Genesis 45 - Yn Vible Casherick 1775 1819

CAB. XLV

¹ Eisht cha voddagh Joseph shassoo magh ny sodjey, kiongoyrt roosyn ooilley va mârish; as deïe eh, Lhig da dy chooilley ghooinney goll magh veih m’enish: as cha duirree dooinney erbee mârish, choud as va Joseph soilshaghey eh hene da e vraaraghyn.

² As cheayn eh dy ard; as cheayll ny Egyptianee eh, as thie Pharaoh.

³ As dooyrt Joseph rish e vraaraghyn, Mish Joseph; vel m’ayr foast bio? As cha dod e vraaraghyn fockle d’ansoor y choyrt da; son v’ad seaghnit ec e enish.

⁴ As dooyrt Joseph rish e vraaraghyn, Tar-jee ny sniessey dou, ta mee guee erriu: as haink ad er-gerrey as dooyrt eh, Mish Joseph nyn mraar chreck shiu gys Egypt.

⁵ Nish, er-y-fa shen, ny bee-jee seaghnit, ny corree riu hene, dy chreck shiu mish gys shoh: son Jee hug mish reue, dy hauail bioys.

⁶ Son y daa vleïn shoh ta’n ghortey er ny ve ’sy cheer: as foast ta queig bleeaney, ayndoo, cha bee traaue ny buinn.

⁷ As hug Jee mish reueish, dy reaylley diu sluight er y thalloo, as dy hauail nyn mioys liorish livrey-ys yindyssagh.

⁸ Myr shen nish, cha nee shiuish hug mish gys shoh, agh Jee: as t’eh er n’yannoo mee myr ayr da Pharaoh as chiarn er ooilley e hie, as my er-reill harrish ooilley cheer Egypt.

⁹ Jean-jee siyr, as immee-jee seose gys m’ayr, as abbyr-jee rish, Myr shoh ta dty vac Joseph, gra, Ta Jee er n’yannoo mish my hiarn er ooilley Egypt; tar neose hym, ny lhig shaghey.

¹⁰ As nee oo cummal ayns thalloo Ghoshen, as bee oo er-gerrey dou, oo hene, as dty chloan, as cloan dty chlienney, as dty hioltaneyn, as dty immanyn, as ooilley ny t’ayd.

¹¹ As ayns shen neem’s oo y veaghey, (son ta foast roïn queig bleeaney dy ghenney) er-aggle dy jig oo hene, as lught dty hie, as ooilley ny t’ayd gys boghtynid.

¹² As cur-my-ner, ta ny sooillyn eu hene fakin, as sooillyn my vraar Benjamin, dy nee my veeal hene ta loayrt riu.

¹³ As nee shiu ginsh da my ayr mychione ooilley my ooashley ayns Egypt, as mychione ooilley ny ta shiu er vakin: as nee shiu siyr, as ver shiu lhieu neose my ayr gys shoh.

¹⁴ As huitt eh er mwannal e vraar Benjamin, as cheayn eh; as cheayn Benjamin er y wannal echeysyn.

¹⁵ Phaag eh myrgeddin ooilley e vraaraghyn, as cheayn eh mâroo: as ny lurg shen, ren e vraaraghyn taggloo rish.

¹⁶ As va goo jeh shoh er ny chlashtyn ayns thie Pharaoh, gra, Ta braaraghyn Yoseph er jeet: as ve mie ayns shilley Pharaoh, as e harvaantyn.

¹⁷ As dooyrt Pharaoh rish Joseph, Abbyr rish dty vraaraghyn, Shoh jean-jee; laad-jee ny beiyn eu, trog-jee erriu, as immee-jee gys cheer Chanaan.

¹⁸ As gow-jee mêriu nyn ayr, as nyn lught-thie, as tar-jee hym’s; as ver-yms diuish yn chooid share jeh thalloo Egypt, as nee shiu beaghey er meeaylys y thallooin.

¹⁹ Nish t’ou er dty harey, shoh jean-jee; gow-jee waggonyn veih cheer Egypt son y vooinjer veggey eu, as son ny mraane eu, as cur-jee lhieu nyn ayr, as tar-jee hym’s.

²⁰ As ny cur-jee geill da nyn stoo-thie, son ta foays ooilley thalloo Egypt nyn gour.

²¹ As ren cloan Israel myr shen: as hug Joseph waggonyn daue, myr doardee Pharaoh, as hug eh beaghey daue son y raad.

²² Da dagh dooinney jeu hug eh caghlaaghyn coamrey: agh da Benjamin hug eh three cheead peesh dy argid, as queig caghlaaghyn garmad.

²³ As shoh myr hug eh gys e ayr; jeih assylyn laadit lesh cooid chostal Egypt, as jeih assylyn bwoirryn laadit lesh arroo as arran, as beaghey son e ayr er y raad.

²⁴ Myr shen hug eh e vraaraghyn ersooyl, as jimmee ad roue; as dooyrt eh roo, Jeeagh nagh duitt shiu magh er y raad.

²⁵ As hie ad seose veih Egypt as haink ad gys cheer Chanaan, gys Jacob nyn ayr.

²⁶ As dinsh ad da, gra, Ta Joseph foast bio, as t’eh ny chiannoort harrish ooilley cheer Egypt. As ren cree Yacob gannooinaghey, son cha chred eh ad.

²⁷ As dinsh ad da ooilley ny goan va Joseph er loayrt roo; as tra honnick eh ny waggonyn, va Joseph er choyrt dy chur lesh eh, haink e vree reesht ayns cree Yacob nyn ayr.

²⁸ As dooyrt Israel, Te dy liooar; ta Joseph my vac foast bio: hem dy akin eh my voym baase.