Genesis 41 - Yn Vible Casherick 1775 1819

CAB. XLI

¹ As ve myr shen, ec kione daa vleïn, dy ren Pharaoh dreamal, as cur-my-ner, hass eh liorish yn awin.

² As cur-my-ner, haink seose ass yn awin, shiaght booaghyn aalin, as slane beiyht: as ren ad gyndyr ayns lheeannee.

³ As cur-my-ner, haink shiaght booaghyn elley geiyrt orroo, ass yn awin, ayns drogh challin, as shang; as hass ad liorish y maase elley er broogh ny hawin.

⁴ As ren ny booaghyn ayns drogh challin as shang, gee seose ny shiaght beiyn aalin as roauyrey. Er shoh ghooisht Pharaoh.

⁵ As chaddil eh, as ren eh dreamal yn nah cheayrt, as cur-my-ner, haink shiaght jeeassyn dy arroo seose er yn un stalk, slane appee as mie.

⁶ As cur-my-ner, daase seose shiaght jeeassyn boghtey, as fowanit lesh y gheay-niar, geiyrt orroo.

⁷ As stroie ny shiaght jeeassyn boghtey ny shiaght jeeassyn slane appee: as ghooisht Pharaoh, as cur-my-ner, she dreamal v’ayn.

⁸ As haink eh gy-kione ’sy voghrey, dy row e aigney seaghnit, as hug eh fys, as deïe eh er ooilley fir-obbee Egypt, as ooilley ny deiney creeney v’ayn; as dinsh Pharaoh e ghreamal daue; agh cha row unnane oddagh toiggal y choyrt da Pharaoh jeu.

⁹ Eisht loayr yn ard-vutler rish Pharaoh, gra, Jiu ta mee tayrn m’oiljyn gys cooinaghtyn.

¹⁰ Va Pharaoh jymmoosagh rish e harvaantyn, as hug eh mish ayns pryssoon, ayns thie captan e ghard, chammah mish as yn ard-stiurt.

¹¹ As ren shin dreamal ’syn un oie, mish as eshyn: dagh unnane ain rere e ghreamal hene.

¹² As va ayns shen mârin dooinney aeg, Hebrew, sharvaant da captan y ghard; as dinsh shin da, as hug eh bun dooin er ny dreamallyn ain; da dagh unnane ain cordail rish e ghreamal hoilshee eh cre va er ny hoiggal liorish.

¹³ As haink eh gy-kione, myr dooyrt eshyn, myr shen haink eh mygeayrt; mish hug eh stiagh reesht gys my oik, agh eshyn hrogh eh.

¹⁴ Eisht hug Pharaoh fys, as deïe eh son Joseph, as hug ad lhieu eh chelleeragh ass y dungeon: as ghow eh yn aasaag jeh hene; as ren eh e choamrey y chaghlaa, as haink eh fenish Pharaoh.

¹⁵ As dooyrt Pharaoh rish Joseph, Ta mee er n’yannoo dreamal, as cha vel fer erbee oddys soilshey ’choyrt dou cre monney eh: as ta mee er chlashtyn eh raït my-dty-chione’s, dy vel toiggal ayd’s er dreamal, dy chur tushtey jeh.

¹⁶ As dreggyr Joseph Pharaoh, gra, Cha nee aynym’s te: Jee ver da Pharaoh ansoor dy hee.

¹⁷ As dooyrt Pharaoh rish Joseph. Ayns my ghreamal, cur-my-ner, hass mee er broogh ny hawin.

¹⁸ As cur-my-ner, haink seose ass yn awin shiaght booaghyn ayns callin vie as aalin; as ren ad gyndyr ayns lheeannee.

¹⁹ As cur-my-ner, haink shiaght beiyn elley seose geiyrt orroo, boght, as feer ghrow, as thanney ayns feill, lheid as nagh vaik mee rieau ayns cheer Egypt son meillid.

²⁰ As d’ee ny beiyn thanney as graney seose, ny chied shiaght beiyn roauyrey.

²¹ As tra v’ad erreish gee ad, cha row eh ry-akin orroo, dy row ad er n’ee ad, agh v’ad kinjagh cha shang as v’ad roïe: Er shen ghooisht mee.

²² As honnick mee ayns my ghreamal, as cur-my-ner, haink shiaght jeeassyn seose er yn un chass, slane appee as mie.

²³ As cur-my-ner, daase shiaght jeeassyn, fioghit, thanney, as fowanit lesh y gheay-niar, seose geiyrt orroo.

²⁴ As stroie ny jeeassyn thanney ny shiaght jeeassyn mie: as dinsh mee shoh da ny fir-obbee; agh cha row fer jeu oddagh y hoilshaghey dou eh.

²⁵ As dooyrt Joseph rish Pharaoh, Cha vel dreamal Pharaoh cowraghey agh yn un red: ta Jee er hoilshaghey da Pharaoh, cre t’eh kiarail dy yannoo.

²⁶ Ta ny shiaght booaghyn mie, cowraghey shiaght bleeantyn; as ta ny shiaght jeeassyn mie, shiaght bleeantyn: ta’n dreamal yn un chooid.

²⁷ As ta ny shiaght booaghyn shang as graney, haink seose geiyrt orroo, shiaght bleeantyn: as bee ny shiaght jeeassyn follym fowanit lesh y gheay-niar, shiaght bleeantyn dy ghortey.

²⁸ Shoh’n red ta mee er loayrt rish Pharaoh: ny ta Jee kiarail dy yannoo, t’eh soilshaghey da Pharaoh.

²⁹ Cur-my-ner, ta shiaght bleeantyn dy phalchey mooar ry-heet, trooid ooilley cheer Egypt.

