Genesis 40 - Yn Vible Casherick 1775 1819

CAB. XL

¹ As haink eh gy-kione, lurg ny reddyn shoh, dy row butler ree Egypt, as ard-stiurt e hie er duittym fo corree nyn jiarn ree Egypt.

² As va Pharaoh jymmoosagh rish y daa fer-oik shoh, rish yn ard-vutler as rish ard-stiurt e hie.

³ As hug eh ad ayns pryssoon, ayns thie captan e ghard, ayns y phryssoon, yn boayl va Joseph ny phryssoonagh ayn.

⁴ As hug captan y ghard ad fo currym Yoseph, as ghow eh kiarail jeu, as v’ad choud shen dy hraa ayns pryssoon.

⁵ As ren ad ny-neesht dreamal, dagh fer jeu e ghreamal ’syn un oie, dagh dooinney rere e ghreamal; yn ard-vutler as stiurt ree Egypt, va ayns y phryssoon.

⁶ As haink Joseph stiagh huc ’sy voghrey, as yeeagh eh orroo, as cur-my-ner, va drogh yien orroo.

⁷ As dênee eh jeh fir-oik Pharaoh, va mârish ayns pryssoon thie e hiarn, gra, Cre’n-fa ta shiu jeeaghyn cha trome-chreeagh jiu?

⁸ As dooyrt ad rish, Ta shin er n’yannoo dreamal, as cha vel fer erbee dy chur dooin toiggal jeh. As dooyrt Joseph roo, Nagh nee gys Jee ta bentyn dy hoilshaghey folliaghtyn? insh-jee dooys ad, ta mee guee erriu.

⁹ As dinsh yn ard-vutler e ghreamal da Joseph, as dooyrt eh rish, Ayns my ghreamal, cur-my-ner, va billey-feeyney kiongoyrt rhym.

¹⁰ As ayns y villey-feeyney va three banglaneyn; as ve myr dy beagh eh, brishey magh, as hilg eh blaa; as dymmyrk ny dossanyn echey messyn-feeyney appee.

¹¹ As va cappan Pharaoh ayns my laue; as ghow mee ny messyn-feeyney, as hraisht mee ad ayns cappan Pharaoh, as hug mee yn cappan ayns laue Pharaoh.

¹² As dooyrt Joseph rish, Shoh ny ta er ny hoiggal liorish; Ta ny three banglaneyn cowraghey three laa.

¹³ Foast cheu-sthie jeh three laa, nee Pharaoh troggal seose dty chione, as goaill oo stiagh reesht gys dty oik; as ver oo cappan Pharaoh ayns e laue, myr bollagh oo, tra v’ou yn butler echey.

¹⁴ Agh cooinee orrym’s, tra hig eh dy mie lhiat, as soilshee kenjallys, ta mee guee ort, dooys; as jean imraa jee’m rish Pharaoh, as livrey mee ass y thie shoh.

¹⁵ Son dy jarroo, va mee er my gheid ersooyl ass cheer ny Hebrewnee; as ayns shoh myrgeddin, cha vel mee er chur oyr erbee, dy jinnagh ad mee ’sy phryssoon.

¹⁶ Tra honnick yn ard-stiurt, dy row yn meanal v’er ny choyrt er, foayroil; dooyrt eh rish Joseph, Va mish neesht ayns my ghreamal, as cur-my-ner, va three basketyn baney er my chione.

¹⁷ As ayns y vasket b’yrjey, va jeh dy chooilley vonney dy vee broit ’syn oghe, son Pharaoh; as d’ee ny eeanlee ad, ass y vasket, v’er my chione.

¹⁸ As dreggyr Joseph, as dooyrt eh, Shoh’n meanal echey: Ta ny three basketyn cowraghey three laa.

¹⁹ Foast cheu-sthie jeh three laa, nee Pharaoh troggal seose dty chione jeed, as oo y chroghey er billey, as nee ny eeanlee gee dty eill jeed.

²⁰ As haink eh gy-kione er yn trass laa, va corrym gys y laa ruggyr Pharaoh, dy ren eh cuirraghyn da ooilley e ard-gheiney, as ren eh soiaghey seose yn ard-vutler, as yn ard-stiurt mastey ny fir-oik.

²¹ As ghow eh stiagh yn ard-vutler gys e oik reesht; as hug eshyn y cappan ayns laue Pharaoh:

²² Agh yn ard-stiurt ren eh ’chroghey, myr va Joseph er hoilshaghey daue.

²³ Ny-yeih cha chooinee yn ard-vutler er Joseph, agh yarrood eh eh.