Genesis 44 - Yn Vible Casherick 1775 1819

CAB. XLIV

¹ As doardee eh da stiurt e hie, gra, Lhieen saick ny deiney lesh beaghey, wheesh ad oddys ad lhieu, as cur argid dy chooilley ghooinney, ayns beeal e hack.

² As cur my chappan’s, yn cappan argid, ayns beeal sack yn er saa, as argid e arroo, as ren eh er raa Yoseph.

³ Cha leah’s ren y laa toshiaght soilshaghey, va ny deiney currit ersooyl ad hene as nyn assylyn.

⁴ As tra v’ad er n’gholl magh ass yn ard-valley, as nagh row ad foast foddey jeh, dooyrt Joseph rish e stiurt, Seose, eiyr er ny deiney; as tra verrys oo orroo, abbyr roo, Cre’n-fa ta shiu er chooilleeney olk son mie?

⁵ Nagh nee shoh eh, ass ta my hiarn giu? as liorish t’eh dy jarroo geddyn magh folliaghtyn? ta shiu er n’yannoo dy olk ayns yn obbyr shoh.

⁶ As verr eh orroo, as loayr eh roo ny goan cheddin.

⁷ As dooyrt ad rish, Cre’n-fa ta my hiarn gra ny goan shoh? Ny lhig y Jee, dy beagh dty harvaantyn kyndagh jeh lheid y red.

⁸ Cur-my-ner, yn argid hooar shin ayns beeal ny saick ain, hug shin lhien reesht hood, veih cheer Chanaan: kys eisht, ghoghe shin orrin dy gheid ass thie dty hiarn argid ny airh?

⁹ Er quoi-erbee jeh dty harvaantyn vees y ghriu er ny gheddyn, lhig dasyn chammah v’er ny choyrt gy-baase, as shin hene myrgeddin dy ve nyn gappee da my hiarn.

¹⁰ As dooyrt eh, Nish myrgeddin, lhig da ve cordail rish nyn raa hene: Er quoi-erbee te ry-gheddyn, bee eshyn my harvaant, as bee shiuish gyn loght.

¹¹ Eisht ghow ad dy tappee neose dy chooilley ghooinney e hack gys y thalloo, as deayshil dy chooilley ghooinney e hack.

¹² As ronsee eh, as ghow eh toshiaght, ec yn er by-hinney, as daag eh jeh ec yn er saa: as va’n cappan er ny gheddyn ayns sack Venjamin.

¹³ Eisht raip ad nyn goamraghyn, as laad ad dy chooilley ghooinney e assyl, as hyndaa ad reesht gys yn ard-valley.

¹⁴ As haink Judah as e vraaraghyn gys thie Yoseph (son v’eh foast sthie) as huitt ad kiongoyrt rish, er y thalloo.

¹⁵ As dooyrt Joseph roo, Cre’n obbyr shoh ta shiu er n’yannoo? nagh row fys eu, dy vod lheid y dooinney as mish son shickyrys, folliaghtyn y gheddyn magh?

¹⁶ As dooyrt Judah, Cre jir mayd rish my hiarn? cre nee mayd gra ny kys nee mayd shin hene y heyrey? ta Jee er choyrt gys soilshey mee-chairys dty harvaantyn: cur-my-ner, ta shin sharvaantyn my hiarn, chammah shinyn, as eshyn myrgeddin, echey ta’n cappan er ny gheddyn.

¹⁷ As dooyrt eh, Ny lhig y Jee, dy jinnin’s myr shen: agh y dooinney ayns e laue ta’n cappan er ny gheddyn, bee eshyn my harvaant; agh er nyn son euish, gow-jee reue seose ayns shee gys nyn ayr.

¹⁸ Eisht haink Judah er-gerrey da, as dooyrt eh, O my hiarn, lhig ta dty harvaant, ta mee guee ort, fockle y loayrt ayns clashtyn my hiarn, as ny lhig da dty chorree lostey noi dty harvaant: son t’ou uss eer myr Pharaoh.

¹⁹ Dênee my hiarn jeh e harvaantyn, gra, Vel ayr, ny braar eu?

²⁰ As dooyrt shinyn rish my hiarn, Ta ayr ain, ny henn ghooinney, as lhiannoo e henn eash, yn er saa, as ta e vraar marroo, as eshyn ynrycan ta er-mayrn jeh e voir, as ta cree e ayr soit er.

²¹ As dooyrt uss rish dty harvaantyn, Cur-jee lhieu eh sheese hym’s, dy voddym soiaghey my hooillyn er.

²² As dooyrt shin rish my hiarn, Cha vod y scollag faagail e ayr: son my aagagh eh e ayr, vrishagh e ayr e chree.

²³ As dooyrt uss rish dty harvaantyn, Mannagh jig nyn mraar saa neose mêriu, cha vaik shiu my eddin arragh.

²⁴ As haink eh gy-kione, tra haink shin seose gys dty harvaant my ayr, dinsh shin da goan my hiarn.

²⁵ As dooyrt nyn ayr, Immee-jee reesht, as kionnee-jee dooin kuse dy veaghey.

²⁶ As dooyrt shin, Cha vod mayd goll sheese: my vees nyn mraar saa mârin, eisht hem mayd sheese: son cha vod mayd eddin y dooinney y akin, mannagh bee nyn mraar saa mârin.

²⁷ As dooyrt dty harvaant m’ayr rooinyn, Ta fys euish dy dymmyrk my ven dooys daa vac:

²⁸ As hie fer jeu magh voym, as dooyrt mish, Son shickyrys t’eh raipit ayns peeshyn; as cha vaik mee eh er-dy-henney:

²⁹ As my ghoys shiu eh shoh myrgeddin voym, as dy jean olk taghyrt da, ver shiu lhieu sheese my chione lheeah lesh trimshey gys yn oaie.

³⁰ Nish er-y-fa shen, tra hig-ym gys dty harvaant m’ayr, as nagh bee’n scollag mârin; (fakin dy vel y vioys echeysyn kianlt seose ayns bioys y scollag)

³¹ Hig eh gy-kione, tra t’eh fakin, nagh vel y scollag mârin, dy bee eh oyr baaish da; as ver dty harvaantyn lhieu sheese kione lheeah dty harvaant nyn ayr, lesh trimshey gys yn oaie.

³² Son hie dty harvaant raane son y scollag gys m’ayr, gra, Mannagh der-yms lhiam hood eh, eisht lhig dooys ’ve oolee fenish m’ayrey er son dy bragh.

³³ Nish er-y-fa shen, ta mee guee ort, lhig da dty harvaant ve freilt ayns bondiaght da my hiarn, ayns ynnyd y scollag; as lhig da’n scollag goll seose marish e vraaraghyn.

³⁴ Son kys hem’s seose gys m’ayr, as gyn y scollag ’ve mârym? er-aggle dy vaik-ym yn seaghyn hig er m’ayr.