³⁰ As nyn lurg, hig shiaght bleeantyn dy ghortey, as bee ooilley’n phalchey er ny yarrood ayns cheer Egypt: as nee’n gortey stroie yn cheer.

³¹ As cha bee cooinaghtyn er y phalchey ’sy cheer, kyndagh rish y ghortey shen hig geiyrt er: son bee eh feer trome.

³² As son dy row yn dreamal er ny ghoobley da Pharaoh, te, er-yn-oyr dy vel y chooish er ny oardaghey liorish Jee, as nee Jee shen dy gerrit y chooilleeney.

³³ Nish er-y-fa shen, lhig da Pharaoh jeeaghyn magh son dooinney tushtagh as creeney: as eh y hoiaghey harrish cheer Egypt.

³⁴ Lhig da Pharaoh jannoo shoh, as lhig da oaseiryn y phointeil harrish y cheer, dy hroggal mess yn wheiggoo ayrn jeh thalloo Egypt, ayns ny shiaght bleeantyn dy phalchey.

³⁵ As lhig daue chaglym ooilley beaghey ny bleeantyn mie shen ta ry-heet, as arroo y hashtey seose fo laue Pharaoh, as lhig daue beaghey y reayll ayns ny ard-valjyn.

³⁶ As bee’n beaghey shen son stoyr gys y cheer ry-hoi ny shiaght bleeantyn gonney, vees ayns cheer Egypt: nagh jed y cheer naardey liorish y ghenney.

³⁷ As va’n choyrle mie ayns shilley Pharaoh, as ooilley e hirveishee.

³⁸ As dooyrt Pharaoh rish e hirveishee, C’raad yiow mayd y lheid shoh, dooinney ayn ta spyrryd Yee?

³⁹ As dooyrt Pharaoh rish Joseph, Ayns wheesh as dy vel Jee er hoilshaghey ooilley shoh dhyt’s; cha vel fer erbee cha tushtagh, as cha creeney as oo hene.

⁴⁰ Bee uss harrish my hie, as cordail rish dty raa, bee ooilley my phobble er nyn reill: ayns y stoyl-reeoil ny-lomarcan, beem’s ny syrjey na uss.

⁴¹ As dooyrt Pharaoh rish Joseph, Jeeagh, ta mish er dty hoiaghey harrish ooilley cheer Egypt.

⁴² As ghow Pharaoh jeh yn fainey echey veih e laue, as hug eh er laue Yoseph eh, as choamree eh eh ayns garmadyn sheeidey, as hug eh boandey dy airh mooish e wannal.

⁴³ As hug eh er markiagh ayns y nah ainagh echey: as deïe ad roish, Croym-jee yn ghlioon: as hug eh da yn reill harrish ooilley cheer Egypt.

⁴⁴ As dooyrt Pharaoh rish Joseph, Mish Pharaoh, as dt’egooish cha jean dooinney erbee troggal seose e laue ny e chass ayns ooilley cheer Egypt.

⁴⁵ As ren Pharaoh genmys Joseph Zaphnath-paaneah: as hug eh da son ben Asenath inneen Potipherah prince jeh Ou: as hie Joseph magh trooid ooilley cheer Egypt.

⁴⁶ As va Joseph jeih bleeaney as feed dy eash, tra hass eh fenish Pharaoh ree Egypt; as hie Joseph magh veih fenish Pharaoh, as hie eh trooid ooilley cheer Egypt.

⁴⁷ As ayns ny shiaght bleeantyn dy phalchey, hug y thalloo magh bishaghey erskyn towse.

⁴⁸ As haggil eh seose ooilley beaghey ny shiaght bleeantyn v’ayns cheer Egypt, as ren eh stoyral seose yn beaghey ayns ny ard-valjyn: arroo’n vagher, va mygeayrt dagh ard-valley, hasht eh seose ayndoo.

⁴⁹ As haggil Joseph arroo myr genniagh ny marrey, ayns lheid y phalchey derrey nagh dod eh coontey sodjey y reayll, son ve erskyn towse.

⁵⁰ As da Joseph va er ny ruggey daa vac roish my daink ny bleeantyn gonney; ren Asenath, inneen Potipherah prince jeh On, gymmyrkey da.

⁵¹ As denmys Joseph yn fer shinney Manasseh: son ta Jee, dooyrt eh, er chur orrym jarrood ooilley my hooilleil, as ooilley my heaghyn ayns thie my ayrey.

⁵² As denmys eh yn nah er Ephraim: son ta Jee er chur orrym ve messoil ayns cheer my heaghyn.

⁵³ As va ny shiaght bleeantyn dy phalchey v’ayns thalloo Egypt, harrish.

⁵⁴ As ghow ny shiaght bleeantyn dy ghortey toshiaght, myr va Joseph er ghra; as va’n ghenney ayns dy chooilley heer: agh ayns ooilley cheer Egypt va arran.

⁵⁵ As tra va stoyr ny cummaltee baarit, trooid ooilley cheer Egypt, deïe’n pobble gys Pharaoh son arran: As dooyrt Pharaoh rish ooilley ny Egyptianee, Gow-jee gys Joseph: jean-jee lurg y raa echeysyn.

⁵⁶ As va’n ghortey harrish ooilley eaghtyr y thallooin; as doshil Joseph ooilley ny thieyn-tashtee, as chreck eh rish ny Egyptianee; as vishee’n ghortey dy trome ayns cheer Egypt.

⁵⁷ As haink dy chooilley heer gys Egypt, gys Joseph, dy chionnaghey arran; er-yn-oyr dy row’n ghenney cha trome ayns dy chooilley heer.