Genesis 42 - Yn Vible Casherick 1775 1819

CAB. XLII

¹ Nish tra cheayll Jacob, dy row arroo ayns Egypt, dooyrt Jacob rish e vec, Cre’n-fa ta shiu jeeaghyn y derrey yeh er y jeh elley?

² As dooyrt eh, Cur-my-ner, ta mee er chlashtyn, dy vel arroo ayns Egypt; gow-jee sheese gys shen, as kionnee-jee er nyn son veih shen, dy vod mayd ve bio, as nagh vow mayd baase.

³ As hie jeih braaraghyn Yoseph sheese, dy chionnaghey arroo ayns Egypt.

⁴ Agh Benjamin, braar Yoseph, cha dug Jacob marish e vraaraghyn: son dooyrt eh, Er-aggle, trooid taghyrt, dy jig olk ny raad.

⁵ As haink mec Israel dy chionnaghey arroo, marish feallagh elley: son va’n ghortey ayns cheer Chanaan.

⁶ As va Joseph ny chiannoort harrish y cheer, as eshyn ve va creck rish ooilley sleih ny cheerey: as haink braaraghyn Yoseph, as chroym ad ad-hene sheese kiongoyrt rish, lesh nyn eddinyn gys y thalloo.

⁷ As honnick Joseph e vraaraghyn, as va enney echey orroo, agh dymmyrk eh eh-hene myr joarree daue, as loayr eh dy mooaralagh roo: as dooyrt eh roo, Cre veih ta shiuish? As dooyrt ad, Veih cheer Chanaan, dy chionnaghey beaghey.

⁸ As va enney ec Joseph er e vraaraghyn, agh cha row enney oc ersyn.

⁹ As chooinee Joseph er ny dreamallyn v’echey jeusyn, as dooyrt eh roo, She peeikearyn follit shiu: dy akin boghtynid y cheer ta shiu er jeet.

¹⁰ As dooyrt adsyn rish, Cha nee, my hiarn, agh dy chionnaghey beaghey ta dty harvaantyn er jeet.

¹¹ Ta shin ooilley mec un dooinney; she deiney ynrick shin; cha nee peeikearyn edyr dty harvaantyn.

¹² As dooyrt eh roo, Cha nee, agh dy akin boghtynid y cheer ta shiu er jeet.

¹³ As dooyrt adsyn, Ta dty harvaantyn daa vraar jeig, mec un dooinney ayns cheer Chanaan: as cur-my-ner, ta’n er saa, ’sy tra t’ayn, marish nyn ayr, as ta fer nagh vel er-mayrn.

¹⁴ As dooyrt Joseph roo, Shen eh dy loayr mee riu, gra, She peeikearyn shiu.

¹⁵ Liorish shoh bee shiu er ny phrowal; der bioys Pharaoh, cha jed shiu magh veih’n ynnyd shoh, mannagh jig nyn mraar saa hym’s gys shoh.

¹⁶ Lhig da fer jiu goll, as nyn mraar y choyrt lesh, as bee shiuish freilt ayns pryssoon, dy vod ny goan eu ve er ny phrowal, vel firrinys erbee ayndoo: er-nonney, der bioys Pharaoh, she peeikearyn shiu.

¹⁷ As hug eh ad ooilley cooidjagh ayns pryssoon three laa.

¹⁸ As dooyrt Joseph roo yn trass laa, Shoh jean-jee, as bee nyn mioys lhieu: son ta mish goaill aggle roish Jee.

¹⁹ My she deiney ynrick shiu, lhig da fer jeh nyn mraaraghyn ve kianlt ayns thie’n phryssoon eu: gow-jee shiuish, cur-jee lhieu arroo son ymmyrch ny thieyn eu.

²⁰ Agh cur-jee lhieu nyn mraar saa hym’s; myr shoh bee ny goan eu jeant firrinagh, as cha vow shiu baase. As ren ad myr shen.

