da Jacob: va ooilley ny anmeenyn kiare-jeig.

²³ As mac Dan; Hushim.

²⁴ As mec Naphtali; Jahzeel, as Guni, as Jezer, as Shillem.

²⁵ Ad shoh mec Bilhah, hug Laban da Rachel e inneen, as dymmyrk ee ad shoh da Jacob, va ooilley ny anmeenyn shiaght.

²⁶ Ooilley ny anmeenyn haink marish Jacob gys Egypt, haink jeh e chorp, cheu-mooie jeh mraane-chleuin Yacob, va ooilley ny anmeenyn shoh three-feed as shey:

²⁷ As mec Yoseph, va ruggit da ayns Egypt, va daa phersoon: va ooilley ny persoonyn jeh thie Yacob haink gys Egypt, three-feed as jeih.

²⁸ As hug eh Judah roish er chaghteraght gys Joseph, dy chur er y raad eh gys Goshen; as gys thalloo Ghoshen haink ad.

²⁹ As hooar Joseph e ainagh aarloo, as hie eh seose quail Israel e ayr gys Goshen; as haink eh ’syn enish echey, as huitt eh er e wannal, as cheayn eh er e wannal, son tammylt mie.

³⁰ As dooyrt Israel rish Joseph, Lhig dou baase y gheddyn, nish dy vel mec er vakin dt’eddin, as dy vel oo foast bio.

³¹ As dooyrt Joseph rish e vraaraghyn, as rish lught-thie e ayrey Hem’s seose, as insh-ym da Pharaoh, as jir-ym rish, Ta my vraaraghyn, as lught-thie m’ayrey, v’ayns cheer Chanaan, er jeet hym’s.

³² As she bochillyn ny deiney: son ta’n cheird oc er ve dy ghellal ayns ollagh: as t’ad er goyrt lhieu nyn shioltaneyn, as nyn immanyn, as ooilley ny t’oc.

³³ As hig eh gy-kione, tra ver Pharaoh fys erriu, as tra jir eh, Cre ta nyn geird?

³⁴ Dy jir shiuish, Ta aght beaghee dty harvaantyn er ve mysh ollagh veih nyn aegid, eer derrey nish, chammah shinyn, as myrgeddin nyn ayraghyn: dy vod shiu beaghey ayns cheer Ghoshen; son ta dy chooilley vochill dwoaiagh ayns shilley ny Egyptianee.