Genesis 39 - Yn Vible Casherick 1775 1819

CAB. XXXIX

¹ As va Joseph er ny choyrt lesh sheese gys Egypt, as ren Potiphar, fer-oik fo Pharaoh, captan e ghard, va ny Egyptian, eh y chionnaghey veih laue ny Ishmaeliteyn, va er choyrt lhien eh sheese gys shen.

² As va’n Chiarn marish Joseph, as v’eh ny ghooinney haink dy chooilley nhee lesh, as v’eh ayns thie e vainshtyr yn Egyptian.

³ As hug e vainshtyr tastey dy row’n Chiarn mârish, as dy dug y Chiarn er ooilley ny v’eh cur rish, dy vishaghey fo e laue.

⁴ As hooar Joseph foayr ’sy chilley echey, as ren eh shirveish da; as ren eh ny oaseir jeh harrish e hie, as ooilley ny v’echey hug eh fo e laue.

⁵ As haink eh gy-kione, er-dyn traa v’eh er n’yannoo eh ny oaseir ayns e hie, as harrish ooilley ny v’echey, dy vannee yn Chiarn thie yn Egyptian, er graih Yoseph: As va bannaght y Chiarn er ooilley ny v’echey ayns y thie, as ayns y vagher.

⁶ As daag eh ooilley ny v’echey fo laue Yoseph; as cha row kiarail erbee er son nhee erbee dy row echey, er-lhimmey jeh’n arran v’eh dy ee: as va Joseph ny phersoon stoamey, as feer aalin.

⁷ As haink eh gy-kione, lurg ny reddyn shoh, dy hilg e ven-ainshtyr e tooill er Joseph; as dooyrt ee, Lhie mârym,

⁸ Agh dob eshyn, as dooyrt eh rish e ven-ainshtyr, Cur-my-ner, cha vel fys ec my vainshtyr er ny ta mârym ayns y thie, as t’eh er livrey ooilley ny t’echey fo my laue.

⁹ Cha vel unnane ny syrjey ’sy thie shoh na mish: chamoo t’eh er reayll nhee erbee voym’s, agh uss, er-yn-oyr dy nee oo yn ven echey: kys eisht oddym’s cur rish yn aggair vooar shoh, as peccah ’yannoo noi Jee?

¹⁰ As haink eh gy-kione, myr loayr ee rish Joseph laa lurg laa, nagh deaisht eh r’ee, dy lhie lioree, ny dy ve mâree.

¹¹ As haink eh gy-kione mysh y traa shoh, dy jagh Joseph stiagh ’sy thie mysh e chooishyn hene, as cha row veg jeh’n vooinjer mygeayrt.

¹² As haare ee greme er e gharmad, gra, Lhie mârym: as daag eh e gharmad ayns y laue eck, as chossyn eh roish, as hooar eh magh.

¹³ As haink eh gy-kione, tra honnick ee dy row eh er vaagail e choamrey ayns y laue eck, as er gosney roish.

¹⁴ Dy dyllee ee gys sleih yn thie eck, as loayr ee roo, gra, Jeeagh-jee, t’eh er choyrt lesh Hebrew stiagh hooin, dy hayrn scammylt orrin: haink eh stiagh hym’s dy lhie mârym, as dyllee mee lesh coraa ard.

¹⁵ As haink eh gy-kione, tra cheayll eh dy hrog mee seose my choraa, as dy deïe mee magh, dy daag eh e gharmad mârym, as chossyn eh roish, as hooar eh magh.

¹⁶ As hasht ee seose e gharmad lioree, derrey haink y chiarn echey thie.

¹⁷ As loayr ee rish, cordail rish ny goan shoh, gra, Yn charvaant Hebrew hug oo lhiat hooin, haink eh stiagh hym dy hayrn scammylt orrym.

¹⁸ As haink eh gy-kione, myr hrog mee seose my choraa, as deïe mee magh, dy daag eh e gharmad mârym, as chossyn eh magh.

¹⁹ As haink eh gy-kione, tra cheayll e vainshtyr goan e ven, loayr ee rish, gra, Lurg yn aght shoh ren dty harvaant rhym, dy row e yymmoose er ny vrasnaghey.

²⁰ As ghow mainshtyr Yoseph eh, as hilg eh ’sy phryssoon eh, ynnyd raad va pryssoonee’n ree ayns geulaghyn: as shen y raad v’eh ny phryssoonagh.

²¹ Agh va’n Chiarn marish Joseph, as hoilshee eh myghin da, as hug eh da foayr ayns shilley arreyder y phryssoon.

²² As hug arreyder y phryssoon fo kiarail Yoseph ny phryssoonee v’ayns y phryssoon, as cre-erbee ren ad ayns shen, eshyn doardee eh.

²³ Cha yeeagh arreyder y phryssoon gys nhee erbee dy row fo e laue; er-y-fa dy row yn Chiarn mârish; as shen ny v’eh dy yannoo, hug y Chiarn er dy vishaghey.