²¹ As dooyrt ad ry-cheilley, ta shin dy firrinagh oolee mychione nyn mraar, ayns dy vaik shin angaish e annym tra ghuee eh orrin, as cha dug shin clashtyn da: shen-y-fa ta’n seaghyn shoh er jeet orrin.

²² As loayr Reuben roo, gra, Nagh loayr mish riuish, gra, Ny cur-jee laue er y lhiannoo, as cha n’eaishtagh shiu rhym? shen-y-fa, cur-jee my-ner nish, ta loght yn uill echey orrin.

²³ As cha row fys oc, dy row Joseph toiggal ad: son loayr eh roo liorish fer va jannoo glare eddyr ad.

²⁴ As hyndaa eh eh-hene mygeayrt voue, as cheayn eh, as hyndaa eh huc reesht, as loayr eh roo, as ghow eh Simeon voue, as chiangle eh eh kiongoyrt rish nyn sooillyn.

²⁵ Eisht hug Joseph sarey dy lhieeney ny saick oc lesh arroo, as dy hyndaa argid dagh dooinney ayns e hack, as dy chur beaghey daue son y raad, as shoh myr ren eh roo.

²⁶ As laad ad ny assylyn oc lesh yn arroo, as hie ad rhymboo.

²⁷ As myr doshil fer jeu e hack, dy chur bee da e assyl ec y thie-oast, chronnee eh yn argid echey, son cur-my-ner, ve ayns beeal e hack.

²⁸ As dooyrt eh rish e vraaraghyn, Ta my argid aym reesht; as jeeagh-jee, te dy jarroo ayns my hack, as chaill ad nyn gree, as v’ad fo atchim, gra y derrey yeh rish y jeh elley, Cre shoh, ta Jee er n’yannoo rooin?

²⁹ As haink ad gys Jacob nyn ayr gys cheer Chanaan, as dinsh ad da ooilley ny va er daghyrt daue, gra,

³⁰ Yn dooinney ta chiarn ny cheerey, loayr eh dy baggyrtagh rooin, as ghow eh shin son peeikearyn ’sy cheer.

³¹ As dooyrt shin rish, She deiney ynrick shin, cha nee peeikearyn shin edyr.

³² Ta shin daa vraar jeig, mec da un ayr, ta fer nagh vel er-mayrn, as ta’n er saa, ’sy traa t’ayn, marish nyn ayr, ayns cheer Chanaan.

³³ As dooyrt y dooinney, chiarn ny cheerey rooin, Liorish shoh bee fys aym, dy nee deiney ynrick shiu: faag-jee fer jeh nyn mraaraghyn ayns shoh mârym’s, as gow shiuish beaghey son êgin nyn lught-thie, as immee-jee reue.

³⁴ As cur-jee lhieu nyn mraar saa hym’s: eisht bee fys aym’s, nagh nee peeikearyn shiu, agh dy vel shiu deiney ynrick: myr shen livrey-yms hiu nyn mraar, as nee shiu dellal ’sy cheer.

³⁵ As haink eh gy-kione, myr dolmee ad ny saick oc, cur-my-ner, dy row sporran argid dy chooilley ghooinney ayns e hack: as tra honnick chammah ad hene, as nyn ayr ny sporranyn-argid, v’ad agglit.

³⁶ As dooyrt Jacob nyn ayr roo, Mish ta shiu er roostey jeh my chloan: cha vel Joseph er-mayrn, as cha vel Simeon aym: as nee shiu Benjamin y ghoaill voym: ta ooilley ny reddyn shoh m’oï.

³⁷ As loayr Reuben rish e ayr, gra, Marr my ghaa vac, mannagh der-ym lhiam hood’s eh; cur fo my laue eh, as ver-ym lhiam hood eh reesht.

³⁸ As dooyrt eh, Cha jed my vac sheese mêriu; son ta e vraar marroo, as ta eshyn faagit ny-lomarcan: my hig drogh haghyrt erbee er, ’sy raad ta shiu goll, eisht ver shiu lhieu sheese my chione lheeah lesh trimshey gys yn oaie.